أضف سؤال أو موضوع جديد          

قصتي مع خط حرض

up 32 down 3
ssv8 1048
قبل 7 سنه و 5 شهر



السلام عليكم ورحمة الله وبركاته
أسعد الله أيامكم و أوقاتكم يا أعضاء منتدى حراج المحترمين ، أتمنى لكم دوام الصحة والعافية ولمن تحبون يارب ، قبل لا أبدأ كلامي إقرأ هذا الحديث أخي الكريم : 
عَنْ أَنَسِ بْنِ مَالِكَ رَضِيَ اللهُ عَنْهُ، قَالَ: قَالَ رَسُولُ اللَّهِ - صلّ الله عليه وسلم -: " مَنْ صَلَّى عَلَيَّ صَلَاةً وَاحِدَةً، صَلَّى اللَّهُ عَلَيْهِ عَشْرَ صَلَوَاتٍ، وَحُطَّتْ عَنْهُ عَشْرُ خَطِيئَاتٍ، وَرُفِعَتْ لَهُ عَشْرُ دَرَجَاتٍ "[5]. 
اللهم صلّ وسلّم على نبينا محمد 




طبعًا القصة اللي بذكرها لكم ، صارت لي قبل سنة ، بس قبل لا أدخل في القصة أبي أوضح للإخوان اللي ما يعرفون هالطريق { ماهو طريق حرض ؟! } ( هو طريق يبدأ من محافظة الخرج ويقطع شمال الربع الخالي وينتهي عند منفذ البطحاء على حدود الإمارات ، الطريق هذا إهتمت في إنشائه شركة المراعي عشان تختصر المسافه لشاحنات الشركة للوصول لدولة الإمارات ، سيد واحد قديمًا والآن نصفه سيدين والنصف الباقي كما هو ، مسافته 450 كيلو ) مميزات الخط وعيوبه راح اذكرها بالقصة  
 بداية القصة ، كنت راجع من الإمارات أنا وواحد من الشباب ، طبعًا طلعنا من دبي بالليل ودخلنا الحدود السعودية على الفجر ، والحمد لله صلينا الفجر بعد المنفذ ، فـ بعد الصلاة قالي خويي وش رايك نرجع مع حرض خصوصًا إن الشمس بدت تطلع وإن شاء الله مافيه خوف ، قلتله قدام يالله ، فمسكنا خط حرض . 
طبعًا الطريق اذا مسكته من جهة المنفذ يكون سيد واحد ، بس اذا قربت للخرج ينقلب سيدين . 
المهم مسكنا الخط وقهوة وشاهي وسواليف ، نسيت اقولكم وش موترنا ( لكزس ES350 ) موديل 2012  
مالكم بالطويله ، كان خويي هو اللي يسوق الموتر وكان يمشي 180 ، الخط كان فاضي تقريبًا ، فمرتاحين بالخط ، وأنا أسولف مع خويي فجأة شفت المنظر اللي ما يبي أحد يشوفه ، شفت كلب جاي مسرع من برا الخط ويبي يقطعه ، فقلت لخوي إنتبه إنتبه !! 




طبعًا أنا قلت له إنتبه وقفلت عيوني وتمسكت زين ، آخر شيء شفته كان شكل خويي وهو حاط يدينه على الدركسون وشاد يدينه بقوه ، طبعًا أنا تشهدت بيني وبين نفسي وقلت بس خلاص كلها لحظات وتسمع صوت ضربة بعدين صوت كفرات وآخر شيء حادث أليم . 




المهم كل هالافكار طارت من راسي وجالس أنتظر وش بيصير وانا مغمض عيوني ، لحظه وأسمع صوت خويي يقول لا لا لا ، وسمعت بعدها ضربه قويه من ورا ، بعدها هز الموتر شوي بعدين ركد الموتر . 
أنا فتحت عيوني ماني مصدق ، الحمد لله بعد اللي صار أشوف الموتر يمشي بنفس السيد ولا فينا شيء . 




خويي هدأ شوي ووقفنا ، ونزلت بسرعة أسجد سجود شكر ، ورحنا نشوف مكان الضربة . 
طلعت الضربة في الصدام الخلفي عند الزاوية من الجهة اليسرى ، لأن الكلب كان جاي من جهة السواق موب من عندي ، المهم مكان الضربه دخل الصدام شوي . والحمد لله ما فيه شيء ثاني . 
بعد ما شفنا الصدام ، إلتفت لخويي لقيته يرجف من الخوف ، الله يلوم اللي يلومه ، بعذره أول مره نشوف كلب على بدي بعير من كبره ولا بعد يركض لنا ، مسكت خويي وركبته وإستلمت السواقه وجلست منتبه للخط لين وصلنا للرياض والحمد لله . 












سبب طرحي للقصة : 
أتمنى من كل قلبي توصل القصة للشباب وأيضًا منهم أكبر من الشباب خصوصًا اللي يسافرون بعوايلهم . 
أخطار الطرق مالها وقت معين تجيك ، سافرت بالليل او بالنهار ، بس إلتزامك بالسرعة القانونية وإنتباهك للطريق يقلل نسبة وقوع الحوادث بإذن الله . 
وتكفون قد ما تقدرون إبتعدوا عن الخطوط اللي هي سيد واحد ، وإذا مافيه إلا هي توصلك ، فإنتبه ودبّل تركيزك وأنت تسوق فيها 
وبالنسبة لخط حرض لا أنصح أحد بالسفر فيه ، لأنه طريق حاطينه بالمقام الأول للتريلات ، وينقصه وجود المحطات و وجود أمن الطرق وأيضًا الأسعاف اذا حصل شيء لا سمح الله ، وفوق هذا كله ترا هالطريق مليان رمل بسبب الرمال الزاحفه وعادي ينقطع الخط فيك وتدخل بالبر وانت جالس تسوق . 
والطريق البديل له لأهل الرياض هو طريق (سعد) من خط الدمام او من الأحساء . 
الميزه الوحيده لطريق حرض إنه أقرب في المسافه ، ومن وجهة نظري ، طز بقصر المسافه اذا كانت بتاخذ حياتي . 












رسالة إلى وزير النقل : 
خاف ربك فينا ، تشوف الشعب يعاني من الطرق وأنت متبطح في مكتبك ولا شفنا شيء . 
كم عايله راحت وكم شاب وكم بنت ، والله إن القلب يبكي حرقه إذا قرينا في جريدة عن حوادث الطرق وأنت لا تتحرك ولا شيء . 
كم معلمة تركت ولدها وزوجها وراحت في حادث ، كم شاب يسافر عشان يكسب لقمة عيشه ويروح في حادث ، كم بنت طلعت من بيتهم الصباح رايحه للجامعة ولا رجعت . 
والله ثم والله إن ربي سيسألك عنهم ، شمال المملكة كلها طرقها خطره والجنوب برضوا من سنوات ولا سمعنا عن سفلته ، بس نسمع عن الحوادث . 
أرجوا الله ثم أرجوك ، أن توقف نزفنا من تِلك الطرق
















القصة هذي حقيقية وصارت معاي 
تقبلوا تحياتي إخوكم ssv8




وإعذروني إذا طولت عليكم 




ولا تنسوا أن تتمعنوا في هذه الآيه




﴿فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا (١٠) يُرْسِلِ السَّمَاءَ عَلَيْكُمْ مِدْرَارًا (١١) وَيُمْدِدْكُمْ بِأَمْوَالٍ وَبَنِينَ وَيَجْعَلْ لَكُمْ جَنَّاتٍ وَيَجْعَلْ لَكُمْ أَنْهَارًا﴾ سورة نوح [١٠-١٢]




الله يحفظكم 
في أمان الله !!







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


حمدالله على السﻻمه والشخص ينتبه من الطرق الي مومشبكه


up 2 down 0
غلاب المرشدي 63
قبل 7 سنه و 5 شهر



الحمد لله علي السلامه

وان شاء الله دفعه بلاء امر المؤمن كله خير ان اصابته سراء شكر وان اصابته ضراء صبر
 
يمكن وقفتكم خيره ربي ابعد عنكم حادث اعظم 

شكرا لتذكيرنا بالصلاه علي الحبيب وتذكيرنا بالاستغفار


up 2 down 0
االخاالدي 3898
قبل 7 سنه و 5 شهر



الف الحمدلله على سلامتكم 
والكلب ماهو بسيط قبل سنتين اعدملي الصدام من يسار والشمعه
والرفرف والباب انتبهوا الله يسعدكم ولاتقول الخط فاضي وما فيه خوف
يطلعلك كلب ولا قطو الله يكرمكم فالحذر الحذر
وشكرا اخوي على التنبيه وذكر القصه


up 3 down 0
الرفاعي33 13914
قبل 7 سنه و 5 شهر



الحمد لله على سلامتك
وليت توصل الشكاوي لأكبر شخص ممكن يحلها


up 3 down 0
sa7ab 44
قبل 7 سنه و 5 شهر



الحمدلله على السلامه واحسنت ماسويتوا انكم وقفتوا للتاكد بعد الصدمه 


up 1 down 0
abofarah 1080
قبل 7 سنه و 5 شهر



وعليكم السلام

ذكرتني ياخوك بالفورد قبل سنه تقريبا كان معي فكتوريا 95 واول مره اصدم كلب والحمدلله اني صدمة ولد الكلب الي هو الجرو ههههههههههههه☺
والحمدلله الفورد ماجاها شي الله يذكر ايامه بالخير كدت معي خمس سنين تقريبا ☺


up 2 down 1
.. بـدر الـحـمـد .. 249
قبل 7 سنه و 5 شهر



احمد ربك انه كلب وﻻ متقفل مسارك بسبب الرمل يدخل الخط ويقفل المسار للي جاي من المنفذ ورايح للخرج وماعندك اﻻ حلين يا انك تدخل في الردمية وﻻ تدخل في المسار الثاني وهذا الخط يختصر 100 كيلو لكن متعب وماينصح فيه


up 1 down 1
ابوابراهيم ksa 1391
قبل 7 سنه و 5 شهر



وش يحدكم ياناس على الخط الزفت الي اسمه حرض ..!!

صح الفرق 100 كيلو عن الدمام لكن تتاخر نص ساعه لكن تكون مرتاااااااااااح

نصيحة للي بيسافر الامارات يفرق من الهفوف وطوول الطريق 3 مسارات ولا تكسير ولا شي ومن عند قطر تشوف البحر يسارك وتجي تريح عالشاطيء قبل المنفذ وسعة صدر ويخلي حرض للشاحنات او للي مضطر يروح معه


سواء حرض او غيره لا احد يسافر الا بالنهار


up 1 down 0
YASSER505 4174
قبل 7 سنه و 5 شهر



الحمد لله على السلامة و طريق حرض خطير جدا وقديم و دايم يموت فيه ناس خاصه الغير سعوديين اللي هم اهل الخليج
و اسمع ان فيه قطاع طرق بس ما قد شفت قطاع طرق فيه 
و انا ديرتي مهي بعيده عنه


up 2 down 0
5alaf 694
قبل 7 سنه و 5 شهر



اعتقد لو الدوله تاخذ نص ارباح ساهر وتسوي فيها الخطوط كنا بخيير 



up 3 down 0
bmw z4 1500
قبل 7 سنه و 5 شهر



الحمد الله علي السلامة 
+1 


up 1 down 0
توسان 2011 1930
قبل 7 سنه و 5 شهر



طريق هذا جدا سيئ وما انصح فيه نهائيا دايما اروح وارجع مع سلوى سيدين طريق ما يفضى من سيارات .


up 1 down 0
x500 777
قبل 7 سنه و 5 شهر



جيته مره  وكرهت حياتي

نسيبي صار حافض ذاك الطريق من كثر مايروح معه من الشرقيه لنجران 


up 1 down 1
شكلين مابحكي 3159
قبل 7 سنه و 5 شهر



هلا وغلا بالشباب ، مشكورين على ردودكم جزاكم الله خير +1


up 0 down 0
ssv8 1048
قبل 7 سنه و 5 شهر



انا بالخرج صحيح الطريق هذاك تعبان الحين صلحو فيه اشوي بس تغثك بتحويلات اهم شي بنهار طريق ممتاز بس بليل قلق 
انا اذا رحت لشرقيه اروح معه افتك من 100 كيلو وزحمه الرياض 


up 1 down 0
سكودر 14928
قبل 7 سنه و 5 شهر



الله يرحم خويي مات هو وزوجته شهر 11 فيه الله يرحمهم ويغفر لهم ولاموات المسلمين


up 6 down 0
لا حدود 487
قبل 7 سنه و 5 شهر



الله يرحمهم ويرحم موتى المسلمين 


up 1 down 0
سكودر 14928
قبل 7 سنه و 5 شهر



للاسف الطريق لايزال بدون خدمات وخط واحد وزحمه شاحنات 

لا شفنا تعديل وصر طريق مزدوج 

يمكن افضل طريق من حرض الى الخرج فقط مرتب وجميل اخر فتره 

لكن حرض البطحاء يحتاج شغل جبار مع مركز امن الطرق ومحطات بنزين ومركز الاسعاف 

واضافه على ذلك انهى اعمال توسيعه ومع ضرورة حث المقاول السرعه بالانجاز 




up 1 down 0
bo_saleh89 -2
قبل 5 سنه و 11 شهر