تغيير فيوز محترق ب500 ريال والله يستاهل ابو بكس

42 8

لايمكنك التصويت حتى الحصول على 20 نقطة على الأقل
إضغط هنا للإخفاء

شاقح بن مشقوح الشقيحاني 22707
قبل 9 سنه و 5 شهر

السلام عليكم
شدكم العنوان صحيح هههههههههههه
هي قصه صارتلي وانا فعلا بعد ماغير فيوز محترق عطيته 500 ريال وانا مقتنع 
ادري وش بتقولون مهبول ولا اهبل  
بس اسمعو السالفه بعدين عطوني رايكم

كنت في صلاله البهيه ومن جمال الطبيعه شفت الخضار والدنيا والانهار
لكن الناس ماينزلون هالمناطق فمن جهلي انا نزلت بالفورد
تصورت لين شبعت ويوم جيت امشي الا السياره مكانك سر !

قدام ورا ماهي راضيه تتحرك 
نزلت وكانت المصيبه ان النبات ارتفاعه يقارب الى 5 سنتي تقريبا وعليها الندى والارض تحت طين لينه
مع العشب المبلل والطين الكفرات صارت تدو مكانها ومافي امل تمشي السياره اخذت وضع زحلطنننننن

جاني عماني معاه اف جي نزل وكان يمشي بس بعد ماربطني وحاول يسحب ماقدر الارضيه ماتساعد
اضضطرينا نجيب حبل اطول شوي عشان الجيب كفرتين الاماميه على ارض ناشفه اقل شي


مع السحب السياره خبطت فحجر من تحت وطنشت الوضع مصار شي
بعد ماجيت بمشي الا السياره ثقييييييله مره وماتبدل نمر ومعلقه على النمره الاولى وتفصل ويفضي 
ايقنت ان القير خبط بس مو معقوله عشان الكرتير تحت ضرب فحجر !!
تعطل القير وانا في اخر الدنيا وش يرجعني الحين والنفسيه قفلت ابوها من طلعه

يمكن الفلتر طاح ؟
طيب خلنا نشوف الصناعيه نفك الكرتير ونعدل الطعجه يمكن الفلتر طاح مع الخبطه
الصناعيه فمنطقه اسمها ( تمريت ) بعيده شوي وحر مو مثل صلاله
وياللاسف
كل مارحت لواحد قلي السياره مانعرف لها 
وبالقوه وبالشحاده لقيت واحد قال اخذ حق تعبي حتى لو ماصلحت سيارتك ولو خربت اكثر انا مالي علاقه
قلت مو مشكله انا بعلمك شلون تفك وتركب والله لو انها بانوراما 

فكينا الكرتير وعدلنا الطعجه ولقينا الفلتر ثابت وركبنا الكارتير ورجعنا الزيت ورجعنا نجرب
ونفس المشكله

رجعت ادور فالنصاعيه ياعالم فحص شيكو مافي امل والاغلب يقولي وش نوع السياره 
قلت يازين تويوتا فكل مكان معروفه
المهم رحت لراعين السطحات عشان ننقل السياره للامارات والمسافه تقريبا توصل 1600 كيلو
مالقيت الا سطحه وحده راعيها يمني وقلي ب 650 ريال عماني يعني تقريبا 6500 ريال سعودي

قلت يارجل وين حنا تبي تستغلني عشاني سعودي يعني ومنجبر عليك
قال هذا الموجود تبي مشينا ماتبي شوف غيري ؟  هو فيه غيرك اصلا

قلت امري لله حمل السياره خلنا نروح الامارات هناك فيه امريكي عندهم واعرف كم واحد قدني كلمته

رجع اليمني قال مو الحين اجيك المغرب ؟
قلت يعني بعد ما اتفقنا تبي تلطعني للمغرب تحت الشمس 
قال الحين مافيني امشي واخذت رقمي وقلت بروح اريح لعلها خيره  والمغرب نمشي

رجعت امشي بالسياره قلت خلني ارجع للكهربائيين فيه كم واحد مارحت له والاغلب مريتهم
رحت لواحد قلت ممكن تسوي فحص كهرب كامل فيوزات ؟

قال طيب انته مافيه يروح عند محل ثاني كله هذا مايسوي فحص
قلت ايه كله كلام هذا امريكي مايعرف

المهم جاب جهاز الفحص وهو يفحص لقي فيوز محروق وغيره 
رحت جربت السياره اشوف القير رجع ميه ميه  !!
احييييييييييي ه مو معقوووله
وارجع ادعس للموتر واسرع قسم بالله رجع مثل الورده
رجعت مره ثانيه للكهربائي وقلت رجع فيوز محروق وهو مستغرب
رجعته واشغل وامشي الا القير ماعاد يعشق ويفصل ويفضي
رجعت الفيوز الجديد القير رجع بحالته الاصليه 

قسم بالله من الفرحه ماصدقت خبر
طابت النفسيه والله فكني من راعي السطحه ابو 6500 
والحين اقدر ارجع صلاله اكمل التمشيه مو مصدق 
والباكستاني مايدري وش الهرجه
قلت قسم بالله لعطيك 50 يال عماني = 500 ريال سعودي
الرجال ماصدق من الفرحه يحسبني امزح معاه
عطيته الفلوس وقلت ابي صوره تذكاريه 


اصحابه اللي جنبه تجمعوا حولينه واحس انهم حسدوه 
طيب ياسرابيت جيتكم انا قبل كذا وقلتوا الامريكي مانعرف له ومحد فيكم يفحص على الاقل 


لكن الله كتبها له من نصيبه هالباكستاني والله انه يستاهل
ياني شلت هم ماهو بطيعي 
6500 وبرجع فسطحه وبمشي على مهلي متى اوصل
ارجع الامارات اغير قير هناك وارجع السعوديه وانا مطفر وابوها من طلعه

دام الله فرجها علي خله ياخذ ال 500 اهون من ال 6500 وتغيير قير فالامارات ورجوعي السعوديه خايب مفلسع مطفر

لو م الله ثم هالباكستاني كانت تكبدت خسائر ورجعت السعوديه بحال مايعلم بها غير الله
فالاخير قلت ياشيخ
لازم سوي صوره وصورته ولحد الان محتفظ فالصوره وهذي صورته وهو ماسك ال 50 ريال عماني والفيوز ويضحك

رجعت صلاله والنفس مبسوطه بعد ماقفلت
وقريب المغرب اتصل علي راعي السطحه واقسم بالله اني نسيته
قلي وين انت
قلت انت من
قال انا راعي السطحه
قلت اييييييييييييييييه الله جابك

انا اشكرك انك قلت لي نمشي على المغرب مو الحين
كل تاخيره فيها خيره
والخيره جات من ربك انك اخرتني 
وبسببها طلعت المشكله من فيوز والله فكني منك حسبي الله عليك تستغل السياح فهذي المواقف
اشتغل شغلك بس مو بهذي المبالغ الكبيره عارف اننا مجبورين ندفع

السياره صلحتها والحمدلله والله لايردها 500 ريال ولا 6500

اترككم مع صور الباكستاني


ابوك يالفورد عشان فيوز تعطل القير !

إبلاغ

الردود