أضف سؤال أو موضوع جديد          

تجربتي مع الشريطية في بيع السيارة

up 14 down 4
ابو سعود629 4707
قبل 10 سنه



السلام عليكم ورحمة الله وبركاته .. اسعد الله مسآآكم بكل خير .. اخباركم عسآآكم بخير !؟





ندخل في الموضوع .. انا معي ماركيز 2005 عرضته هنا بالموقع وذكرت عيوبه وذكرت كل حاجه فيه .. لكن مالقيت الزبون الصامل .. ولو لقيت زبون صامل تكون سومته في الأرض ..!




واحد يسومه ب 8000 وواحد يسومه ب 11000 !! وواحد ب 18000 ! صحيح الموتر يحتاج له دفرنش لكن لو اجيبه من الامارات واركبه ب 1000 نقول راح يصك سعره بالراحه 25 




المهم قلت دام مافيه ناس صاملين بالموقع خلني انزله للمعارض ..يوم الجمعه صليت العصر وحركت ع المعارض .. 




اول مادخلت الحراج وقفوني الشريطيه للبيع الفورد !؟؟ قلت ايوه قال صفط ع جنب .. 


الشريطي : كم سيم يالأخو ؟؟ 


انا : السلام قبل الكلام ياخوي .. 


الشريطي السلام عليكم ..

انا : السياره فيها باب خلفي مسمكر وضربه بسيطه بالمقدمه ماوصلت للديتر .. وتحتاج دفرنش .. 



الشريطي : كم سيمت ؟؟ 


انا : ماسيمت من قبل 


الشريطي : كم حدك ؟ 



انا : ماحد يحد رزقه لو الود ودي بعتها ب 100000 قول لي سومتك ان ناسبتني بعتك وان ماناسبتني سيارتي عندي وفلوسك عندك .. 





الشريطي : تبيع ب 14000 ؟؟ 



انا : لا ماراح ابيعك .. 



الشريطي : والله اني امس شاري اخوه على يد راعيه من الوكاله ب 14000


انا : علامات تعجب فوق رآآآسي من الحلف اللي قاله .. ماركيز 2005 ومافيه اي مشكله ولا ضربات ولا رشوش يقول ب 14000 !!!!!!!!!!!! سحبت عليه ومشيت .. 


مشيت ووقفني شريطي ثاني :


الشريطي : بكم سيم يالاخو ؟ 


انا : ماسيم ولا لي حد فيه اعطني سومتك ناسبتني بعتك ماناسبتني الله يرزقك بأفضل منها .. 




الشريطي : جاء بيفتح الباب يقول لي ابجرب 



انا : ادفع عربونك واركب جرب 



الشريطي : مامعي عربون معي بطاقة الصرافه ان كانك تبيها .. 



انا : كلامي واضح عندك عربون اقل شيء 500 ريال تركب ماعندك الله يستر عليك ..



الشريطي : طيب انا اشتريت بحدك خلني اجرب الموتر ونروح للمعرض .. 



انا : انت تعرف كم حدي علشان تقول اشتريت بحدك ؟؟ 




الشريطي : نتفق بعد ماجرب .. 


انا : الله يستر عليك ماني بايع خلاص هونت .. عشقت في الD  وسمعته صراخ الكفرات .. 



ختاما : اللي ناوي يبيع سيارته يبيعها ع مستخدم لانه لو نزل السوق ماراح يلاقي حد يعطي السياره حقها .. يشتريها مني اليوم ب 15000 ويبيعها بعد ساعه ب 30000 مانختلف هي ارزاق من الله لكن ماتوصل لهذي الدرجة .. 




واخيرا نويت اغير لها دفرنش واستخدمها 15 سنة قدام ان الله اعطانا وايكم عمر ثم ابيعها على اللي سامها ب 8000 تشليح .. 









إبلاغ إبلاغ



الردود


انا دايم ابيع على الشريطيه لكن يتوهقون بالسياره ههههههههههههههههههه

مره بعت فورد 2007 أنواع المشاكل كانت حلوه ونظيفه لكن عين ماصلت على النبي المهم بعته بي 40 وادخل بعد شهر واشوفه انا وخويي راح خويي يسئله قاله مسيوم بي 38 خويي قال كم حدك قاله بي 42 خويي حاول معه الى 40 وباعه ههههههههه قال خويي بكلم اخوي يشوفه ونحش خويي هههههههههه


up 7 down 4



ابو سعود يعطيك العافيه على التجربه
صراحة استفدت من موضوعك وتجربتك 
شكرا لك 


up 3 down 2
الرفاعي33 13918
قبل 10 سنه



شيخ المعارض : ياخي فيهم اسلوب غريب عجيب .. يعني انا شفته يوم الخميس وقلت له سوم قال ماعندي علم بأسعاره , قلت كيف ماعندك علم وانت تبيع وتشتري هنا ؟؟



قال انا ما اشتغل هنا جاي ادور لي سياره .. رحت يوم الجمعه ولقيته بنفس الثوب بعد وبراد شاي وكل مامر واحد وقفه ماشاء الله عليه بيشتري 15406462 سياره هههههههههههههههه 




يقول مامعي عربون .. اقول له جاي للسوق تشتري وتبيع ومامعك فلوس في جيبك !!! يقول معي بطاقة الصرافه .. !! عجيب غريب امرهم .. 





الرفاعي : حياك الله والله يعافيك .. ويشرفني ردك في موضوعي 


up 3 down 3
ابو سعود629 4707
قبل 10 سنه



يا رجل الشريطية على سوئهم
الله يحللهم أمام بعض اللي في حراج
أنا عندي موتر يسوى له 20-24 حسب نظافته
لكن بالنسبة لي أقيم اللي معي بـ 21500
المهم نزلت له إعلان هنا في الموقع ويجونك ناس يستهبلون يسومون بـ 9 - 10
ويوم نزلت به المعارض عند الشريطية أقل واحد سام بـ 12 وأكثر واحد بـ 17
وميزتهم فلوسهم جاهزة
بينما هنا في الموقع يجيك واحد ما في باله يشتري أساسا ويقعد يطقطق ويبخس أكثر
من الشريطية أنفسهم !!

يا رجل الحين حنا نسب الشريطية لأنهم يبخسون موتر الواحد ويأثرون عليه نفسيا
ويغبنونه صح ولا لا ؟

أنا بالنسبة لي الشريطية اللي رحت لهم رفعوا معنوياتي
بغيت أصدق إن الموتر حقه بالكثير 17 وإني واهم إنه ممكن يوصل 20-24
الين جاني الشريطي وجربه وفحصه وسامه بـ 17


ترا فيه شريطية يقبلون بالمكسب القليل يعني ينقص من حق موترك 1000
 ويبيعه في نفس اليوم بخبرته وبعضهم ******* يبخسك بالعشرة والعشرين ألف وهو يضحك


عموما المؤمن كيس فطن وكما قال عمر بن الخطاب رضي الله عنه
لست بالخب ولا الخب يخدعني


يعني إذا جيت تبيع موترك نزله هنا ومر به في المعارض بعد وقيس الأمور
ولا تكون طماع ووالله إنك تنزل من قيمة موترك 1000 ولا 2000 اللي ما تجيب لك آيفون
أفضل من أن تبيع ذمتك وتغش أخوك المسلم



up 2 down 1
بياع حراجات 870
قبل 10 سنه



* نقطة أخيرة
في البيع والمشترى إرمي العواطف بعيدا
يعني تجي مثلا تعرض جمس للبيع قيمته 50
يجيك واحد يقول لك والله أنا رجال عندي عائلة ومتسلف 40 و6 من عندي
بعني بـ 46,000 وإحتسب الباقي ولا من هالكلام

قل له مد رجلك على قد لحافك وخذ لك موتر بـ 46 ترا ما نزل عليك وحي تشتري سيارتي هذي
عشان يصير ما تاخذ إلا هي !


up 7 down 1
بياع حراجات 870
قبل 10 سنه



لازم  اقتراح على وزارة التجارة تحط مكاتب تقدير    اخصائيين  في اسعار السيارات   
تبي تبيع   تروح  مكتب تقدير  سعر السيارة  ويقدرونها  لك  بيع  او شراء   وتاخز ورقة او ستيكر  من عندهم  وتحطها على الزجاج  وتنزل السوق
وكده يلي بيسأل  عن سعر السيارة او سوم  يشوف الورقة على الزجاج   وكده  بترتاح من وجع  راس    شريطي رايح وشريطي جاي    كم سيم  في احد سام   كم حدك  وخرابيط  ومدري وشو    


up 9 down 2
abd_alrhmn 2352
قبل 10 سنه



تجربه جميله واستفدت منها  .. لكن ياخوان ولا عليكم امر احد يعلمني طريقه العربون كيف


up 0 down 1
kq11 231
قبل 10 سنه



اساسا اكثر السوق اصبح دلالين وهم الى مسوين الزحمة تحصلهم قبل المعارض بكيلو  

كل مابخس السيارة وجاب للشريطي سعر اقل كل مازادت عمولته 


up 0 down 1
مصرفي سابق 38
قبل 10 سنه



Kq11  وين التجربه الجميله ؟؟ هههههههههه تجربه مريره وانا اخوك عساك ماتطيح في يدهم ههههههههههههه


up 1 down 0
ابو سعود629 4707
قبل 10 سنه



انا في مجالي بلسيارات ماعمري شفت سياره مع سعودي نظيفه وهي موديل السنه
ويبي فيها سعر الوكاله ولاعطوه سومه قال تبخسون سلعتي
خواتها بلسوق كذا صحيح خواتها بلسوق كذا بس النظيف ماهي الجربا ء اللي معك


مثال رح شوف الفوردات السعوديه 2011 ماشيه فوق من 150000 الف وفوقق ويحدها 65000 الف
بينما الامريكي ماشي 30000 الف ميل وضمان وجديد بمعنى الكلمه بلصاله 60 الف وبلمعارض النظيف 55000 الف يزود وينقص حسب جدة يعني ارخص واجد وانا وجميع الشريطيه نفضل الاستخدام الامريكي عشان نظافته اما السعودي فحدث ولا حرج مرمول الوجه وصخ من داخل البدي محكك ولا رش تجميلي ويقول سيمت كذا وهي ماسيمت يعني شي غريب


up 1 down 6
qqq11r 109
قبل 10 سنه



بعدين لولا الشريطيه محد شراء سيراتكم ولا كانت تسوى ريال احمدو ربكم ان فيه شريطيه
وذا على النصب
فصاحب السياره عند البيع انصب من الشريطي لان ه يخفي عيوبها اثناء الاستخدام مايمكن للفحص كشفها من اول يوم
يعني كذوب


up 3 down 16
qqq11r 109
قبل 10 سنه



لمى احد يعطيني سيارته اوديها ابيعها له 

اولا لازم امخمخ قبل اروح السوق 
واتغدى مضبوط واروح وانا مروووق وكاس شاهي منعنع بيدي 

لأن فيه تزبيد بيجي للشريطيه تزبيد يحبه قلبك تبي تستمع بالتزبيد اركب جنبي 

مره عرضت لكزس 460 
بالنسيم حقت عديلي 
ويجي شريطي يسوم ب60 ههههههههههههههه قلت له تبي الجنوط والعلاامات وصورة وانت راكب مو مشكله تم
قال تستهبل 
قلت لا اعطيك اشياء على قد سومتك وش فيك زعلان 
قال واحد جنبه انا بايع موتري قبل اسبوعين ب76 نفس موترك
قلت انت هطف وملعوب عليك وش اسوي لك 
قال الشريطي بعتنا قلت اشتر موتر خويك 

راح وجاني واحد من اخوياه شفته يكلمه 
وقال تبيع ب70 قلت انت بعطيك باب الشنطة والكبوت حلال عليك ب70 
ومعي خويي ميت ضحك 
قال ياخي احس بيجلدوننا وانت تزبد لهم 

ويجي خويهم الثالث ويبخس بقوة قلت تراني سارق السيارة ومعمم عليها 
سرقة 
ونهب 
وتفحيط 
وصدم وهروب 
وتهريب وترويج وكل شيء
قام يناظر ومبهرر عيونه يعنني منصدم قلت انقلع عند خويك قله ماني بايع دون 120 وفارقوني 
ههههههههههههههههههههههههههههههه
الله وكيلك ماعاد شفتهم 

الشريطيه اللي يبخسك ازززززبد له وطير جبهته ترى حلال فيهم هالاشكال والله 



up 12 down 1
xpoldx 1432
قبل 10 سنه



والله مره نزلت المعارض وماشي بالماركيز والا ياشرون قلت خلني اوقف كم يسومون 

ويجيني واحد شريطي قال ب42 الف اذا بودي بلد والثاني يقول 40 الف والفلوس بجيبي 
وكلها حولها 

قلت والله لو ببيع لا اوقفها بمعرض واحط حدها احسن لي 


up 0 down 0
do8sh 208
قبل 10 سنه



موقف حصلي مع اثنين شريطية لابارك الله فيهم و السالفة لها اكثر من عشر سنوات و لليوم ماتروح من بالي ولا انسها ولا اسامهحم

اول موقف يحل لي في حراج السيارات اول مرة بعمري ابيع سيارة المهم اول مادخلت الحراج نشبلي اثنين و انا بصراحة معرف شرطي ولا مستخدم من غشامتي المهم نشبولي وقالو نجرب الموتر المهم جالسين يجربو الموتر ويلفلف الاا قدمنا جيب تيوتا وقف فجاة وصدمة الشريطي بسيارتي فكينا الابواب ونزلنا على انه بنشوف الحادث وش الي صار الا اناضر عليهم وهم يجرون و شردو ولبسوني الصدمة والله ما فتكيت منها الاا ب ريال غير ضرر سيارتي لابارك الله فيهم و الله ينتقم منهم لليوم والله ما اسامحهم


up 1 down 1
ahmed almalik 36
قبل 10 سنه



1300 ريال <<< الارقام كانت مقفلة و منتبهت لها هههههه


up 2 down 1
ahmed almalik 36
قبل 10 سنه



الشريطية عايشين علا الحيلة

واقتناص الناس الجاهلة


up 0 down 1



كيف نبيع ونشتري في السيارات


up 0 down 0
الاستثمار الالكتروني
قبل 6 سنه و 7 شهر



حصل معي موقف بشتري ربع من واحد وابغاء ابيع هيلوكس
ب38 الراعي معرض بعد ماجرب السيارة واقفة جاء راعي
الربع وقال بعطية 34 الف وكمل للراعي الربع الفلوس قلت
انت فحصت وجربت ب38 شلون تقول 34 الف المهم بعته
له وشريت الربع وفوق هذا ماخلني اطلع فيها إلى لم ينقل
الملكية ولا وصلني للشقة على طريقة أخذته كعابي كنت مستأجر
ومافي لاكريم ولا أوبر فعلا مانساء نجاسته


up 0 down 1
راعي الاولة 1 -14
قبل 5 سنه و 4 شهر



ههههههههههه
الله المستعان


up 0 down 0
احبك ياديني
قبل 4 سنه و 8 شهر