مشتريها بدم قلبي

39 4

لايمكنك التصويت حتى الحصول على 20 نقطة على الأقل
إضغط هنا للإخفاء

ssv8 1048
قبل 9 سنه و 11 شهر

السلام عليكم ورحمة الله وبركاته
أسعد الله ايامكم واوقاتكم يا أعضاء منتدى حراج 
اللهم أني أحببتهم فيك ، فأجمعني بهم في جناتك يارب


نخش في السالفة على طول ، ويمكن بعضكم إستغرب من العنوان 
السالفة أو القصة هذي صارت لي قبل شهرين تقريبًا !! 

كنت أتسوق في أسواق بنده ، المهم إني خلصت وطلعت أبغى أروح لسيارتي 
فـ يوم طلعت كان قدامي 3 بنات ، كل وحده معها عربيه وشايله أغراضها ، هم يمشون قدامي ووقفوا عند سيارتهم ، وسيارتهم طلعت جنب سيارتي بالضبط يسار سيارتي 
المهم وقفوا يركبون الاغراض بالسيارة ، طبعًا أنا وممكن أي شخص من باب الإحترام إنه يوقف بعيد وينتظرهم لين يخلصون خصوصًا إن سيارتهم ملاصقه لسيارتي ولا اقدر اركب . 
أنا وقفت بعيد أنتظرهم وجلست أقلبّ في جوالي . 
يوم خلصوا وركبوا أغراضهم ، تجي وحده منهم بتوخر العربيه ، فالله يجزاها خير إرجفت إم العربيه لين لزقتها في صدام سيارتي الخلفي ، مخشت الصدام وطيرت شوي من البويه
جلست ألعن بيني وبين نفسي ، يا ليل الليل وش هالغشامه اللي فيها . 
الصراحه إحترت يا شباب وش أسوي ، أروح أهاوشها والا اسكت ، واخترت الحل الثاني واسكت
المهم وأنا جالس في قمّة عصبيتي المطلقة أنتظرهم ينقلعون ، وحده منهم محترمه الصراحة أخذت العربيه قدام ويوم بغت توقفها رجفتها في الصدام الأمامي تحت الشمعة ويطلع ذاك المخش المحترم . 
باللحظة هذي شوي وتجيني جلطة ، ولعّت معي ، كان بيني وبين الإجرام شعره بس ، ينقصني مسدس 9 طلقات فقط 
تعوذت من إبليس وأسكت ، أما البنت الثالثة طلعت أحسن منهم وحطت العربيه في مكان بعيد . 

وقتها يا شباب السيارة جديدة ماشيه 1200 بس والصراحة كنت ودي أصرخ عليهم وأقول ، يرحم إمكم تكفوووون ترا مشتريها بدم قلبي


اللي أبغى أقوله بعد هالقصة : 
فيه بعض الناس وموب شرط النساء ، حتى بعض الرجال والأطفال ما عندهم أدنى إحترام لحاجات الناس 
وش ذنب اللي تعب وشقى عشان يجمع له مبلغ بسيط ويشتري سيارة جديدة يفرح فيها ، تجي أنت تمخشها أو تكسرها وتمشي 
فيه بعض الناس وأعرفهم أنا ، إذا جاء شيء بسيط لسيارته يعافها ويكرهها ، وبسبب إيش ؟ بسبب إنه شخص عديم إحترام فتح الباب على سيارته وطعج الرفرف 
وعلى فكرة يا إخوان ، ممكن دعوة وحده بس من شخص حكيت سيارته ، تروح سيارتك كلها للتشليح !! 

وعندي عتب على بعض الآباء ، يشوف ولده يفتح الباب على سياره ثانيه ولا يقوله شيء ، أو مثل ما ذكرت بقصتي ، يترك ولده يدف عربيات السوبر ماركت ويصقع في سيارات العالم ولا يقوله شيء 

بالأخير يا إخوان ، إحترام الناس موب بس بالكلام والاسلوب ، أيضًا بفعلك إتجاه حاجاتهم وفيما يملكونه 





وأتمنى بعد من المشرف ينقل الموضوع لمنتدى حواء ههههههههههههههه
خل بعض البنات يفهمون إن السيارة جزء من قلب الرجل ^_^ 




تقبلوا تحياتي 
والقصة صارت معي 
إخوكم ssv8 

في أمان الله 

إبلاغ

الردود