قصة صارت لـ قريبي

18 3

لايمكنك التصويت حتى الحصول على 20 نقطة على الأقل
إضغط هنا للإخفاء

ssv8 1048
قبل 9 سنه و 6 شهر

السلام عليكم ورحمة الله وبركاته 
أسعد الله أوقاتكم يا أعضاء منتدى حراج 
أولاً أتمنى لكم الصحة ودوام العافية ولمن تحبون يارب 

قبل لا أبتدي بطرح القصة ، ترا الهدف منها العبرة وليس إيجاد حل 

هذي القصة صارت قبل سنتين ونص ، لواحد من قرايبي كان طالع من إستراحة في شمال الرياض تقريبا الساعة 1 بالليل 
المهم الرجال يوم طلع من الإستراحة إختصارًا للوقت والمسافة ، راح مع طريق مختصر وهو سيد واحد للرايح والجاي 
طبعًا الطريق مظلم ، بعد ما مسك الخط الرجال تفاجأ بتحويلة بعد كيلو ، طبعًا التحويلة كانت من غير إشارات تنبيه أو لمبات او اي شيء ولأنه سيد واحد الطريق والمكان ظلام ، وسرعته كانت 100 
الرجال فقد السيطرة على السيارة ، انحرف يمين عن التحويلة وضرب في شحنه رمل كانت يمين التحويله ، وانقلبت فيه السياره مرتين وتعدلت ، ونقلاً عن كلامه يقول : طلعت من السيارة والدنيا كلها غبار حولي 
جلست 5 دقايق على الارض بعدين رحت للسيارة ادور الجوال ، اتصلت على المرور وطلبتهم مع سيارة إسعاف ورجعت انسدحت على الأرض واتصلت على اخوي ، وبعشر دقايق وصل المرور وبعده سيارة الاسعاف بعدين وصل اخوي 
يقول : ركبت سيارة الاسعاف وطلبت منهم يودوني اقرب مستشفى خاص ، اخذوني و ودوني مستشفى خاص شمال الرياض وللأسف وصلت المستشفى ورفضوا يستقبلون حالتي ( اعتذر عن ذكر إسم المستشفى الخايس ) 
وبعدها أخذوني لمستشفى خاص في شرق الرياض وطبعا دخلته والحمد لله قاموا باللازم وأكثر ، ونقلاً عن كلامه يقول : اخوي جلس في موقع الحادث واخذ تقرير المرور وشال السيارة على سطحه 
طبعًا تقرير المرور كان يقول إن الخطأ 100٪ على الشارع ( أو بالأصح على المقاول ) 
المهم بعد 4 أيام من الحادث ، أخذ السيارة بسطحه وودها لشيخ المعارض ، عشان يقيم الموتر ويكمل إجراءات المرور والتعويض 
شيخ المعارض قيّم السيارة قبل وبعد الحادث وطلعت القيمة ب 115 ألف ريال ، يقول أخذت الاوراق ووديتها للمرور وهم حولوها على ما أذكر انه قالي يالبلدية أو وزارة النقل ( الصراحة ما أذكر وين ودوها )
المهم أن المعاملة وصلت هناك ، يقول : أنا راجعتهم ويوم وصلت عندهم قالوا بيطلع معك موظف يشوف مكان الحادث ، طلع الموظف معي ورحنا مكان الحادث 
والمفاجأة اني حصلت مكان الحادث تغير 180 درجة ، الشارع سفلتوه كامل وحطوا كم لوحة تنبيه ، لدرجة إني لو اقول لحد سالفتي اني سويت حادث هنا قبل 6 ايام ما راح يصدقني 
طبعًا يقول : جلست اشرح للموظف كيف صار الحادث وبعد ما أخذ التفاصيل مشينا ، وقالي الموظف راجعنا بعد فترة وإن شاء الله تتسهل أمورك . 

طبعًا قريبي راجعهم 25 مره لمدة سنتين متواصله ، ما لقى أحد يعطيه وجه ، كل يوم تصريفه ، كل يوم عذر جديد لهم ، سنتين راحت مطالبات على الفاضي ولا اخذ ولا ريال 
المبلغ كان 115 ألف ريال ، بتقرير المرور وشيخ المعارض مع كل اختامهم . 
وقريبي بعد ما شاف المهزله هذي غسل يده منهم وسحب على الموضوع كله ، والحمد لله ربي رزقه بموتر أحسن من الأول . 


ملاحظاتي على القصة هذي يا شباب : 
1- أتمنى من كل شخص فيكم ينتبه للطريق بقوه ، حتى لو انت تعرف الطريق زين ما تدري عن المخاطر اللي تواجهك وخاصة في الليل . 
2- المقاولين عندنا في هالديرة خذ وخل ، لا شغل بضمير ولا شيء فقط مبالغ خيالية تُدفع على صيانة الطرق والنتيجة التلاعب والإستهتار في حياة المواطن وطرق خالية من إشارات التنبيه أثناء حفر الشوارع ( وتكلفة اللوحات واللمبات بسيطه مقابل المبالغ الخيالية ).
3- أتعجب من تصرف بعض الوزارات في تعطيل معاملات الناس وحقوقهم ، مع إن  الوزارات أصلن موضوعة لخدمة الناس والتسهيل عليهم ، ( الطاسة ضايعه يا شباب ) 
4- إستغرابي من بعض المستشفيات الخاصة الكبيرة ، ورفضهم حتى لإنقاذ مواطن أو حتى تقديم إسعافات أوليه له ( ما يحتاج اني أتكلم عن المستشفيات الحكومية لأنه صار علي 4 حوادث ودخلت الشميسي وأعرفهم زين ) 
5- لحد يسكت عن حقه يا شباب ، صح انك بتطول لين تجيبه لكن لا تسكت ( وألوم قريبي انه طنش الموضوع مع إن سنتين فترة طويله بس الرجال ترك الموضوع لانه ربي رازقه ما شاء الله ويقدر يجيب بداله 6 سيارات وهذا سببه ، ماله ومال وجع الرأس على كلامه )  



أتمنى إن القصة تكون ذات فائدة ، وأتمنى إن إسلوبي بالطرح كان بسيط وسهل ومفهوم 
وأتمنى إن الله يبعد عنكم كل شر ومكروه 

تقبلوا تحياتي إخوكم ssv8  ، والقصة كانت لقريبي ونقلتها لكم 

إبلاغ

الردود