اشارات ساهر سببة زحمة

اشاره ساهر الي على طريق الملك فهد خلف برج المملكه زحمه غير طبيعي  طبعن معي اكسنت قدامي يوكن ووراي جيب سيكويا 

الحمد الله مغطيني صح ولاصادني ساهر كانو ملحمين فيمي وانا ملحم في اليوكن ولا صورني وفعلن كلامك صحيح 4 ثواني ولاشارع تطفي جلست عند الاشاره 17 دقيقه من زحمه وقلت خاربه خاربه 

لا وفي العن منها اشارة شارع الضباب وانت متجه لمدينة الملك فهد الطبية الساعة 5 العصر والعياذ بالللله واللي مسبب الزحمة اللي بساقطون من اليمين عشان يخشون وخصوصا باب ابو ريالين الزفت عساهم يلغوووونه بس الاشارة تفتح 20 ثانية 10 ثواني ما احد تحرك واخر اربع ثواني يخافون ويوقفون وهي لسا اخضر خصوصا ابو هنود تتمنى تنزل تطقه بالعصا 

* باص ابو ريالين 

* باص ابو ريالين 

ساهر زين بالاشارات انا من مؤيدين له

انا مره بالفجر واقف عند اشاره مافيها ساهر ولمن ولعت خضراء ومشيت الا واحد طاير من الاشاره معه كامري بغى يطيرني

بس ربي رحمني ان امداني امسك فرامل

وهو ولافكر كمل دعسته

هنا احب ساهر على راسه مفيد

واللي مايجوز له يطلع بدري لدوامه يصلي الفجر ويمشي ويتقهوى بالكفي

هذا اللي اسويه الصبح لاني مااحب الزحمه

اجي بدري منها اجي مروق ومنها احصل مواقف وارتحت لي شهر وانا على الطريقه هذي ومبسوط

ياخي والله اني اشوف ان ساهر زاد المشاكل ولا قدم لنا شيء!
نسبة الحوادث هي هي ماتغير شيء ويمكن زادت بعد
لان الوحد يكون ماشي وينتبه لساهر ويكبس فرامل والي وراه يلحم فيه وصار سلسلة حوادث
ثاني شيء الفلاش حقه يخوف يعني تكون ماشيء ويصور واحد قدامك او صورك وماتدري الا الفلاش في عينك ويسبب لك ارتباك..
ثالث شيء ساهر وسط البلد مال أمه داعي ممكن تحطه في الدائري وفي خطوط السفر بس
والي يقهر التفاتيش يغرمك اذا مغطي اللوحة؟
من زمان عايشين بدون ساهر ولا كان فيه مشاكل ومرتاحين من يوم جا وحنا في مشاكل
مو كفاية الطرق المحفرة الي تفشل؟
حسبي الله ونعم الوكيل

حرية الرأي بهالموقع مكفوله لكل صاحب رأي..أنا وأعوذ بالله من كلمة أنا 

مؤيد لساهر في أمور ومخالفه في أمورٍ ثانية ..ساهر الإشارات ممتاز جداً جداً بس عيبه يمشي على عداد 
تجد أحيان إشارة فاضية ماقدامها أحد ومخَضره والإشارة المقابل لها زحام ومحمَره..المفترض يكون النظام الكتروني 
مراقب بالكاميرات ويحصي عدد السيارات أمام كل إشارة..يعني إذا الإشارة قدامها زحمه يزود وقت (المرور ) وإذا ماقدامها شي
تكون حمراء وهكذا..

أما ساهر الطرق السريعه فـ ضرره أكبر من نفعه..عندنا بمكه ما يحطونه الا خلف صبه ولا لوحه ولا شجره 
وهالطريقة خاطئة بنظري...سيئته الثانية هي تدبيل الأسعار

ولا هو ك فكره ممتازة بس تطبيقها صفر ع الشمال

زحمة ومخالفاتهم بلا رحمة ..
ساهر ومادراك ماساهر 
اشتكى منك البشر وانت تختبي خلف الشجر..
اصبح اكبر هم حتى للمسافر ليس متى يصل
وهو بااطمنئان قبل مايشغله هم ساهروتنفيض
جيبه الخالي من استنفاذات سبل الحياة الكريمة ..
ساهر متى ينتهي ارءقگ وتدخل بغيبوبة دائمة  

ابو احمد هل انت ضد ساهر او مبدائهم
رغم عمقك الفكري بطرحك عن سلبياتها

اشكر سؤالك الذي تجاوز انت مع  أو ضد 
ومناقشة ماطرح بشكل فكري بعيدآ عن
ماسببه ببعض الازمات المالية للكثير..
لكن!!
انا لست ضد 
بل اختلف على الاليه التي ينتهجونها
 كجزاء غرامه  اكثر مما هو للامن والسلامة،
-نعم اصبح توجد أنضباطية عند الاشارات ؛
وايضآ ببعض الخطوط المحيطة بالمدن والخ
-  اختلافي كما ذكرت سابقآ (ألاليه).
واعتذر من صاحب الاعلان لخروجنا عن 
طرحك .

الشعب الاسباني .. 
يحاول يقنع العالم ان النظام وضبط المخالفين هو سبب الزحمه ههههه
لله درك يا الاسباني .. 
خلوا الدرعى ترعى وتروح الزحمة .. لكن تسوون لنا نظام 
تصير زحمه ..
شعب ماله حل .. مفطوم على الفوضى 

المشكله ماهي بساهر
المشكله في كيفية تطبيق نظام ساهر

يتضح من طريقتهم في تشغيل ساهر انهم يبغون مبالغ يعني ساهر مشروع تجاري وليس مشروع وضع من اجل ضبط الناس على النظام

الاشارات أهون من الدائري وطريق الملك فهد

وعندنا الزحمة سببها بنسبة كبيرة سواقتنا وبسبب تخطيط المخارج والشوارع السقيم
يجونك يحطون مخرج وبعده بـ 100 متر كبري

المفروض مسافة لا تقل عن كيلو بين أي مخرج وكبري عشان ما يتقفل المخرج ويوصل سرا السيارا الطريق السريع
 
نيويورك سكانها وسياراتها دبل الرياض يمكن عشر مرات ومع ذلك مافيها طريق سريع يوقف

أول مره اشوف طرق سريعة توقف
(طريق الملك فهد والدائري الشرقي)

رحت مشوار من الروابي لجامعة نورة كرهت نفسي 
ساعة ونص ورجلي مابين الابنص والفرامل 

ودايم يشوفون الاشارات الي فيها زحمة ويحطون فيها ساهر 

نظام الاشارات لو الاخضر يطفي على طول معناها راح تقل مده الاشارة الحمرا... ولو تطول مدة الاخضر معناها عالكل وبالتالي راح تطول مدة انتظارك اللي هي الاشاره حمرا

وانا أشوف انها لو تطول افضل لأن ذلك يقلل من اهدار الوقت في عملية التعشيق والانتقال من مرحلة التوقف للحركة 

واشوف ايضا ان ساهر برئ من زيادة الزحام بل لو شالو ساهر سيزيد الزحام الناتج عن عدم انضباط البعض والحوادث الناتجه

السبب الرئيسي للزحام هو زيادة عدد السيارات وعدم مواكبة التطور العمراني لحركة الزيادة السكانية

ودمتم...