فترة تسخين المحرك

عن نفسي إذا نزل عداد rpm إلى 1000 دوره احرك يعني عشر ثواني إلى 15 ثانيه كيا اوبتيما 2014 

تاكسي اف اي بي راح تخبط معك كذا انت ما سمحت للزيت انه يتوزع 

ولله عن نفسي أنا ما اتحرك الا على حسب امبير الحراره يرتفع للربع مشيت أو مثلا احسب عشر دقايق ونا سيارتي فورد

لكن الموضوع فيه بشكل عام وبشكل خاص يعني
السيارات 8 سلندر او الجيوب والجموس مستحيل انك تدق سلف وتمشي والسيارات الصغيره مثل ريو او اكسنت خمس دقايق في اعتقادي البسيط انها كفايه
وبالنسبه للجو اذا درجات الحراره جدا منخفضه ازيد التحميه من عشر دقايق ل15 دقيقه اذا السياره واقفه لها يوم او اكثر

مثلا عندك السياره وقفتها لمدة مثلا ساعتين ثم طلعت مره ثانيه مايحتاج تحميها كثير يعني مثلا ثلاث دقايق كفايه

وعني انا امبير الحراره مايرتفع بسرعه لكن لما امشي يرتفع للحراره الطبيعيه

طبعا الموضوع بسيط لكن اللي يعقده ان لكل واحد وجهة نظر وممكن اكثركم يعرف الموضوع هذاك اللي يقول مجرد ماتطفى لمبات النظام فالطبلون تقدر تتحرك ويتدرجون الناس الى مثلا يقول مجرد الزيت والبنزين يمشي ويوصل الى محرك السياره إلين توصل لناس يحمون السياره 15 او 20 دقيقه

اعذروني للاطاله لكن كل الكلام هذا ابغى اشرحلكم ان الشغله على حسب مزاج الواحد وعلى حسب تفكيره

ناس تقول لازم تسحن و ناس تقول السيارات الجديدة ما تحتاج تبغا الأكيد شوف كاتلوج السيارة وريح راسك

30 ثانيه فقط

وحرك بتسارع خفيف وفالك المليون كيلو بإذن الله ،،،

جرب اذا قمت من النوم اركض بسرعة !!

السيارة نفس الطريق


عن نفسي اذا السيارة واقفة يوم 10 دقايق الى 15 دقيقة اخليها عشان البرد

واذا كانت واقفة ساعة 3 دقايق تكفي

موضوعك جميل. ...
بالنسبه لي ما ارتاح الين تحمی وعداد الحراره يرتفع بنسبه شوويه ..لو مشيت بسرعه سياره عزمها مش ولا بد وبارده ..فلازم تحمی السياره وامش شووي وسلامتكم

المشي بدون تحمية السياره يعدم جلد البلوف

انا اشوف خصوصا دخلنا وقت الشتاء 
خل الموتر يحتمي 
واذا مستعجل خله شوي وامش لاكن لاتدعس له لين يرتفع انبير الحراره 

انا من ناحيتي ادق سلف وامشي ولا بعد سيارتي فاك بلف الحراره 
وهذي هي ماشيه 300 الف والزيت 20 \ 50 والبنزين 91 ولاتخبيط ولا تبويش ولا شي
اما سالفة جرب انك تقوم من النوم وتركض 
هنا انت تتكلم عن مكينه ودورة زيت مجرد ماتشغل ميكانيكيا طرمبة الزيت تدفع الزيت للمكينه والمسأله ثواني
وبعد عندك القير لايشتغل ولايحتاج تسخين وتعشق وتمشي
للعلم هذي وجهة نظري صحيحه او خطاء الله اعلم

بالنسبة لي تحمية السيارة هي دقيقة ثم امشي بسرعات خفيفة لين يصل امبير الحرارة لوضعه الطبيعي

طبعاً السالفه هي تزييت المحرك مثل ما سمعت وليست تحمية المحرك ، 

حسن كتبي - شفت له فيديو يقول الكلام هذا ولكن حذر من شيء

هو أول انك ما تشغل السياره تخليها 30 ثانيه وتمشي بسرعات خفيفه وحذر من الحراره المفاجئه
يعني بعد الثلاثين ثانيه هذي تضغط المكينه وتقاوم
امشي على مهلك الى ما يجي عداد الحراره الى وضعه الطبيعي 

بالنسبه اللي يقول اول ما تصحى تركض ، انا اعتقد الكلام هذا خاطئ ولا ينطبق على الأشياء الميكانيكيه هذا حديد مو ادمي يعرف ويحس

حتى اللي يقول عشان القير يتعود على الزيت او المكينه تتعود على الزيت هذا كلام خاطئ من وجهة تظري .. 

بالنسبه لي اجلس دقيقه أو اقل ثلاثين ثانيه وامشي

بالتوفيق

موتري يطلع في شاشة البيانات اللي في الطبلون درجة حرارة زيت المحرك 

طبعا الحراره الطبيعيه تكون بين 60-150 انا اخلي الحراره لين توصل 60 و امشي 

فما ادري طريقتي صح او لا 

اغلب اللي يدمر جلد البلوف ويخلي المواتر تدخن على المدى البعيد ويسبب قرقعه في المكينة هو عدم التحمية الكافية يعني مسألة 15 ثانية وامش وماعليها هذي من ناحيتي سواليف


اوكي هي ماراح تخبط على طول لكن تؤثر على المدى البعيد على اداء المكينة وقوتها ، وهذي مهمة بالنسبة للمستخدم على المدى البعيد وغير مهمة لدى اصحاب الموديلات الحديثة اللي كل 3 سنوات يشتري ويقول ماجاها شي


وانا ايضا ضد التحمية المبالغ فيها يعني اذا كان الموتر له يوم كامل ما اشتغل اعطيه من 3 دقائق الى 5 دقائق وعلى حسب السيارة بعضها تبطي على ماتحمى واذا مشيت وهو بارد ياله يقبل ، وش الله حادني امشي واخرب موتري وكل الدعوة دقيقتين مهيب ضارتني

تقبلوا مروري ، وانا ما اجبر الكل يسوي نفسي ولا اقول رأيي الوحيد هو الصح لكن هذا اللي اشوفه عين العقل يعني الاهمال مرفوض والحرص الزايد غير مطلوب في الامور هذي

بالتوفيق للجميع

هذي المسأله اللي مالقينا لها جواب موحد

لكن الواحد يشغل السياره ويقول اذكاره ويتفقد اغراضه ويضبط المرايا ويتوكل على الله

احلى شي الواحد يشغل موتره قبل ما ينام 

التحميه ضروريه وهي تساعد تفكك جزيئات الزيت لتكون سلسه وماتدمر السبايك والبلوف