تاكد قبل تشتري من التشليح

من البديهي ان الي بيروح للتشليح بيكون عارف سعر الجديد الاصلي في الوكالة والمحلات
الدرعمة على طول للتشليح تأكل راعيها هوا خصوصا مع اسعارهم الخرافية في بعضها 

قد احتجت سويتش المرايات الكهرب حق F150
رحت للوكالة وقالوا مب متوفر في الرياض بنطلبه من جدة اذا بغيته خلال يومين بـ 160 ريال

طبعا مالقيته عند غيرهم 
رحت للتشليح واحصل اسعار غريبة عجيبة 

الي يقولي بـ 200 والي يقول بـ 300
والي عرض علي المجموعة كاملة بـ 750
وأخذته بعد ساعتين من دوراني في التشليح بـ 120 ريال مع الفيش والاسلاك
عند محل مابقى من الموتر الي عنده الا الباب ومستخسر يبيعني السويتش لحالة

طبعا الي يشتغل في التشليح تسألة عن سعر قطعة يقعد يفكر قبل يجاوبك
هذا دليل على ان اسعارهم شختك بختك يا تصيب يا تخيب 

انا صدمت على ابواب جيب المازدا ونزلت الوكاله سألت عن سعر الابواب قالوا ب 1100 و ب 1150 اليمني قدام وورا

هو معقول سعرها اذا تبون الصراحه بس قلت ابي اوفر وبنزل للتشليح

نزلت للتشليح واول واحد قال ب 2500 الباب !!!

ابوك بالذيب !!! ياولد سعره بالوكاله ب 1100 وش 2500 ؟؟؟

قلت ابغاه بدون ديكور بس حديد قال ابيعه كامل قلت انا وش ابغا بالديكور قال احنا نبيع كامل

وبالاخير قال بدون ديكور اخصم لك 500 ريال يعني 2000 ريال تبي ولا دور غيرنا

وسحبت عليه

ووالله اهجول اهجول اهجول وما احصل بأقل من 2200 وفيه طعج بعد ؟؟ وطبعا سبب انه غالي يبيعوه بالديكور

والقا واحد يبيعه فاضي ويقول ب 2000 ريال !!!!

وسحبت عليهم ولا زال بدقشته بالابواب من 8 شهور يمكن ولا هي مأثره

فنصيحه سعر قبل تروح للتشليح

من كان متوقع باب جيب ومازدا بعد ب1100 ؟؟

عشان كذا يحسبه غالي بالوكاله ويروح للتشليح وياخذه ب 2000 ريال ويحسب انه ذيب وهو انزرف

ابو يزيد
بالنسبة لي اذا قطع البدي نفس لون سيارتي ورشة الوكالة ماعندي مانع ازود فيها عن سعر الوكالة

موتك من الي يبيعون قطع بدي قد جاها رش أو سمكرة بأغلى من الوكالة

التشاليح شغلهم نصب بنصب سيارتي الكابرس  يوم انكسر القير 
احصل ارخص شي وقير 350 بـ 1300 بدون تركيب بعد وضمان 5 ايام
ويوم قلت لهم خلاص بكم تاخذون سيارتي يسمونها بـ 850 وبـ 1000
هههههههه القير يبيعونه فوق الف وسيارة كاملة يبونها باقل من الف
والمكينة لحالها اقل من 4000 ماتمسكها وديكورات الابواب لحالها فوق
اقل 400 ماتمسكها  

نفس الشي اللي صار لي 
رحت الوكاله بغيت عكس يمين او يسار ما أدري بالضبط المهم شفت سعره في الوكاله ب 850 قلت ياولد غالي بتشوفه في التشليح أرخص بكثير رحت التشليح وأشوف النترا سليم الوجه فيها الضربه في الجوانب سألت راعي التشليح سوداني نصاب بكم العكس قال ب 950 قلت طيب أنتو اغلى الوكاله قال ليه كم سعره في الوكاله قلت ب 850 بعدين قال بكل بجاحه وقاحه تبغاه ب 950 والا كبه 
نصابين أغلبهم التشاليح 
ومريتهم أكثر من مره أغلى الوكاله

حبيت اضيف فائدة للموضوع

انتبه من القطعة المشتراه من التشليح انها أصليه

أحيانا تكون السيارة المصدومة بها قطع تجارية مثل الهوبات والشمعات والاصطبات

مرة اشتريت كبوت لسيارتي ورحت للورشة قال السمكري الكبوت تجاري ورجعته واخذت اصلي

أذا جيت تبي قطعه غيار من التشليح وعطاك سعر اعلى من الوكاله او قريب 
اعرف انه شبعاااااان وموبحاجة البيع 
قبل كم سنه احد الزملاء معه باترول يبي يبيعه تشليح دخلنا اكثر من تشليح مليان من الباترول
نقول تشرونه يقول هاااااه نرد عليه الكلمه يقوووول كم سيم نقوله ماسيم سم يقول اي رقم
قليل جدآ مايعطيك وجه تركناهم جينا بعد اكثر من شهر والتشليح ماهي زي اول مليانه من الباترولات
من اول تشليح وهو يسوم وحنا نقول لا قليل الان حنا بمكان القوي مو زي اول بمكان الضعيف ههههه ونروح لاكثر من تشليح كلهم يبيونه بعكس قبل
والمشكله ببعض الناس مايعرف سعر الوكاله لو تقوله سعرها بالوكاله راح يبدأ يتعذر وينزل 
لكن على طول يستغل جهل الزبون ويبيع بسعر الوكاااله

تشليح بريمان جدة محتكرينه سوادنه نصابين انا لا اعمم على باقي السودانيين.. لكن من لايصدقني يروح ويشوف اسعارهم واخلاقهم السيئة

صبها احقنها والرياض كلها سودانيه ونصابين اقسم بالله حراميه ولا يخافون الله قلوبهم سوداء


اهم شي قبل تطلع من التشليح ومعاك قطعه خذ الضمان الفاتوره لاتضيعها يمكن تكون القطعه عطلانه او مو نفس المديل مره جيتهم نشفو ريقي ابي كمبرسر كامري ٢٠٠٦ وعطاني واحد ارخصهم بطلعت الروح حصلته ب ٣٠٠ ريال ويوم رحت اركبه طلع حق كامري ٢٠٠١

ويوم رجعت لهم استرجع نقودي > ماذا دهاك يا اخ العرب