ملاحظه شاطحه

كثير من العسكر يأخذ الامور بشكل شخصي
مثلا سياره ما اعجبته يوقفها ويستقعد لراعيها
واحد عاكس الشارع مثلا بدل ما يوقفه ويعطيه مخالفة او التوقيف حسب النظام
تحصله ينافخ عليه شوي ويضربه ويهايط
يعني كثير منهم يحتاجون إعادة تأهيل من جديد

خلك نظامي ماحد له طريق عليك , على قولة المثل  ’ امشي عدل يحتار عدوك فيك ؛

لو العسكري بيستقعدلك و الله لا يكرهك تنزل الشارع كان في راعي دورية في حارتنا كل يوم جمعة يشيلني اشتباه و حاولت اشتكي عليه عند مدير القسم يقلي من حقه يشيلك اشتباه 

صحيح اكثر العسكر لاحظتهم صغار مقارنة بزمان ولكن ما يهم ((احترم تحترم))

احيانا الشخص عشان يطلع نفسه صح ولا سوا غلط يتكلم من طرف واحد ولا يوضح الصورة كاملة
العسكري يشيلك كل جمعه اشتباه وش مسوي
سيارتك سليمه او فيها شيء علمنا القصه كاملة لا تقول وضعي طبيعي ممكن طبيعي بنظرك لكن فعلا شبهه
قولنا قصتك لا هنت

صدقت ي ابو عبدالعزيز سيارتي مصدومه فيها الشنطة و الصدام شوية قوية الصدمه من حقه يشيلني مرة و مرتين و ثلاث لاكن و الله ويشهد الله انها 9 مرات ونفس العسكري يعني مستقعدلي

انا وقفني امس واحد عمره 19 تقريبا الرجال محترم وخايف بعد

الشاهد قايل بفتش السياره

قلت يالله خذ راحتك اذا خلصت علمني

الحمد لله مامعي ممنوعات ولا شي في النهايه قالي معليش عطلناك

الرجال محترم جدا

انتم احتروموا رجال الامن تحترمون

لا ماهو من حقه يشيلك عشان سيارتك فيها صدمه بالشنطه خلاص شالك مره ماهي كل مره يشيلك
انا اقصد مظلل كاتم او تنزيله وزينون وخرابيط يعني شبهه وتغبيرة 
اما صدمة بسيطه ما يشيلك خاصه لو معك ورقة اصلاح

يوم الاربعاء رحت مكه عن طريق الهدا الساعه 3 ظهر
و وقفني عسكري لاني مظلل 
بينما التظليل هذا له سنه
و التظليل قزاز السائق و القزازتين الخلفيتين فقط بينما قزاز المعاون
ماعليه تظليل و عندي تقرير طبي مكتوب فيه اني اعاني من تهيج الوجه
بالحساسيه من تعرض الشمس
و التظليل اخف نوع طبعا
وقفني و طلعت التقرير و اعطيته يشوفه
تخيلو وش قالي " الكذب ما يمشي علينا و واضح انك جايبه تلعب علينا"
وجهي مثل الكوره بدا التهيج .. و كذبني و لما اعطاني المخالفه .. قالي " بل تقريرك و اشرب
مويته"
علما بان العسكري ورع صغير
قلت الله ياخذ عمرك بالساعه المباركه ولا يوفقك ولا يسامحك
و يكسر يدك يوم اني اوريك تقرير طبي وانت تكذبني
بينما كل ما مريت من نقطه عطيته الورقه هذي خلاني امشي
بدون مجادلات

لذلك النظام عندنا يمشي ع الكيف
و الورع الصغير يمشي اللي براسه حتى لو اللي براسه غلط

متى يجي ذاك اليوم اللي اطلع منه من هالبلد الراسمالي 

انا قبل فتره رايح جده مريت في ثلاث نقط تفتيش , النقطه الاول والثانيه يطلبواثبات ويقولك حرررك , اما النقطه الثالثه لقيت فيها عسكري نفسيه موقف سيارتين قدامي وتفتيش كااامل ! لما جاء دوري نفس الشئ قعد يفتش السياره فوق تحت حتى الشنطه نكب اغراضها الله لايوفقه


 

بعض العسكر ما ألومهم أنا إذا وقفك وفتشك في أماكن معينه ، عندك مثلاً طريق الوادي ( وادي الدواسر ) وقفوني وفتشوني ومعهم حق لأن أغلب اللي يمرون من هناك معهم بلاوي ، على فكرة ترا العسكري ما يدري منهو انت ووشي اخلاقك وإلا من اي حمولة ، العسكري جالس يحافظ على أمن ديرته من البلاوي اللي دخلت علينا عسى الله يوفقهم 

اتفق مع الاخ abu_mated

   *طووول منت ماسك اعصابك ولا حد يقدر يكلمك* ههههههههههه

اكثرها ورعان ويجي يناففخ علييك وهو جندي منتف 
واكثرهم عنصريين ولا لان سيارتك قديمة يقول سيارتك شبهه 
خاصه الجموس القديمة والكوابرس  مره راايح لعرعر والمسافة 250 كيلو والله مريت 3 تفتيشات كلهم وقفوني وماخلوني امشي لين مافتشوني وفتشو السيارة ومعي ماء ابو ريالين اخذته زودت به قربة الماء شوي وخليته على المرتبه الا العسكري يفك القاروره ويشمها > حسيت اني مهرب وقتها ' وبعدين بالعقل لو معي شراب ابي اخليه على المرتبه وهم يفتشون سيارتي هههههههه ولا يوم اسألهم اقول التفيتش اللي قبلكم فتشوني يقولون انت سيارتك شبهه سسلامااات (:؟

يلي فوقي أنا نفس سالفتك تفتشت على سيارتي اليارس لون أحمر، فتح الشنطة حصل فوق 20 قارورة صحة، أيام ماكنت أدرس 
أشتري بريال وإذا بقى أعبي مساحات السيارة، ويوم شافها قام ياخذ حبه حبه ويخضها هههههه 

قالي وش تسوي فيها هالعلب؟

قلت إن شربت وبقى أستفيد منها بوقت ثاني أو أغسل السيارة وأعبي مساحاتها ـ إبتسم ـ وسكر الشنطة ومشاني ،،،، 

والله انت كويس يامحمد عمرر

غيرك يحذف العلبه وهو ماشي ميه يشوف متى تصقع بالرصيف وهل تنط للشارع الثاني او لا