X قصتي مع الدباب والنية الحسنه X

53 32

لايمكنك التصويت حتى الحصول على 20 نقطة على الأقل
إضغط هنا للإخفاء

ابو يزيد 000 8714
قبل 9 سنه و 9 شهر

السلام عليكم ورحمة الله وبركاته

كيفكم عساكم طيبين ان شاء الله

اليوم موضوعنا عن قصه لقريب لي والقصه قبل سنتين

طبعا كنت طفشان وتذكرت هالسالفه وقلت ليه ما انزلها لكم !!

وانا الآن بأتكلم كأني انا راعي القصه فبقولها كانها ( سارت لي ) لسرعه وسهوله الفهم :)

____________

أنا تعينت في سدير , واستأجرت أنا وأحد اصدقائي استراحه ب 12 ألف ريال , وكل خميس نروح لاهلنا ونرجع السبت ( الويكند )

على العموم أنا طلعت من الاستراحه الساعه 9 الليل , بروح اتعشا ببوفيه بيض جبن وشغل نظيف ههههه , شغلت الجمس , ويوم عدت ماشي

شفت نور في البرحه اللي قدامنا , واقرب اقرب واكشح العالي , واطالع الا وهو دباب ابو بطه ( حق البقالات والمطاعم )

وكفره لسى يدور , يعني توه طايح !!

قلت يمكن احد انقلب فيه واكشح العالي والف السياره يمين وشمال لكن ما فيه مخلوق حي قريب من الدباب !!

واتذكر إن عند بيتنا في الرياض راعي البقاله كل يوم يخرب دبابه واحيانا ما يوصل لاهلي الطلبات بسبب الدباب

وقلت خلني أشيله و يوم الخميس اوديه للرياض معي

بس ضميري قال , يمكن راعيه قريب منه , راح يغسل جروحه لانه انقلب

قلت طيب اوك , بروح أتعشا , وان رجعت وحصلته , باخذه معي , وان ما حصلته , فالحمد لله اكيد راعيه اخذه

رحت تعشيت ويوم رجعت الا والدباب محله , مقلوب في البرحه , ولا تحرك , قلت بسم الله وانزل اشيله وادخله في الاستراحه

ويشهد الله اني نيتي ماهي اني اسرقه واروح ابيعه , كانت نيتي حسنه وقتها حتى اني استنيت راعيه ولا جاء فأيقنت انه ماعاد بيرجع

وكانت نيتي طيبه لاني راح اعطيه راعي البقاله اللي في الرياض

عشان يسير يوصل الطلبات وهو مرتاح لانه انسان طيب حتى لو ما كان معي فلوس كان يقول بعدين عطني

و منها بعد يوصل لاهلي و يوصل للجيران بدون تأخير فاكون ضربت اكثر من عصفور بحجر



ولو خليت الدباب , فالحي اللي انا فيه كلهم على قد حالهم , راح ياخذونه ويبيعوه على انه مسروق , لكن انا ماني بايع لانه حرام ابيع شيء ماهو لي

راح اسوي خير لي وخير لراعيه باني اشغله فيما ينفع الناس و اكسب اجر ويكسب راعيه اجر ويستفيد منه راعي البقاله ويستفيدوا الجيران والاهل بان الطلبات تجيهم بدون تاخير :)

جاء يوم الخميس وجيت ادخله الجمس , الا والله ما يدخل نحاول نحاول , مافيه آمل

وأكلم خويي في الاستراحه معه نافارا نسيان يشبهه الددسن لكن افضل , قلت اجل الحقني انت بالدباب , قال انا ما بسافر هالاسبوع

قلت اجل انا باخذ النافارا , وانت خل اليوكن حقي معك وانا راجع بعد يومين ان شاء الله , وقال اوك ماعندك مشكله

ووالله و امشي للرياض

وامشي من عند نقاط التفتيش ويدي على قلبي هههههههههه

بيقولون اول شيء الاستماره والرخصه , والونيت ماهو باسمي ههههههه باسم صديقي وانا قبليتي غير عن قبليته ولا نقرب لبعض

وبيقولون وين اوراق الدباب ههههه ووش اقولهم . اقولهم هذي سيارة خويي عطاني اياها ما قصر وسوا فيني خير , و انا لقيت هالدباب مرمي وقلت بسوي خير بعطيه راعي بقاله ولاني بايعه

اكيد ما راح يصدقوني , بيقولون انت حرامي , النفارا مسروقه والدباب مسروق

واوصل الرياض واقول الحمد لله اني عديت من عندهم على خير , كان وقت صلاه , ولقيت البقاله مقفله , ( من حسن الحظ ) ليه من حسن الحظ

نشوف الحين !!!!!!!!!!!!!!!!!!!!!!!!!!!!!!!!!

واروح للبيت وانزل الدباب ويوم اني انزله الا ويطيح على الزفلت , وتنفك المقعده

وتطلعععععع البلاوووووووووووووووووووووووووووووووووووووووووووووووووووووي

أربع قوارير خمر هههههههههههههههههههههههههههههههههههههههههه

وانا اطالع يميني ويساري ياولد لا يكون في احد , واشيل القوراير وادخلها بالبيت

وانا اتنافض واقول ياويلي ويلاه , معي خمر بالبيت , وش اسوي الحين

وادق على اخوي لاني ما عدت ادري وش اسوي تشنجت محلي

ويقول اشربها ياثور دسها ببطنك لا تجي المباحث ههههههههههههههه

واقول يالله وقتك الحين يا السامج , قال اسمع اسمع , استنى شوي انا جاي

بشوف ان كانت نوعيه ممتازه خلنا نخربها اليوم هههههههههههههه

واقفل في وجهه وهو يضحك وانا اتنافض

واستنيته لين جاء , وقال وينها

وقلت بالحمام , قال جب الكاميرا وتعال , ابيك تصورني وانا اشربها , واقول علي الحرام لا اشق حلقك ان كنت جاد

قال جب الكاميرا وتعال ولا يكثر هههههههههههههه

واجيب الكاميرا , واصوره , و مسك العلبه الاولى ويكسرها بالبانيو ( حوض الاستحمام )

ويقول للي مدمن على هالخساسه , هذي 4 علب , تبيها , روح الحقها بالمجاري , لان اصلها من هناك ههههههههههه

ويسكر الثانيه والثالثه والرابعه , ونشيل القزاز وننظف الحمام ونجمع القزاز بكيس ,ونروح للمحطه ونعبي قاروره بنزين ,

ونرمي الكيس بالزباله ونكب البنزين على الكيس ونولع بالزباله عشان تختفي اثار البصمات

والحمد لله عدت السالفه على خير

فخلاصة الموضوع

أي شيء تلقاه مرمي , في منطقه مقطوعه ( ترا فيه بلا )

لو جوال , يمكن يكون مراقب , او سياره , يمكن يكونوا سوو فيها جريمه ورموه في برحهه وخلوها شغاله , عشان يجي حرامي ويسرقها وتطيح في ظهره القضيه بالكامل وهو ما يدري

وايضا النيه الحسنه , دايم تكون سبب لنجاة الشخص , لو كانت نيتي بروح ابيعه واخذ فلوسه ولا اتصدق فيها , تتوقعون بأمر بنقاط التفتيش زي سلام عليكم

وتضنون اني بوصل الرياض في وقت صلاه , والقا البقاله مقفله , عشان لا اعطيه راعي البقاله وهو فيه الخمر , وهل كان من المتوقع انه يطيح الدباب وتنفك المقعده ويطلع من تحتها هالقوارير

لا والله , هذا فضل من الله , وانا اشكره في كل يوم , كان بأمكاني اقضي 5 سنوات بالسجن على الاقل , بتهمه تهريب خمر لعاصمه الرياض

لكن الحمد لله , الله فكني

وهذا نهاية القصه واتمنى اعجبتكم

والسلام خير ختام

ملاحظه : لو كان فعلا راعيه محتاج والدباب عنده شيء كبير مثل السياره , كان اكيد شك في راعين الاستراحات

وبيجي يدق الابواب وبيسأل عن دباب كان مقلوب , وتتوقعون راح يجحده , لا اكيد راح يعطيه اياه وفوقها حبة خشم , لان نيتي هو حسنه والرجال طيب

لكن هو سوا خير , صحيح فلعته خطأ , لكن قطع تجارة الوصخ و لا خلاه يبيع الخمور على اولادنا وعيالنا واخواننا وسوا خير

وصدقوني الدباب اخذه يوم الاثنين وقعد عنده الى الخميس ولا احد جاء وسأل عنه ودق الباب 

لانه اصلا فيه خمر وراعيه واحد وصخ , فلا تاخذكم الرحمه فيه وتقولون ليه سرقه , بالعكس والله سوا خير يوم اخذه لانه طلع الخمر وكسره

واتمنى الموضوع ما يزعلنا من بعض , خلاص كفاية جدالات , الجدالات تودي للزعل , وانا اكرهه هالشيء

والصوره توضيحيه 
اخوكم : ابو يزيد

إبلاغ

الردود