ما رأيكم في سيارة سبيس واجن 2004 ؟

لو تشوف لك جمس او هونداي h1 او اودسي هوندا 
افضل واريح لك 
وفالك الرزق باذن الرحمن 

^ هذا اللي قدرت عليه حالياً وانا خوك وربك كريم يرزقنا ب اللي احسن منه 

انا خويي عنده مثلها وكل يوم كارفها ولا خربت،،،،،ومكيفها بااااااارد حتى في عز الظهر

افحصها وشوف اذا نظيفه توكل على الله

ما تنفع من ناحيه القطع 
شوف عندك فرخ شبح بقسعلى الاقل قطعه متوفره

انا اشوفها منتشرة وبكثرة في جدة لكن ما اعلم عن خراباتها 

بس لو انها حقت خرابات ما راح تكون منتشرة مع العائلات الوسط والصغيرة الحجم

اخوي الغالي،

انا لما كنت بالثانوية قبل 12 سنة تقريباً كنت اشتغل صيفي في العيسائي متسوبيشي الخبر. جيتهم 3 صيفيات متتالية و من ضمن الاقسام اللي اشتغلت فيها الورشة

سبيس واجن حسب ملاحظتي كانت من السيارات اللي قليل اشوفها بالصيانة وان جات تجي لغيار زيت او فحمات او سيور (الامور الاستهلاكية). الكلام هذا عام 2002 و2003 و 2004 واحنا الحين في 2014 يعني العمر يفرق.


جودة الصناعة عالية لكن يبقى تتأكد من جودة الاستخدام وجودة الصيانة. المتسوبيشي قطعه محتكرة وغالية واقولها لك وانا معي جيب متسوبيشي اشتري القطع وانساها.

تحتاج بنفسك تفحص السيارة وتتأكد من تاريخ الصيانة:
- فحص المكينة وكفاءتها (ضغط البساتم، جودة الاحتراق)
- فحص تبديلات القير والكلتش
- التأكد من تغيير سير التوقيت او سير التيمن Timing Belt
- التاكد من سلامة علبة الباور و السيور
- التاكد من عمل الكمبرسر وراقب تبريده ولاحظ اي اصوات تكتكة غريبة ممكن تدل على قرب انتهاء عمره
- فحص اسفل السيارة (العكوس، الاذرعة، الجلد، المقصات) والتأكد انه مافيه خدوش او حكات عميقة تدل على ضربات او سوء استخدام. افحص وتأكد انه ما فيه تهريبات من الكارتير او الصوف
- فحص نظام الكهرباء (الدينمو مثلاً او اي اضافات تسبب حمل كهرباء زي التمديدات الكهربائية للسماعات الاضافية مثلا او الزنون اذا كان مضاف)
- سوق السيارة بنفسك ولاحظ اي صوت ونة من اي جهة كفر ممكن تدل على مشكلة بالرمان


الله يكتب لك مافيه الخير ويرزقك من واسع فضله ياكريم،

كلام المشرط ما نزيد عليه 

وأيضاً اذهب لوكالة ميتسوبيشي واسأل عن قطعها ومدى توفرها

واذا كان سعرها مناسب توكل على الله واشتر ، والله أعلم . 

اخوي المشرط / 
انشهد انك كفيت ووفيت انت وباقي الاعضاء جزاكم الله خير ..
السيارة ماشاء الله تبارك الرحمن نظيفة دخلتها الفحص طلع فيها شطب في الاسطب الخلفي والقزازة الامامية و تنسيم خفيف في الشكمان .. 
وتم اصلاحها ولله الحم والان متوكلين على الله سبحانه وتعالى والله يكتب مافيه الخير ..


ب النسبة سير التيمن Timing Belt .. كل كم  اغيره ..؟
كثيرين قالوا لي لا يخرب عليك راقبها اول بأول .. لانه يعدم المكينة اذا انقطع فجأة لانه بلاستيك ومايحتمل ولازم اول بأول مرآجعته 



وش رأيك .؟

سير التوقيت او التيمن يتغير بصيانة 90 ألف كيلو. السير طال عمرك إما يكون حديد (جنزير) وهذا النوع ما يتغير، وإما يكون جلد له زي الاسنان (مستطيلات) بالجهة الداخلية منه وهذا النوع يتغير كل 90 الى 100 الف كيلو.

اذا كان جلد (وهذا اغلب الظن لنوع سيارتك) فتحتاج تغير السير وتتأكد من حالة الشدادات حقته مع اني افضل انك تغيرهم لانهم غالباً يكونون مستهلكين كل 100 الف الا ما ندر.

اذا السيارة مثلاً ماشية 110 الاف فالمفروض قد تغير سيرها مره وحده، و 200 الف يكون تغير مرتين من قبل وهكذا.

اذا راعيها ما غير سيرها الى الان فالافضل انك تبادر بتغييره لانه ان انقطع لا قدر الله بيعدم جزء لا يستهان به في مكينة السيارة.


الله يوفقك يا رب،

^ ويوفقك آخوي آلمشرط .. مآقصرت كفيت ووفيت وربي يسعدك دنيا وآخره

سير التأيمن اذا قطع في الكامري 2002 وكذلك الهوندا اكورد ، لا تتأثر المكينة ، المتسوبيشي يضرب عليك البلوف .