شاركنا بخبراتك _ للجميع _

انا اليوم مغير زيت القير ورحت للوكالة واعطاني الزيت بدون لا افتح الكاتالوج واعرف النوع بس بعدين اكتشفت انه مو نفس اللي مناسب لسيارتي 
نصيحة قبل لا تشتري اي شيء ناظر الكاتالوج 

موضوع جميل تشكر عليه خويي كان معه اوريون 2008
وكان قيرها يغوت وينتع وكل ماداء فني قالواتوظيييييييييييب
وكنت ادور له على حل وسمعت عن شريحه جنب الكارتير
تتوسخ وتخرب من اﻻمطار وبما ان قيمتها ماتتعدا 100 ريال
غيرها وظبط القير ومن احسن مايكون .

سيارة ابوية مديل تمانين الحرارة عالنص والكهربائيين يقولون طبيعي المهم خبط في راسي اغير الابلة تين وغيرته ورجعت الحرارة للربع طبيعي :]

يعطيك العافية على الموضوع الحلو والمميز 

انا سالفتي ياطويل العمر وقت الامطار القوية اللي جت الرياض قبل كم شهر 

كنت رايح الدوام العصر والمطر قوي واشتد وصار الجو عجاج مع مطر 
قلت بدوير وبسحب على الدوام "الجامعة" المهم وارجع على الخدمه واشوف ماء واجد

واشوف المواتر تمشي قلت معهم وادعس وادخل الماء والموتر يطفي 
واركز في المواتر اللي دخلت معي كلها جيوب 

المهم السيارة صارت تتحرك وتتهز مع الموج اذا مرت سيارة 
ودخل علي الماء وحالتي حالة والمكينة بغت تطق 

وكلها غشامه مني وقتها لو مركز في المواتر كان عرفت ان السيدان مايدخل 

ارحب جبت الموضوع في وقته
قبل 3 ايام بالتحديد حصل سالفة مضحكه جدا
ياشباب مريت مطعم شعبيات قريب من بيتنا 
المهم حصلت راعي فورد ماركيز 2004 جاني قال معك اشتراك
قلت ابشر بسعدك وش العلم قال الموتر طفيته عند المطعم 
وجيت اشغل ماشتغل شكلها البطاريه
المهم واروووووح البيت واجيب اشتراك
ونشركله ماشتغل يمين يسار عدل بدل ياولد
ياهوة ياماركيز يافكتوريا هههههههههههههه
والله يهديني ربي قلت انزل خلني اشوف
تدروووووون وش طلع المشكله
الرجال حاط القير في الN والله وارجعه فيP وعلى طول
والرجال يستغرب كيف شغلته قلت وانا خوك انت اول مرة تشتري سيارة
قال لاوالله مو اول مرة وقلتله المشكله
وضحك وضحكت وانبسطنا ودعالي وسلامتكم جميعا

الرفاعي موقف ولا ارووووع ههههههههههههههههههههههه 

هذا ياطويل العمر واحد من الشباب معه الشفر ابيكا مادري سمها المهم الرجال يشتكي من ارتفاع حرارت الموتر غير الماء مافاد 
سيخ الاديتر مافي فايده غير الخراطيش والبلف مافي فايده وراح فحصها عند كم ورشه قال له الراس يبي مسح المهم زلبهم وراح 
للوكاله وفحصوها قالو له الراس المهم طلع الموتر يبي  يلبقه برا ويستنى واحد يمره يقول انا ادور بلاسماء ويمر رقم مكانيكي 
ابليس بالمكانيكا قلت خل نشوف اتصل عليه قاله تعال اشوفها المهم راح له وحط الموتر قال له تعال بعد ساعه او ساعتين 
المهم اتصل عليه المكانيكي قال جب معك طرمبة ماء  الرجال يقول ادخل على الوكاله وادعسهم 
يقول بغيت ادف حول 9000 المهم الموتر كلف عليه مع القطعه 1200 وزي الحلاه 
وهذي سالفتن ثانيه معي فورد 2002 هبل بي بالكهرب اذا ظربت فرامل يضعف الموتر شوي 
المهم واسأل الشباب قال فيه كهربائي تركي مايحتاج واروح له اشوف المواتر عند المانيات قلت بس 
المهم قلت له السالفه بدا يحوس ويدوس قال خل الموتر يوم قلت خلاص واجي من بكرا هاه بشر 
بدا يولف من ذنبه ما اقتنعه بكلامه  واروح وادور بكل محل يمدح فيه طلع خرطي قلت انسى السالفه 
المهم  وبعد مده وانا داخلن محطه واحصل محل كهرباء متواضع جداً قلت يارجال لاتستحقر احد رحت له
وقلت له السالفه على طول عرف المشكله طلع عندي الماص ضعيف صلحه بـ 15 ريال هههههه 
الي ابي اوصله لايهمونكم المحلات الي لوحته 5 كيلو من كبرها الشاطر شاطر لو محله خشب 

والله تقريبا قصصكم وانا واحد منهم 
انو الزبدة لاتعتمد على كلام شخص 
يعني والله مركب هانكوك من رمضان ٢٠١٣ 
العام الماضي ٢٠١٤ يقلي البنشري ماحتمشي غير
شهر بالكثير
وقبل اسبوع وحنا ب٢٠١٥ يقلي حق هانكوم واحد سعودي 
شباب. قلتلو بس بامانة قلي كم تمشي قلي شهر. شفتو كيف ! 
وانا اتوقع تمشيني ٤ اشهور قدام وعارف ذا الشي 
ونفس الشي واكيد اكثر الاعضا عارفين 
انو معانا باجيرو وماقصرو الي قلي لاتوظب عشان نقص زيت
وكذا واحدد قلي خليها. وفعلا يوم اروح الوكالة او عند احدد
يقولو لازم توظيب خلاص منتهية. طيب لها ٤ سنوات تنقص
زيت وبدون تهريب او حرارة او خلط موية او بنزين او اي 
مشاكل. على طول وبكل ثقة يتنبأو. ويوم تقلهم فين المشكلة؟
يقولو مانعرف لازم فك مكينة. على اساس انو بيفك الكبوت

خذ هالنصايح
لاتشارك بالتجاره
لا تعطي العامل مقدما الا اذا انتهى
لا تتعامل مع مقاول ماسك شغل كثير والدفعات يجب ان تكون متناسبه مع الانجاز
لاتبحث عن البضاعه الرخيصه 
دائما هناك البديل عند المغاله او الطمع من البضائع او الاشخاص
انتبه من الاخطاء التراكميه خطاء يجر خطاء
لاتفتح بيتك مضافه للي يسوى واللي مايسوى فهذا ازعاج وضياع وقت
اعمل الصيانه الخفيفه للمنزل بنفسك
لاتكفل احد نهائيا ولو كان جدك بالبنك الزراعي او التسليف
انتبه من مرافقة الاحمق
اثناء القياده انتبه للحمير من حولك وكن هادئا
اذ تزوجت ركز على اهل الفتاة اكثر من الفتاة نفسها
احذر تعطي احد نصيحه مالم يطلبها منك...فقد يكون وقح ويقول وفر نصيحتك؟؟
احذر من التواضع الزائد وفي نفس الوقت احذر التكبر
تعلم كيف تتجنب المجادله بالصبر عن الكلام
لاتثق باحد بينك وبينه شاشة الكمبيوتر
في البيع والشراء99% كذابين وال1% مات سنة الرحمه
لاتندهش كثير اذا تفاجأة يوم ان شقيقك الحقيقي هوصراف الراجحي اذا كان فيه رصيد!!
لاتعطي سرك لااحد فقد ينقلب عليك الصديق بفعل الحقد او مجرد ثرثره
هناك اسرار يجب ان يدفن معك في قبرك ولا يعلم بها احد 
اذا بحثت عن بضاعه لاتعرف سعرها اسال 3 محلات 

قبل تقريبا سنة واحد من أقاربي معه كابرس 2006 و كلمني و طلعت معه السيارة يوقل ما فيه عزم و فيها صوت طقطقة (كأنك تدخل حديدة في مروحة) مع دعسة البنزين و فيها تفتفة و رجفة أول ما تشغلها

رحت لكم ورشة إلا يبغون حق الفحص و فحصت عند ورشة البركة كيلو 7 عند دوار القرب و أعطاني لستة قال عندك البستم 2 و 4 و 6 تحتاج تغيير يعني توضيب و سألني مديره أو مشرهم (سوري) أنت منتظم على الزيت؟

و تذكرت قريبي يقول يغير الزيت بعد 7000 قلت له الكلام هذا و رد علي قال: قريبك يتأخر في تغيير الزيت و احتمال  كبير فيه رواسب لكن جرب تغير زيت مع السيفون.

على طول نقز اللي فحص و يقول ما غير بيخسر حق الزيت شوف السيارة الفلانية قلت له توظيب ما صدقني و را غير زيت و ضرب القير و خسر حق الزيت و الفلتر.

رد المشرف السوري ابو شريف قال معليش يخسر حق الزيت و لا يخسر حق المكينة.

و قريت موضوع عن تنظيف المكينة بزيت القير و كان عندي في سيارتي 6 علب و قلت ما دام المكينة رايحة رايحة خليني أجرب و رحت لبنشر و نزلت الحفرة مع اليمني و أول ما فك الصرة يقول غريبة السيارة ما فيها زيت السيارة تاخذ 6 علب و تقريبا اللي فيه علبتين!!

بعد ما غسلت المكينة بزيت القير و عبيتها زيت مكينة كانت المفاجئة:   الأصوات راحت و العزم رجع طبيعي!!! و السبب هو نقص الزيت 

بدل ما ادفع 10000 قيمة بساتم و 3200 شغل يد دفعت و الحمدلله حق زيت و سيفون

رجعت من بكرتها لأبو شريف السوري و سلمت عليه و شكرته و قال الواحد لازم يفكر كيف يأكل هو و عياله ما ابغى شيء في ذمتي