تجربتي لشراء قطعة غيار من تاجر في Haraj وتاجر في Amazon

32 20

لايمكنك التصويت حتى الحصول على 20 نقطة على الأقل
إضغط هنا للإخفاء

وليد م ع الدخيِّل 490
قبل 10 سنه

بسم الله الرحمن الرحيم


أشكر كل من يدعمني بالمنتدى وتعجبه مشاركاتي أو مواضيعي.. أشكركم كل الشكر يا إخوة :)





>>> تحذير من غسيل البستم لغير إزالة بقعة زيت <<<


قبل أشهر غسلت سيارتي (لومينا) بستم من الأسفل، وقلت للعامل ركّز تنظيفك على الزيوت فقط يعني المكينة والقير والدفرنس فقط.
لاقيته راش ديزل على كل أسفل السيارة، ونشفت الجلد كلها وطار الشحم اللي عليها، فصارت السيارة تطلع أنواع الأصوات مع كل حركة لها.

وصارت لي مرة ثانية بالونيت، طلبت رش المكية بشوية موية بس.
تركتهم ثواني ورجعت لاقيته يرش الديزل على المكينة !!!! وقفته مباشرة ولكن لقيت لصقتين أو ثلاث اللي تكون ملصقة على أجزاء المكينة لاقيتها طايرة وضايعة.


نرجع للومينا.

رحت لعدد من الورش أبيهم يشحمونها رفضوا قالوا ما تتشحم.
بلى تتشحم!
كل الموضوع فكها ونظفها وشحمها وركبها من جديد !!


(ملاحظة: بعد تركيب كل الجلد لم يذهب الصوت وبقي، واكتشف أحد الميكانيكيين أن مصدره المساعدات الخلفية التجارية التعبانة المتفقعة).


قررت أشتري جلد جديدة وتذكرت إعلان منتشر في كل أقسام حراج ومستعمل ومعروف يبيع جلد أمريكية قوية جداً وماركة معروفة (إنيرجي سسبنشن).

كلمته واتساب وطلبت الجلد وهي (جلد أعمدة توازن ومقصات خلفية) السعر: 250 جلد أعمدة توازن خلفية + 450 جلد مقصات خلفية = 700 ريال والتوصيل مجاني مع أرامكس.

حولت له الفلوس.

أسبوع تقريباً أو أقل وصلتني جلد أعمدة التوازن فقط.
وصلتني بتغليف في كيسة أرامكس فقط والكرتون متعفط وفيه شوي تشقق.
فتحت العلبة لاقيت الجلد سوداء مو حمراء.

كلمته قلت ليش ما أرسلت حمراء؟
قال ما قلت أنت إنك تبي حمراء بس وما تبي سوداء!!!
يا سلام.
وأنا الجملة اللي قلتها (أبي نفس النوعية القوية الحمراء)، بس هالجملة ما تكفي، يبيني أقول (أبي الجلد لون أحمر بس ما أبي سوداء)!!

ثم قال وش تبي بالحمراء؟
الفحص الدوري يرسب السيارة اللي جلدها حمراء (تعتبر معدلّة)، وعند البيع ما يبيها أحد لأنها (تعتبر معدلّة أيضاً)!!!

طرحت موضوع هنا أسأل عن الفحص وأجابوني الشباب بأن كلامه فاظي ويبي يصرف عليك بضاعة ما تمشي.
http://montada.haraj.com.sa/42663
ورحت بنفسي للفحص الدوري وسألتهم، وقالوا اللون ما يؤثر على نجاح السيارة اللي يؤثر سلامتها، حط أي لون تبيه ولكن تكون سليمة ما انتهت وتقطعت.


وهنا عرفت إنه كذب علي واستغلني.
بحثت عنها في أمازون لاقيتها نفسها بـ 16 دولار يعني تقريباً 60 ريال فقط، قلت ممتاز وهذا سبب ثاني لترجيعها لهم.

كلمته وقلت له أبرجعها لكم.
الحمد لله ما رفض أو قال لا أو كلام ماله داعي، بالعكس كلامه زين وأسلوبه رائع وتعامله ممتاز، وأشكره على هالشي.


سالفة ترجيعها طويلة جلست 3 شهور، وبالأخير الحمد لله استرجعت فلوسي كلها الـ 700.


فرفرت بمحلات قطع الغيار أدور طقم كامل جلد أعمدة توازن ما حصلت نهائياً حتى بالوكالة، حصلت بس قطعة وحدة اللي نصف دائرية ورخيصة جداً بـ 10 أو 15 ريال أصلية GM.


قلت مالي إلا أمازون.

طلعت لي فيزا وبحثت عن أفضل وأرخص طريقة للشراء من أمازون والخارج بشكل عام، ولاقيت اللي أبيه.

عندي عضوية في أمازون، وسجلت بموقع أرامكس تسوُّق وشحن Shop and ship ومسوين خصم على التسجيل 10 دولار بس بدل 40 دولار.
دفعتها مرتين بدون قصد وكلمتهم وما بعد رجعوها لي. هين أوريكم.


يوم خلصت مسجل، فتحوا لي مو بس صندوق بريد في أمريكا وبريطانيا - هي اللي أبيها - لا، لاقيتهم فتحوا لي 13 صندوق بريد في 13 دولة !!
أمريكا، بريطانيا، الصين، الإمارات، تركيا، الهند، هونج كونج، جنوب أفريقيا، ألمانيا، إيطاليا، أسبانيا، فرنسا، سنقافورا.
ولكن للأسف استراليا مو من ضمنها.


بسم الله وطلبت جلد أعمدة التوازن الخلفية بـ 59.04 ريال + 33.48 ريال شحن لصندوق البريد = 92.52 ريال.

عشرة أيام فقط ووصلتني لباب بيتي، وأرامكس حق توصيلها من صندوق البريد في أمريكا لحد باب بيتي 68 ريال.

يكون الناتج كله = 160.52 ريال فقط، أقل بـ 89.48 ريال من التاجر اللي يبيعها هنا.

ووصلتني بحالتها جديدة كأنها الآن طلعت من المصنع، مغلفة في كرتون واسع بإحكام، وفي الكرتون حصلت كرت اللي بايعني إياها الأمريكي هههه



الشي الثاني تركيب هالجلد وجلد المقصات، سألته التاجر اللي بحراج ومستعمل تركبونها وبكم، قال أكيد نركبها بـ 800 ريال، رحت لورشة قريبة من بيتنا وقفت السيارة عندهم ورحت للبيت رجليه ورجعت لهم رجليه وخلال 4 ساعات خلصوها وطلبوا 550 ريال.


والحكم لكم.

إبلاغ

الردود