أضف سؤال أو موضوع جديد          

أوقات شراء السيارات

up 18 down 3
ssv8 1048
قبل 7 سنه و 3 شهر



السلام عليكم ورحمة الله وبركاته 
أسعد الله أوقاتكم يا أعضاء منتدى حراج
أسأل الله لي ولكم المغفرة في الدنيا والآخرة ومن تحبون 


أنا حبيت أطرح الموضوع هذا فقط للنقاش والتذكير ومحاربة جشع التجار

الموضوع ومافيه يا إخوان ، إنه صارت لي قصة قبل لا يبدأ العام الدراسي ، تقريبا بشهر 10 قبل بداية المدارس بإسبوع 
المهم حبيت اشتري فان هيونداي H1 جديد ، ونزلت للمعارض ادور فصادفني معرض عارض حبتين فان ، دخلت عنده وسألت عن سعره 
قالي الفضي ب 97 ألف والكحلي ب 102 ، هنا وقف شعر راسي ، وسألته وش اللي بـ 102 سلامات يالغالي ، قالي الاسبوع الجاي تبدأ الدراسة والموتر مرغوب بالنقل عشان كذا سعره غالي 
وقالي لا تتعب نفسك ، كل المعارض يبيعونه بهالسعر ، واطلع من المعرض واجلس ادور وادور وكلهم نفس الاسعار او قريبه منه . 
ارخص سعر حصلته ب 93 وبرضوا ما إقتنعت ، وطبعًا كلها فل كامل وهذا اللي أبيه أنا . 
وبالصدفة يا إخوان اتصل علي خالي ، ومع السواليف جبتله طاري الفان 
قالي لا تدور ولا تتعب ، انا اعرف واحد بالوعلان وابرسلك له قلت ما تقصر 
واشغل الموتر واتجه لوكالة الوعلان ، واقابل خوي خالي وسألني عن المواصفات واللون ، وأعطيه كل المعلومات 
قالي فيه دفعه بالميناء راح توصل بعد اربع ايام تصبر والا لا ، قلتله انا بإنتظارك 
حجزت عنده وطلعت . 
اتصل علي بعد 5 ايام وقبل الدراسة بيومين قالي موترك وصل تعال خذه 
رحت للوكالة وخلصت الاوراق وطلعت الموتر . 

تدرون بكم أخذته ، والله ما تتوقعون ؟! 

سعره الاساسي بالوكالة فل كامل ب 83 ألف 
ومع النشبه والمسايس ههههههههههه
طلعته ب 78 ألف جاهز 

تخيلوا من 102 او 97 ألف لين 78 ألف ونفس اللي بالمعارض فل كامل ومن الوكالة طلعته 


المقصد من طرح السالفة يا إخوان 
بعض السيارات لها مواسم معينه ، مثل الفانات والجيوب
وأصحاب المعارض يستغلون هذي المواسم ويطمعون 
تعرفون ليش ؟! 
لأن عندنا شعب جزاه الله خير ما يخطط وشلون يشتري سيارة ، بس ينقز للبنك يأخذ قرض ويروح يدوج هو وخشته ويدفع وهو مفهي
وترا هالكلام ينطبق على الجيوب وقت الشتاء ومثل هالوقت هذا بالذات 


تكفون يا إخوان ترا السالفة بسيطه وما تستاهل التفكير 
كل الموضوع إنك تصبر شوي لين ينزل سعره أو تخطط انك تشتريه بدري قبل يرتفع سعره وبس 
يكفينا جشع التجار ، يكفينا المبالغ الخيالية اللي يزيدونها علينا


تراي أنصحكم وأنا أردى منكم ، لكن أبي لكم الخير يا إخوان 

ومشكورين مقدمًا على مروركم العطر لموضوعي 
تحياتي لكم ، اخوكم ssv8 







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


ما شاء الله وسعودي بس ما قصر خالك ويستاهل 2000 ريال او 17000 يال وفر عليك 
واذكر واحد من جماعتنا شغال عند ابو جميل  وكل سنة مسموح له يشتري سيارة تخيل اشترى اف جي بـ بميه الف 100 الف
وباعه بمكسب وقدره 
ورجال ما يقصر حتى كم واحد راح له واشترى منه بس الظاهر الحين طلعه بعثة يكمل 
وبخصوص  الاسعار وقت الحج والدراسة تترفع الاسعار
الدينا المرغوبة نزل سعرها اكثر من 18 الف ريال والسبب بعد تصحيح اوضاع العمالة  والى الان موديل 2013 فيه وولاانباع


up 1 down 1
صوت العزاوي 523
قبل 7 سنه و 3 شهر



صادق حتى الدبابات في الشتاء ترتفع أسعارها 


up 7 down 1
jooker111 115
قبل 7 سنه و 3 شهر



السلام عليكم ورحمة الله وبركاته   صحيح كل موتر له مواسم   بس يرفعون السعر شوي موب 17الف دق على وزارت التجاره     واشتك    بتوفيق انشاء الله  


up 2 down 0
رجل اصيل 56
قبل 7 سنه و 3 شهر



صدقت ياخوي وانا قبل حوالي سنتين كنت ناوي علی يوكن من 2006 وتحت طبعا كان الكلام هذا بنهاية شهر 8 وبداية رمضان والله يارجال اني انهبلت دورت بالموقع وبمعارض والشرقية اسعار فلكية واكثرها مرشوشة وخرابات وشريطية ونصب واحتيال من اكثرهم وخاصة بعص اهل اللحية اللي مسويها ديكور وهو ما يعرف الدين واحد تقابلت انا وياه من موقع حراج قال السيارة مشروطه ومطوع وطلعت فيها بلاوي حتی طرمبة الزيت خربانة وفي السرقية لقيت 2006 ماشي اعتقد حول 20000 الف كيلو ومحدود 120000 والله لو كان يتكلم ما اخذته غير الاجانب اللي اكثرهم نصابين وتلميع بهالسيارات وهي مدمورة والحمد اخذت ماركيز من صالة الدوحة والحمد لله خيرة 
مشكور اخوي علی التنبيه
+1


up 2 down 1
ابوخلوودي1 5070
قبل 7 سنه و 3 شهر



الله المستعان

طيب يالغالي والسؤال للجميع لاهنتم ودي اشتري تيدا 2014 وحصلت له اعلان ب 43500 للون الابيض وب 41500 الالوان الاخرى وش رايكم سعرها مناسب وهل الوقت مناسب مع العلم ان واحد ذكر لي انه محصلهن خارج الموقع ب36000


up 2 down 0
just you2014 253
قبل 7 سنه و 3 شهر



شف يالغالي ، انا بعطيك نصيحه ، بحالة إنك راح تشتري سيارة جديدة ، إنزل للسوق بنفسك وشوف الأسعار لأني مثل ما ذكرت بعض المعارض يرفع قيمتها ، واذا اخذت فكرة عن اسعار السيارة ، شوف افضل سعر وإستخير وإشتري ، حتى لون السيارة هذا راجع لذوقك ، نصيحتي انزل وإسأل وشوف وبتحصل فايدة لنفسك وأسعار حلوه 



وشكرًا على ردود الجميع +


up 1 down 0
ssv8 1048
قبل 7 سنه و 3 شهر



مشكور على النصيحه +1 لايك للجميع


up 1 down 1
Abu-Nawaf 337
قبل 7 سنه و 3 شهر



وذحين جيوب الربع والشاصات والهايلوكسات يرتفع اسعارها وبكل تاكيد 

لان برد وطلعات وكشتات 


up 0 down 1
do8sh 208
قبل 7 سنه و 3 شهر



حتى بالموقع هنا نصابين
قبل فتره يبغون يبيعون مازدا 6 بـ 80 الف وهي بالوكله 66 الف ريال بس ..


up 1 down 0
aazz1989 -22
قبل 7 سنه و 3 شهر



مشكو جزاك الله خير



up 0 down 0
زعيم جده -1
قبل 7 سنه و 2 شهر