أضف سؤال أو موضوع جديد          

استفسارات غريبة وردود أغرب

up 40 down 66
ابراهيم التركـي 1068
قبل 6 سنه و شهر



السلام عليكم ورحمة الله وبركاته

ملاحظه على كثير من المواضيع والاستفسارات بالمنتدى شيء غريبه

وفلسفة الاعضاء اغرب من الاستفسار

يجيك استفسار يقول عندي صوت طقطقه احسه قدام وش تتوقعون السبب ؟

كثير من الردود تجي اللي يقول مساعد يمين صارت معي

الثاني لا لا مساعد يسار

واللي يقول كراسي مساعدات واللي يقول جلد مقصات

صحيح كلها تسبب صوت ولكن على اي اساس تقوله الصوت من المكان الفلاني

وانت لا سمعته ولا شفت بعينك كشفت ولا شيء

والاستفسار من الاساس غبي كيف نفيدك الصوت وين مصدرة بالضبط بوصفك هذا 

المشكله تحصل كثير ردود على الموضوع وحماس وكأن الجميع متأكد من السبب ومصدر الصوت
_______________________________________

الشيء الثاني يجيك واحد يقول عندي تهريب زيت مثل موضوع قبل ساعتين تقريبا

تهريب زيت احيانا احصله على الارض

طيب ممكن قير وممكن زيت مكينه وممكن زيت دركسون هو حتى لون الزيت ما قاله

وحتى لو كان مكينه مثلا ممكن صرة الكارتير نفسه وممكن من صوفة وممكن من جلد البلوف

وممكن سبب اخر كيف نفيدك بالله لا صورة ولا لون الزيت ولا شيء

بعض الاستفسارات مستحيل احد يجاوبه اجابه شافية ووافيه بالطريقة هذي

لازم فحص بالنظر عشان تحدد المصدر وانا ما ادري الاعضاء على اي اساس يتفاعلون

وهو الغبي يجي يسأل سؤال مثل هذا كيف ؟؟؟

حتى لو رحت لورشة بيقولك جيبها على الحفرة عشان يتأكد ما بيقولك جيب القطعه الفلانية

وهو ما شاف المصدر وين
____________________________________________

استفسار ثالث عن رجه بالسياره

تجيك ردود سوي ترصيص ارضي

ممكن جنط فيه ضربه

ممكن كفر محبل

حتى العكس يسبب رجه وحتى عامود الكردان يسبب رجه

ولكن على اي اساس تجاوبه وين الرجه وانت ما تدري بس تبي تشارك وبس 

وبعض الاعضاء يستشيرني بالاسم ارجوا من ابراهيم التركي يدخل

طيب وكيف اجاوبك انا تبيني اضحك عليك 

شيء ما مر علي او شيء له عدة اسباب صعب اقولك سوي الشيء الفلاني ولا يطلع هو الخربان
____________________

استفسار اخر

عندي تفتفه بسيطه 

يجونك الشعب سوي تصفية مكينه او غير اسلاك بواجي

واسلاك البواجي ما تسبب تفتفه ابدا تسبب تقطيع وفيه فرق بين التفتفه والتقطيع

واللي يقول صفاية بنزين واللي يقول بواجي

البواجي ايام زمان قبل 10 سنين كانت تسبب تفتفه او تقطيع

من 2007 وطالع اتحدا اي شخص يقول كانت عندي تفتفه وغيرت بواجي وراحت

لو تمشي على البواجي 300 الف ما بتسبب تفتفه

واللي عنده غير هالكلام يثبت لي ان البواجي تسبب تفتفه من موديل 2007 وطالع

وبالنسبة لأسلاك البواجي

السيارات اللي تجيك كويلات اسلاك البواجي العادة ما تخرب تخبط المكينه والاسلاك باقي جديدة

لان ما عليها ضغط هي توصل نسبة كهرباء والضغط يكون على الكويل نفسه

ولكن السيارات اللي تجي بدون كويلات هي اللي تتأثر اسلاك البواجي كل فترة وتسبب تفتفه

المشكله اشوف ردود يجيك صاحب السياره يستفسر عن التفتفه وسيارته كويلات ويقولون له غير

اسلاك بواجي وهو على الريحه 

او واحد ثاني يقوله شيك على الكويلات والسياره اصلا ما فيها كويلات 

يا اخي مو متأكد من الشيء اللي تقوله ماهو شرط تشارك وتضيع الرجال

ترى فيه كثير ناس يكتب بقوقل تفتفة سياره مثلا ويتحول لمنتدى حراج ويدخل يحصل اجابات غلط

ويفكرها صح وتضيع خلق الله معك
__________________________________________

استفسار اخر

وهذا شفته اليوم الصباح تقريبا

عن البطارية يقولك جيت اشغل الكامري تطلع صوت تك تك تك متتاليه

واغلب او كل الردود تقوله نظف اصابع البطارية 

والحقيقة كلها غلط

اصابع البطارية لو فيها املاح او ماهي مشدودة ما تطلع صوت تك تكه

الاصابع اول ما تشغلها مجرد ما تدق سلف تفصل الكهرباء نهائيا حتى الانوار وكل شيء يفصل

لازم تحرك الاصبع عشان ترجع توصل كهرباء وتشتغل

ولكن اذا فيه صوت تكتكه يكون البطارية نفسها فاضيه تحتاج شحن

_____________________

وكثير من الاستفسارات الصراحه صعب الاجابة عليها لابد من الكشف او التجربة

وتحصل ردود مختلفة عليها

والكثير يقولك شيك على كذا وشيك على كذا

وكيف يشيك عليها يروح يغيرها يجرب يعني او كيف يشيك تقصدون هذا اللي ما فهمته

بعض الاعضاء ينزل موضوع استفسار ويجيني بالخاص يقولي شوف موضوعي علق عليه

وانا اكون شفت الموضوع ولكن ما اعرف له حل ليش اجلس اتفلسف

انا لا درست ميكانيكا ولا شيء كل الاجابات اللي اطرحها تكون من تجربة شخصية وافيدكم فيها

اما شيء ما مر علي او ما اعرفه ليش اعلق عليه 

احيانا يجيني برود من المواضيع بالمنتدى 

الواحد وده يدخل محشش او سكران عشان يشوف بعض الاستفسارات ولا يرتفع ضغطه ههههههههه

https://www.youtube.com/watch?v=yApWhJfN48Y







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


ابراهيم صادق بعض الاعضاء يطرح موضوع ويبيك تحل اللغز او تفك الرموز
بعضهم يقول عندي المشكلة الفلانية من يخبر لي ورشة ممتازة ولايحدد 
هو من اي مدينة 
والثاني يقول كامري 2002 مثلا كم تسوى وهو ماذكر اللون والتفاصيل 
الثانية مثل اااستمارة والفحص والممشى ويبيني اقوله كم تسوى 


up 2 down 6
أأبو نوااف 1641
قبل 6 سنه و شهر



اعميت نص الشعب يالتركي 
ههههههههههههه 
خلك حليم يخوك 
ترى فيه ناس غششششششم ولا يعرف في السياره الا السواقه 
قبل سنوات اخوي شراء كابريس 2006 من الوكاله ولا يدري هي 8 ولا 6 سلندر 

فلا تدقق 


المهم وش اخبار الورش معاك باقي تنام فيها 
هههههههههههههه دعابه 

المهم انا في جده ليه ماتعزمني يابخيل


up 5 down 3
siaf 347
قبل 6 سنه و شهر