أضف سؤال أو موضوع جديد          

انظلمت وللحين منقهر ...

up 39 down 3
ssv8 1048
قبل 7 سنه و 7 شهر



السلام عليكم ورحمة الله وبركاته 
أسعد الله أوقاتكم يا أعضاء منتدى حراج ، أتمنى من كل قلبي إنكم بخير ، ومثل ما ربي جمعنا في هالمنتدى الحلو ، الله يجمعنا في الجنه بجوار النبي محمد صلّى الله عليه وسلم . 

أنا الصراحة مبطي عن المنتدى بسبب الجامعة وحوسة الإمتحانات ، دعواتكم أتخرج وأفتك 
حبيت أطرح لكم هالقصه ، وهي الصراحة غبنه بقوووه وللحين أنا منقهر لكن الحمد لله على كل حال وراضي باللي ربي كتبه لي 

هالقصه صارت لي تقريبًا قبل 7 سنوات ، كنت بثاني ثانوي ، كان يوم إربعاء ومثل ما تعرفون أي سعودي يفرح بيوم الإربعاء ومستحيل يجلس بالبيت
المهم بذاك اليوم صليت العشاء وطلعت من المسجد رايح لإخوياي ، كنت أمشي بشارع سيدين وكان قدامي تقاطع ، هديت السرعه لأني بأخذ فوق تحت ( يوتيرن )  ، المهم يوم وقفت عند التقاطع كانت فيه سياره جايه من بعيد وكان فيه مطب قدامها ، يعني يمديني أخذ فوق تحت قبل ما يجي ، المهم أخذت فوق تحت (يوتيرن ) ومسكت المسار الأيمن ، وأشوف المرايه من ورا إلا راعي السياره توه متعدي المطب ، يوم تعدا المطب دعس للموتر عشان يدرفت ( يفحط )  ، راحت سيارته يمين ويسار وفجأة بلمحة بصر صدمني مع ورا ، وقفت انا موتري ونزلت وهو نزل بعد جلست اشوف موتري والحمد لله ما جاه شيء ابد وأشوف موتره إلا موتره منعدم ، على فكرة أنا معي نيسان باترول 98 وكنت مركب هوك ورا واللي صدمني معه ماركيز ، وراعي الماركيز وجهية موتره دخلت كلها في الهوك عشان كذا موتري ما جاه شيء ولا حتّى مخش واحد وراعي الماركيز وجهيته راحت كلها وموية الرديتر تصب بقوه ، المهم سلمت عليه وقلتله سلامات ما تشوف شرّ ، ما رد علي راح للموتر وركبه وجاب جواله وجاء قلتله دق على المرور ، وقتها عاد ما كان فيه نجم ، اتصل هو المرور بعدين دق على أخوياه ، وبعشر دقايق جاء موترين كلهم أخوياه ، انا جلست انتظر في السياره ، بعد ساعة من الطفش وصل المرور ، جاء عندي العسكري وقالي اثباتك ورخصتك والاستماره ، طلعتهم وعطيتهم العسكري ، راح لراعي الماركيز قاله عطني اوراقك قاله مامعي شيء قاله اثباتك اي شيء قال ما معي شيء سأله العسكري كم عمرك قال 16 ، المهم سألنا العسكري وقال اشرحوا الحادث ، شرحت له كل شيء والبزر راعي الماركيز شرحله . 

راح العسكري للدورية ، جلس شوي ونادانا قالنا الغلط عليك يا راعي الماركيز وزيادة على كذا ما معك حتّى بطاقة أحوال ، الزبده دق جوال البزر راعي الماركيز ورد عليه ، قال للعسكري هذا ابوي يبي يكلمك ، أخذ الجوال العسكري وبدأ يسولف مع إبو البزر راعي الماركيز بعدين راح للدورية يكمل كلامه بالجوال ، جلس 10 دقايق بعدين جاء وعطى البزر جواله ، وسألنا مرّه ثانيه اشرحوا لي كيف الحادث ، شرحنا له الحادث بعدين قال الغلط عليك انت يا راعي الباترول ، انت اللي خاش عليه وخليته يفقد السيطرة على موتره ، قلتله يابن الحلال هو اصلن كان يفحط ورح شف الزفلت عليه أثر الكفرات وبعدين يوم أخذت فوق تحت كان موتره بعيد شوي قبل المطب ، قالي مالي دخل الغلط عليك انت ، المهم أخذت جوالي بدق على إبوي لقيت ما عندي رصيد أقول بنفسي وش هالبلشه بعد ، قلت للعسكري عطني جوالك بدق على ابوي قال ما اقدر اعطيك اياه هذا حق العمل ، رحت للبزر راعي الماركيز قلت له عطني جوالك بدق على ابوي قالي مافيه رصيد ، عاد هنا وقف عقلي مدري وش اسوي ، رجعت للعسكري اشرحله وأحلف له لكن مافيه أمل . 

وصلت السطحة وشالت موتري ، ركبني العسكري في الدورية ، وعلى الحجز وداني وجلست يومين بالحجز من الاربعاء بالليل لين جاء السبت الصباح وطلعوني بعد ما جاء ابوي 
المهم شرحت لبوي كل الموضوع والمشكلة انه صدق اني غلطان ، حلفت له وكل شيء وما زال مصدق تقرير المرور المزور من وجهة نظري 

بعد اسبوع من السالفة اتصل راعي الماركيز وجاب تقدير الاصلاح ويبي 5000 ريال ، عطاه ابوي واخذ ورقة مخالصة من المرور ، وموتري جلس اسبوعين بالحجز وبلعنة جدف طلعته . 




هذي قصتي والظلم اللي واجهته وأكبر لحظات القهر في حياتي 
الصراحة مدري أنا أضحك والا ابكي وانا اشوف حقي يضيع في مكالمة جوال 
من خطأ بنسبة 100٪ على الطرف الثاني ، انقلب وصار الخطأ علي 
والوالد ما قصّر يحسبني جالس أغطي على خطأ سويته أنا 

صدق إذا قالوا حاميها حراميها !!
تخيل بزر ما معه لا بطاقة أحوال ولا رخصة ولا إستماره وصادمك مع ورا وهو يفحط ، وفي مكالمة تليفون أنحجز انا وينحجز موتري وهو يروح ينام مرتاح في بيتهم ولا بعد يأخذ 5000 ريال وهو يضحك 

والله إني ما ادري ادعي عليه وعلى ابوه والا اسامحهم ، غبنه والله غبنه 


على العموم إعذروني اذا طولت عليكم ، حبيت اطرح هالقصه لعل وعسى يخف القهر اللي بقلبي ، صحيح مرّت على السالفة 7 سنين ولكن كل ما اتذكرها انقهر . 



تقبلوا تحياتي ، إخوكم Ssv8 







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


لاحول ولا قوة الا بالله . العوض علي الله ولا تزعل الفلوس تروح وتجي هوو فحط ولا عنده اثبات والعسكري يكافئة بتوقيفك بداله و٥٠٠٠ ريال الحمدلله الرحمة اكيد في قلوبنا كمسلمين واذا بتسامح مالك الا الاجر احمد ربك جت علي ٥٠٠٠ اعتبرها دفعة بلا وانت ماتدري ليه انقلب كل الي لك عليك من مكالمة لعلها دفعة بلا والعسكري والبزر وابوه بياخذون حقهم ولو اقل شي يدفعون ال٥٠٠٠ في علاج اعز ناس لهم او في انفسهم وانت دفعت عنك بلا الله يكفينا وياك غبنة الرجال وقهرهم


up 1 down 0
meshal-ss 25
قبل 7 سنه و 7 شهر



صدق شيء يقهر
يمكن تكون دفعه بلاء عنك ، لو ذاك اليوم مأنحزت يمكن تسوي شيء ماتحسب له حساب
والعسكري اللي باع ذمته وضميره عزالله ماتوفق .


up 1 down 0
ziyad211 48
قبل 7 سنه و 6 شهر