أضف سؤال أو موضوع جديد          

قصتي مع طريق السفر

up 26 down 9
moathyaseen 1393
قبل 6 سنه و 7 شهر



السلام عليكم جميعا اخواني
قصتي بطريق السفر الله لا يوريكم شر ولا يحطكم بموقفي
كنت في اجازة بالاردن واخذت معي سيارتي
وانا راجع للرياض لوحدي على طريق حائل
وتانكي البنزين فيه للنص قلت اول محطة اوقف اعبي
ومشيت حتى وصلت للطريق الي يكون 300كيلو ما فيه ولا محطة والمشكلة ان صار البنزين للربع
وما فيه احد بالطريق غيري وكم سيارة المشكلة اني ما اقدر ارجع ولا اقدر اقدم
المهم ادق على امن الطرق واسألهم عن أقرب المحطات الموجودة ودليتهم على مكاني
وفعلا الله يجزاهم الخير ما قصرو وقالولي وقف مكانك وحنا نجي لعندك
المهم وانا جالس اتصل فيهم الا واشوف دوريات قدامي للتفتيش لكن عالجهة الثانية
صفيت بالجهة المقابلة ونزلت اسألهم
قالولي كم تمشي سيارتك تقريبا
قلتلهم ما تتعدى ال 100 كيلو
قالولي خلاص امشي 70 كيلو واتصل معنا بعد ما تتعداها لان فيه محطة على شمالك لكن لازم تنتبه
وامشي 70 كيلو وادق عليهم لاني اخذت رقمهم
وقلتلهم ما فيه اي محطة ما فيه غيري والنجوم
قالولي المحطة موجودة ومتأكدين
المهم بوقتها صابني اكتأب ، قلت هالحين اجلس مدري كم ساعة وصرت افكر الموية بتخلص من عندي ولة لأ
واناظر البنزين الباقي عندي يعني ما يمشيني 50 كيلو الا وبتطفي
بعدها ب5 كيلو جا الفرج شفت اضوية من بعيد
قلت ان شاء الله تكون الي قالولي عنها امن الطرق
بعد 5كيلو ثانية وصلتها والحمد لله
لكن المشكلة انها عالجهة الثانية وامشي عشان الاقي لفة عشان ارجع
ويمكن مشيت كيلو بعد المحطة
بعدها وقفت واتصلت على الرقم الي اخذته من امن الطرق
قلتلهم الحمد لله وصلت لكن المشكلة ما لقيت لفة عشان ارجع
قالولي ارجع لان السياج الي بالنص مهو موجود وبالليل لازم تدقق وتتأكد
واعكس الخط وارجع وفعلا مثل ما قالولي
ودخلت للجهة الثانية ودخلت على المحطة
والحمد لله فعلا مغامرة
لا سمح الله لو انقطعت من البنزين فعلا مشكلة كبيرة
والحمد لله على كل حال
نصيحتي يا اخوان ان اي واحد رايح طريق سفر طويل يعبي من كل محطة يلاقيها بطريقة
ما يأجل ويقول اعبي بعد شوي ومن باب الاحتياط يعبي 10 لتر بجالون ويخليه للاحتياط
بشرط ان بعد الرحلة يطلعه من السيارة
ولا تنسو رقم الطواريء ورقم امن الطرق بالسفر احتفظ فيه بجوالك ما بتخسر شي
طبعا الطواريء 112 ، وأمن الطرق 996
لكن الي استغربت منه اني لمة اتصلت بالرقم 996 اعطاني خطأ بالاتصال
واتصلت بالرقم 112 وحولني على امن الطرق


واعتذر للاطالة







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


هههههههههههههههه غثيت امن الطرق

لو اني من اللي رد عليك اقولك وقف مكانك واجي اسحب منك مفتاح السياره

يعني قالوا لك 70 كيلو وترجع تتصل تقولهم ما لقيت

وبعدين لقيتها ترجع تتصل تقولهم على الجهه الثانيه طيب وش يسوون لك

فيه محطه دبر عمرك وش تبيهم يجون يسوون لك كبري فوق المحطه ههههههههههههه

خلاص شفت المحطه كان احتياطا عشان ما توقف فيك لو كانت مره مصفرة وقف مقابلها واقطع الشارع 

وعبي لك جالون لو ابو 3 او 4 ريال عشان تقدر تروح تدور كبري وترجع مره ثانيه وانت مرتاح


up 19 down 22
ابراهيم التركـي 1067
قبل 6 سنه و 7 شهر



يأخي حسستني انك قاطع النفود الكبير 
ترا عادي بطريق سريع وفيه امن طرق ماراح تموت من الظمأ  هههههههههههه
لكن قطعت البنزين نكبه بأي موقع 


up 9 down 16
المنطق يقول 728
قبل 6 سنه و 7 شهر



يعطيك العافية والحمدلله على سلامتك


up 4 down 1
mohammed-66 111
قبل 6 سنه و 7 شهر



ليش التحطيم الادمي جايكم مرتاع سايسوه بالتي هي احسن 


up 9 down 4
ahamd9477 119
قبل 6 سنه و 7 شهر



وش مرتاع ونسايسه

فرضا طفت فيه السياره بنزين بالخط السريع وين المشكله وين الروعه ما توصل للوسوسة الماء يخلص ويموت

الانسان يعيش بدون ماء اقل شيء يوم وانت بكامل قواك اقلها تقدر تتصل بالجوال وبكامل وعيك

ولا راح تموت الا بعد ايام يعني تتوقع لو انقطع بالخط السريع او غيره المهم بطريق

راح يمر اكثر من 4 ساعات ما احد بيساعده سواء امن الطرق او من الناس

ما توصل لهذي الدرجة يخاف الماء يخلص ويمر شريط حياته قدامه هههههههههه

كان كتب وصاته بعد

وازعج امن الطرق يشوف المحطه بالشارع الثاني يتصل يقول وش اسوي استهبال والله


up 3 down 14
ابراهيم التركـي 1067
قبل 6 سنه و 7 شهر



ي صاحبي افرض انها طفت ،، ليش مكبر الموضوع 
او افرض ان ضرب عليك كفر وما معك استبنه ليش شايل هم 


نزل المرتبه وحط راسك ونام 
وع قول المصريين الصباح رباح 

اتصل على امن الطرق وحط راسك ورقد 
واذا وصلو صحوك 




up 8 down 2
سعدي عبوش 258
قبل 6 سنه و 7 شهر



يعطيك العافية اخوووي ياشينها هالمواقف 
حصلي نفس موقفك لاكنها تيسرت ذاك اليل بين ينبع وجدة




up 4 down 2
الرفاعي33 13914
قبل 6 سنه و 7 شهر



الحمدلله على السلامة 
والحياة دروس وتجارب 


up 3 down 1
starting 1043
قبل 6 سنه و 7 شهر



يوم قريت قصتك تصورة الفلم المهم انت خوفت نفسك كثير عشان كذا تدق على امن الطرق كثير والحمدالله على السلامه

ابراهيم ماتنفع ابد موظف في امن الطرق لو انك بدال العسكري كمخت السماعه بوجه خوينا 

امن الطرق لمساعدتنا وحمايتنا من كل مكروه لا قدر الله لابد يستحملوا الناس .. 


up 12 down 1
yazeed793 7883
قبل 6 سنه و 7 شهر



اولا = الجمد لله على السلامه وصار درس لك في المستقبل 

ثانيا = برد على ابراهيم التركي وعلى باقي الشباب لاتلمون الرجال يمكن ماهو متعود يمسك خط يمكن اول مره وخايف الرجال مجتهد 

ومنزل موضوع على الاقل خفوا عليه شوي 

ثالثا = بنسبه للموضوع انا اي خط امسكه اسوي دراسه جدوى صار مشروع ههههههههههههههه ايه مشروع 

مثلا طريق الرياض جده هذا حافضه حفض اعبي من الرياض من جزالا واعبي المره الثانيه من ضلم المسافه 500 كيلو بظبط 

اما طريق الرياض المدينه اعبي من الرياض اذا وصلت القصيم اعبي وانتهى الامر ونظامي اي مدينه اروح لها اسوي بحث في القوقل عن المحطات 


up 2 down 1
ابو ابراهيم2021 352
قبل 6 سنه و 7 شهر



يا شينه اذا ولعت لمبة البنزين و ما حولك محطه
مع انه مجرد تحذير بس و الله يحتاس تفكيرك و يرتفع ضغطك
خصوصا" لا صار بوقت ليل و انت لحالك
الحمدلله سلمت و الحياة دروس و تجارب
شكرا" على مشاركتنا قصتك


up 7 down 1
أبو نجوى 2442
قبل 6 سنه و 7 شهر



مفروض يكون تنظيم في اماكن المحطات  خاصة على طريق الرياض مكه والقصيم المدينه يعني يحطون كل 250 او كل 300 كيلو محطه


up 3 down 0
نايف مجول القحطاني 376
قبل 6 سنه و 7 شهر



اولا  الحمدلله ع السلامه ،، والمشكله الكبيره اذا  كان معك عوائل واطفال  ،، 
وزد  على ذالك اذا  كان الجوووو  عجاج  او  شديد المطرررررر
هنا  تكون  في موقف  لاتحسد عليه
وبصراحه   انا   اذا سافر  اعبي   بكل محطه  احيانا اعبي  ب7 ريال  
افلل  لان  ممكن  تدخل بمحطه  مامعك بنزين   ويكون  الكهرب مافيه او  البنزين عندهم خالص  

فااا  لازم تتأكد من البنزين  
وايضا   يكون  معك استبنه  
واهم  من هذا  كله  تكووون السياره  جديده  
لان الخطوووووط  هذي طويله  ومقطعه  ولاينفع معها  غير الوكاله ،، اللي يبرد قلبك
   
\\8888888888888
واحد من الربع  يقول كنت مسافر على سياره  خرده  معي عائله  واطفال  ورضع ،،
طلعت المغرب  الخط400 ك  سريع   بعد  50 ك  يقول ضربنا عجاج ماتشووووووف يدك
والسياره  بدأت  تقطع   وعزمها يضعف  والعجاج قوووي جدا  جدا ماتشوف تمثال السياره 
يقول    بصراحه   ندمت اني ماشريت  سياره وكاله  وريحت نفسي وعيالي ،،  
وادعي ربي انه ينقذني  من هالموقف ،،   
المهم يقول الورعان   انكتمووو  ،،  من العجاج  والسياره تمشي بشويش  والعجاج قووي ،،  
حتى وصلنا ،، ولله الحمد 
ونوى الرجال ع موتر جديد   ولاكن بعد فترررره   مدري عنه رجع  ماشرى سياره  
الظاهر لازم  ياكلها  صح  ويتعطل  بالخط  علشان يتشري وكاله ،،،،،،،،،،،،،،،،،،،،،،،
  


up 1 down 3
خالد الاسكندر -40
قبل 6 سنه و 7 شهر



والله انك خواف
وين انا كنت اسافر سفرات يمكن حدود 800 كيلو وعداد البنزين خربان


up 1 down 3
فيـfaisalـصل 23
قبل 6 سنه و 7 شهر



بس كنت امشي على حبسي يعني اذا قرب ينتهي البنزين اوقف و اعبي فل


up 1 down 0
فيـfaisalـصل 23
قبل 6 سنه و 7 شهر



انا مع هذا الخط.  3 سنوات سردادي مرداي…  من يوم تطلع من حايل.  ما فية محطات غير جبه علئ بعد 110 كيلو.  وتنزلهاااا نزول. ..  وبعدهاا جبه 60. فية محطة داخل النفود 2 كيلو طريق صحراوي.  بالليل. تشوفهاا مع الخط كانهااا عرس. وبالنهار خابرن فية لوحة.  


up 1 down 0
ابوحاتم6 469
قبل 6 سنه و 7 شهر



يارجال الحمد الله على سلامتك

والواحد يتعلم من اخطائه ولازم يواجه مثل هل الامور بالعكس تعتبر درس لك

لاكن نصيحتين لك للفايده

اذا انت على خط سفر وكل ماوصل البنزين على النص حاول توقف وتعبي بمحطه فل مره ثانيه امن لك بعد الله

والشيء الثاني لاوقفت المحطه لاتطفي السياره وانت ماسك خط وتعبي بنزين عب بنزين والسياره شغاله

لان لو طفيتها والموتر حار وماسك خط يكون الزيت مرتفع ويسبب لك مشكله بالمكينه خل الموتر شغال وانت تعبي

بالخطوط اما داخل البلد الامر عادي لان دعساتك ماتكون دعسه وحده وتوقف اشارات فتكون المكينه مريحه

والحمد الله على سلامتك

موفق يالغالي


up 3 down 1
amear 1347
قبل 6 سنه و 7 شهر