رايكم بالازيرا الامريكي2007 وكم تسوى ضروري

150.000 ميل .. تقريبا 241.350 كيلو . 
الموتر ممشاه كثير ، من وجهة نظري تشوف لك موتر غيره .
وبخصوص استفسارك ماعندي خلفية .

             مكينتها 3.8

اخوي نصيحه ابعد عنها وخذلك النترا فل كامل ترى بعض الازيرا في هذي الموديلات فيها عيب مصنعي في الفرامل وجهاز مانع الانغلاق للفرامل واستخير الله قبل كل شئ

الله يسلمك اخوي انا حاليا في امريكا ويا كثر السيارات الرخيصه اشكال والوان الله لا يوفق الي منع الاستيراد 

انا ابغى اعرف القطع الاستهلاكية نفس السعودي والا لا 
زي اقمشة الفرامل و الهوبات و المقصات و المساعدات 

اخوي خذها وتوكل على الله قطعها ماتفرق بشي عن السعودي  انا معي 2006 واخدتها مصدومة وصلحتها وماشاء الله ماعليها كلام  بس اهم شي الاستخارة عشان الله يباركلك فيها اذا كانت خير وتنبسط فيها 

هي ممتازة.. بس فيه نوع مختلف شوي بالقطع يا 3.3 او 3.8 

تأكد من المواضيع و بمنتدى السيارات الكورية(كوريان بيست)

بس الموديل والممشى يعني شوف لك 2009 افضل بس ترى المعارض مزودين اسعارها. اللي 3.3 و 3.8 الليمتيد يوصلونها لين 65 الف ححسب الممشى والنظافة

من ناحية قوة من ناحية رساوة وثبات بالخط وتماسك الديكورات خذها على يمينك بتعجبك حيل 

بس شوف لك موديل2009 افضل و اريح. لك

و تراه يتفوق على الموديل الجديد بالرساووة  و قوة البدي والمكينة 

لا تاخذ الا امريكي و 3.3. او 3.8 و استخير وافحص قبلها من الاوتوشيك وكارفاكس و موفق ان شاءالله

اكتب السعر علشان يفيدونك هل هو مناسب مع الممشي ومع امكانية توفر القطع 

٢٨٠٠٠ ريال بس انا خايف من الامريكي يكون فيه فرق بالقطع
اللي عنده امريكي او استخدم نفس السياره امريكي 
ياليت يفيدنا وشكرا 
الكل +١

اكتب ب قوقل منتدى السيارات الكورية وتلقى فيه ككككل العلم الاكيد عشان تتطمن

طيب انا حصلت 2007 ومواصفاتها ليمتيد 
ايش رايك ؟ محتااااار

ممشاها واجد اذا تبيها استخدام ما تنفع صراحه يعني يمكن سنه ونص الا هي واصلة 300 وماعاد تنفع ابد 

والمكينة اللي حجمها 3.8 قطعها اغلى ونادرة نوعا ما لان السعودي من هالفئة نزل منه دفعه بسيطة عكس المكينة الاصغر اللي هي 3.3 

انا اتمنى انك تاخذ اقل ممشى لكن سعرها مناسب اذا كانت نظيفه وخالية من الصدوم

اللي ميزانيته محدودة لايدور غير الفورد 

شف الاختلافات اللي ممكن تقابلك عشان تكون في الصورة مثلن ممكن حساس الشكمان انا كانت معي سوناتا امريكية 2006 اربعة سلندر
يجي فيها حساسين شكمان بينما السعودية واحد ويختلف الحساس

وايضا كانت تختلف صفاية البنزين وركبت لها حقت الالنترا
بس اما باقي القطع نفس بعض

وثانيا الازيرا 3.8 مكينتها نفس مكينة الاوبريس من 2007 الى 2009 وانا امتلك اوبريس 2009 ولله الحمد ماصادفتني اي مشاكل في المكينة تذكر


وبالنسبة للمشى اشوفه طبيعي جدا وشوي بعد على موديلها تراها 2006 الحين اغلب ال 2006 كلها من 280 الف وطالع ممشاها وبعدين اهم ماعليك نظافة المكينة يااما مواتر واجد ماشيه 300 الف ولا فيها الا العافية وغيرها ماشي 200 وتلقاها تدخن

انا من رايي افحص ثم افحص قبل كل شي اذا بديها نظيف يعني مهب شرط وكالة مثلن رشة خفيفة في الرفرف مايخالف وداخليها نظيف وكل شي شغال فيها وحساساتها مافيها اي مشاكل وقيرها ومكينتها نظيفة انا اقول لك توكل


الازيرا الموديل هاذا موتر عليه الكلام

تقبل مروري

ياطويل العمر انا كان معي ازيرا 2007 امريكيه مكينتها 3.8 عزم مجنون وراحه تاااامه على الخطوط ويصفق طبلونها 255 
المواتر ماتصف معها على الخط وقطع غيارها نفس السعودي ماعليك من اللي يتفلسف وهو ماجربها والله اني ندمان على بيعها وانا بعتها
لأني راعي بر والحين معي جمس لكني اعشق هذي السياره لأنها فعلا خدومه وحمار مكده لكن اذا جيت تبيعها بتتعب لأن الحوج مايحبون الا السعودي
مدري ليش مع انها مواصفاتها اطلق بمليون مره من السعودي
توكل على الله وافحص البدي اهم شي وسعرها مايتعدى 35 الف اذا هي نظيييفه ومبروك مقدماً 

ان شاء الله اني بشتريها 
فذي اليومين 
والله يعطيكم العافية ماقصرتوا 
لايك للكل