قصتي مع احد الكهربائين النصابين وكيف اخذت حقي منه
34
6
إضغط هنا للإخفاء
السلام عليكم يا شباب اسعد الله اوقاتكم بكل خير
ما زلنا نعاني من نصب الورش وغشهم لنا بكل جرأة ووقاحة،،،،،فأوصي نفسي واياكم يا اصحاب الورش بتقوى الله وتجنب المال الحرام لانه مهلكة في الدنيا قبل الاخرة
ندخل في الموضوع،،،،
قبل ٢٠ يوم تقريبا رحت بسياري الافيو بعد العشا لصناعية ام الحمام في الرياض عشان اصلح المكيف،،،ومع حظي المعفن طبيت في ورشه اللي على يسار ورشه الصالح،،،،فيها كهربائي يماني اسمه سريع،،،اتفقت معاه يغيرلي كمبريسور وليات وغسيل مجاري وتغيير رديتر مكيف + فريون ب450 ريال
قلتله خلاص توكل على الله،،،،وجبتله كل القطع بنفسي،
المهم،،،،خلص تركيب الساعه١١ وجينا نشغل المكيف وعيا يشتغل!!،،،المواصير مثلجة ولكن مافي برودة تدخل للسيارة!!
وجلس يحاول ويدور واخر شي قالي عندك ثلاجة المكيف مسدودة لازم نفك الديكور كامل وننظفها لك ب٣٠٠ ريال،،،،هنا انا ما اقتنعت بكلامة لانه المكيف كان شغال ودفع الهوا ممتاز،،،قالي هذا الحاصل ،،،هنا انا استسلمت وقلت الشكوى لله
قالي خلي السيارة عندنا وتعالنا بكرة الظهر تكون جاهزة
ثاني يوم الصباح الساعه ٨ ونص دقيت عليه قالي سيارتك جاهزة تعال استلمها! رحت استلمها وقالي نظفها الثلاجة من الجمب فقط يعني ما فكينا الديكور
وقالي حسابك ٦٥٠ مع تنظيف الثلاجة،،،قلته مو مشكله وسويلي فاتورة
واخذت السيارة وكان تبريدها ثلج،،،،،،،قبل اسبوع المكيف صار يطلع هوا رطب ماهو بارد مرة!،،،،،،،فيوم الجمعه الصباح جهزت عدتي ونزلت للسيارة الصباح بدري وشيكت عالثلاجة الا واحصلها مسدووووودة بطين ووصخ شي موو طبيعي! يعني النصاب ما غسلها ولا سوا شي
المهم جبت بخاخ موية بس للاسف ضغطه ضعيف وجبت فرشاة اسنان وطولتها لمفكات وجلست انظف الثلاجة بنفسي وطلع وصخ كثيييير
ولكن برضه التبريد لا يزال ضعيف
امس بعد المغرب طلعت من النادي ورحتله وقلتله التبريد صار ضعيف وفحصت الثلاجة وقالولي انها وصخه!،،،،جلس يحلف انه غسلها ومدري ايش وواثق من نفسه،،،،بعد الاخذ والعطا قالي انا نفضتها بهوا لانها ما تنغسل بموية!!!قلتله الحين تضحك علي تحسبني بهيم؟ ماخذ ٢٠٠ ريال تنفيض هوا!
قالي ولا يهمك الحين بفكلك الثلاجة وانت تاخذها تغسلها وما برخذ منك الا قيمة الفريون،،،،،،قلتله شوف،،،،،اما ترجعلي ال٢٠٠ ريال اللي اخذتها بدون سبب،،،او اني باخذ تقرير من اي اخصائي تكييف وباخذ فاتورتك وبشتكيك للشرطة وبجيب كفيلك!
قالي روح اشتكي،،،قلتله ابشر،،،ورحت ركبت السيارة ولحقني وقالي عطني الفاتورة وارجعلك ال٢٠٠ قلتله على تبن،،،،،ماني معطيك اياها وبروح اشتكيك الحين،،،،جلس ينابح شوي وبعدها عطاني ال٢٠٠ ريال وقالي عساك تروح حديد انت وسيارتك،،،قلتله هههههههه طيب طيب
هذه قصتي يا اخوان،،،فايش رايكم هل انا ظلمته او غلطت بشي؟
واعتذر عالاطال،،،،وهذه بعض الصور اثناء محاولتي لتنظيف الثلاجة
اخوكم طارق التلي
إبلاغ
سيارات للبيع
الردود
الكمبريسور حق بلده، ب٩٥٠
عندي القديم تبغاه كلمني عالواتساب وما بختلف معك 0568882834
0
0
قبل 7 سنه و 7 شهر