أضف سؤال أو موضوع جديد          

فكيت كادينزا 2015 فل كامل وهنا التفاصيل

up 20 down 3
ابو مزهي 96
قبل 7 سنه و 3 شهر



السلام وعليكم ورحمة الله وبركاته

والحمد لله من قبل ومن بعد .. في هذا اليوم طلعت سيارتي الكيا كادينزا 2015 فل كامل .. وما ودي أخوض في تفاصيل خيارات السيارات إللي كانت في بالي ومواصفاتها والفروقات بينها فلقد سبقوني الكثيرين بطرح سبب إختيارهم للكادينزا ..
لكن بإختصار أقول لكم إني أشتريتها لأنها أقوى مكينة وأفضل مواصفات وأرخص سعر مقارنة مع منافساتها المعروفة في وكالات هوندا وتويوتا وهونداي ونيسان .. 

سألت عن سعرها في وكالة الجبر في الدمام قبل يومين قالوا 114 وتسعمية والنقل عليهم والتأمين علي.. حاولت يمين يسار ياناس بطخكم كاش وما نزلوا لي السعر بزعم انها ماشيه بالسعر ذا زي الحلاوة .. رحت معارض الدمام وبدأ مسلسل النصب المعهود !!!!
تخيلوا رحت لمعرض مشهور يبيع سيارات كيا وله فرعين "بدون ذكر أسماء" فرع قال لي 113 نهائي مانزل لي ريال وفرعهم الثاني قال لي 117 ههههههه ماتنزل ريال والفرعين ما بينهم أزود من 300 متر .. يالطيب الوكالة ب 114 قال طلعت علينا غالية ؟! الوكاد لفيت كل المعارض وحصلتها نهائي ب 112 في أحد المعارض وبرضو مشهور وكبير وسياراته كلها وكالة .. حاولت فيه قال أنا عطيتك أقل من أبو 113 .. طبعا والتأمين علي 700 ريال .. وطبخة المعارض ولعبتهم هي كالتالي : تجيه وعلى طول يسألك بكم لقيتها في المعارض الثانية  وإذا علمته طرح لك 500 أو بالكثير ألف .. كلهم كذا .. مايسألك بكم لقيتها في الوكالة أبد .. يسألك بكم لقيتها عند غيره في المعارض !! وأنا كنت صادق معهم وقبلهم مع الله سبحانه .. ولا كنت أقدر أكذب وأقول لهم لقيتها ب 110 وآخذها ب 109 .. والله يالربع هذي طريقتهم كل المعارض كذا 

أخذت أبيض لؤلؤي ومن داخل بيج "فاتح" .. وحصلت داخلية أبيض "سكري" لكن بصراحة مهيب لايقه على الكوري أبد أبد وقمة التناقض في الألوان فيما بين ديكورات الأبواب والأسيات البيضاء والطبلون .. الداخلية الأبيض للألماني واللكزس وباقي السيارات الفخمة .. الكوري مرررره مهو لايق عليه .. وهذا طبعا بنظرة عيني للداخلية والناس أذواق .. وعموما الداخلية البيج الفاتح والأبيض كلها طبلون وخلفية الكراسي الأمامية غامق قريب للأسود .. وبغيت آخذ اللون الخارجي البني الجديد "موكا" وتذكرت الغبار وهونت لأني من النوع إللي ما أغسل السيارة إلا كل أسبوع أو عشرة أيام تزيد ما تنقص ..

وعطوني المعرض كوبون أوتو شاين إللي قريب من مستشفى الولادة وهو خصم على حماية الوجهية وحامي الصدأ والتظليل العازل .. ومدة الكوبون أسبوعين ومهوب كاتبين نسبة الخصم يعني أنت وشطارتك أو شطارتهم ههههه .. وأول ماوصلت البيت دق علي مسؤلهم وقال لي أستاز فلان قلت إيه قال مبروك الكادينزا قلت من أنت قال محل أوتو شاين وحبينا نذكرك بخدماتنا .. قلت حاليا مطفر هههههه قال عدي علينا ولا يصير خاطرك إلا طيب .. قلت خلاص بمرك هاليومين بس أكرر تراني مطفر ههههه قال ولا يهمك مرنا وحنزبطك ..

الشي إللي كدر خاطري ان الكيا مايجي معها دواسات "فرش" للرجلين تكرمون :( حسب كلام المعرض وشيكت كل أنواع الكيا وفعلا ماتجي معها دعاسات ..

والشي الثاني .. سماعات السيارة ما تشتغل مدري ليش هههههههه .. شغلت الراديو وأرفع الصوت لاكن مافيه صوت أبد .. ركبت شريحة النافيقيشن وشغال زي الحلاوة .. تعبثت في الأزرار ياكثرها وحاولت لكن ماش ما أشتغل الصوت مدري ليش .. فتحت الكتلوج ودخت مالقيت شي يفيدني .. وأنا متأكد ان فيه سر ماعرفت له .. لأني حتى شريحة النافيقيشن ماكنت عارف إنها وسط الكتلوج ههههه ركبها لي الزول حق المعرض .. لكنه قال سالفة الصوت ما أعرف لها .. الوكاد بكره بمر الوكالة جنبي مقرهم وبعلموني كيف .. وبنشب لهم بخصوص الدعاسات تكرمون .. وباقي أزرار ومواصفات الموتر سهلة قريت الكتلوج وعرفتها أغلبها .. والله يالربع ياهي دوخة وشغلات كثيرة أتعب لو بذكرها لكم .. خصوصا شغلات الطبلون وتحكم الطارة فيه اعدادات وخيارات واجد ..

وبخصوص البنزين مكتوب في الكاتلوج 91 وفوق .. وبحكم إني مطفر عبيت 91 ههههه .. لكن بكره بسأل الوكالة وش الأفضل .. وشغله ثانية المعرض فك بطارية الشد بلد وركب لي بطارية جديدة بكرتونها نفسها بالضبط سألته ليش قال فيه ناس رجعوا لنا وقالوا البطارية ضعيفة بسبب طول الوقفة وعدم فصل الأصابع ..


هذا ما لدي وحبيت أشارككم بتجربتي عل وعسى أحد يستفيد منها .. وإذا فيه أحد يعرف طريقة صوت السماعات ياليت يعلمني علما بأني ماجربت أشغل سيدي .. سيدياتي كلها رايحه فيها من الموتر القديم وأخاف تدمر مشغل السيدي .. 

وأي أستفسار أنا حاضر .. ودمتم في رعاية الله ..


 







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


السلام عليكم ورحمة الله وبركاته 
يعطيك العافية وما تقصر اخوي على المعلومات الي من ذهب 
وحبيت اخذ رايك اخذ كيا كادينزا ولا هونداي سوناتا


up 0 down 0
zyad saleh 2
قبل 6 سنه و 8 شهر



مبروك السيارة 
انا عانيت بموضوع الفرش ونوع البنزين السيارة طلعتها من اسبوع وفي الوكالة مافي فرش ولاني عارف ايش نوع البنزين ان عرفت خبرني والله يباركلك فيها


up 0 down 0
raefat nasser
قبل 6 سنه و 8 شهر