أضف سؤال أو موضوع جديد          

هل سيارتي تستحق مبلغها

up 27 down 17
a.ibrahem 3167
قبل 6 سنه و 5 شهر



السلام عليكم ورحمة الله وبركاته

وش اخباركم طيبين ؟؟؟

بدخل في صلب الموضوع على طول بدون مقدمات ، الموضوع ذا طبعاً كتبته لما بدأ ينفض صبري عن جهل بعض الناس في السيارات والمشي ورا حكي شريطية وناس جاهله تردد ما تسمعه بدون التأكد من صحة هالكلام .

باختصار الموضوع ان نسبة 80 % ويمكن اكثر من الناس للاسف مايعرف يختار له موتر وبقول لكم كيف :

مثال تجي لواحد مثلن معه 100 الف زين وقال لك مثلن والله انا باخذ كامري فل ولا اكورد سبشل ولا اوريون ستاندر ولا سوناتا نص فل

تجي مثلن تقول له خذ لك افلون ، كادينزا ، ازيرا افضل لك ستة سلندر وافخم لاشك من ذولي واحسن لك عزل ومركب وقيادة الخ ...

يبدأ يعطيك الجمل المتكررة هذي متوفرة قطعها ، ومايطيح سعرها

طيب قبل ما تقول هالجملة وتحكم على هالسيارة ان مهيب متوفرة قطعها او يطيح سعرها هل انت كلفت على نفسك وسألت عن قطعها متوفرة ولا لا وعرفت الاسعار هل هي مناسبة ولا لا ؟؟؟

كثير من الناس معه مثلن كامري او سوناتا وجاء يشتري قطعه معينة وانصدم ان سعرها حول سعر قطعة الازيرا او سيارة اخرى افخم منهم يقول لك لو اني داري شريت ذي

طيب ليش ما تكلف على نفسك وتروح وتسأل وتكتسب خبرة عشان تنتقي افضل سيارة لك بالمواصفات والفئة وبالمبلغ اللي معك هذا اولاً

وثانيا :
بالنسبة لمسألة تمسك سعرها

يعني كثير من الناس يعترف ان مثلن الكادينزا والافلون والازيرا اريح وافضل قيادة وعزم من الاكورد والكامري والسوناتا وطقتها واريح مركب لكن يشتريها يقول لك تمسك سعرها

يعني اسألك بالله راحتك في القيادة ومتعتك على الخطوط بسيارة فارهه وراحة عايلتك في المراتب والرساوة والعزل والعزم كلها ماهمتك

وهامك كم الف بتطلع لك لين جيت تبيعها بعد خمس سنوات !!!

انت تشتري لك ولا للناس

انت ماتضمن تعيش بكرة عشان تقول لين جيت ابيع بعد خمس سنوات ، وايضا ماتضمن ان ذا الموتر يبقى معك يمكن يروح تالف وفي النهاية ما استفدت لاذي ولا ذي .

خلاصة الكلام وعشان ما اطول عليكم انك لاجيت تشتري موتر لاتصير روتيني اني خلاص هذي كل الناس تمدحها وعشانها منتشرة بكون مرتاح وحشر مع الناس عيد

ياما فيه سيارات واجد منتشرة في الشوارع وفيه سيارة ثانية بنفس سعرها وأقل منها عيوب مصنعية وافضل منها كجودة

يعني عشان محد يقول اني انا متعصب لشركة معينة السوناتا مثلن الشكل الجديد سعرها بسعر ازيرا وكادينزا وللاسف فيه اقبال كبير عليها ما نقول سيئة بالعكس حلوة جداً لكن ليش ما انتقي لنفسي الافضل لاشك ان الازيرا افضل كجودة واقل عيوب مصنعية واكيد افضل في القيادة والعزم والعزل والفخامة وكذلك الكادينزا ينطبق عليها نفس الكلام

لكن بعضهم تلقاه شرا السوناتا عشان شافها في الشارع واجد وعارف انها اربعة سلندر وان شاء الله بتكرف معي
وينصدم اذا جاء لقطع الغيار ان اغلب القطع حول الازيرا بفرق 50 ريال ولا اقل لكنه متخوف عشان الازيرا اخاف انها ما تصبر وستة سلندر ويخاف ان تجيه مشاكل كهرب


للاسف لين الحين فيه ناس يعتقد الاربعة يكد اكثر وان الستة حساس ترى هذي اعتقادت خاطئة وكلام شيبان وللاسف مافيه من الصحة ابد

يعني لابغيت تشتري اسأل الناس الخبرة واللي تفيدك بكلام معقول مهب كلام روتيني مكرر توفر قطع تمسك سعر شعبية



انا اسف اني طولت جداً في الموضوع لكن لعلى وعسى بكلامي هذا اني اصحي بعض الناس اللي حاط على عيونه غمام ويدفع مبلغ في سيارة مايفكر ان فيه خيارات ثانية افضل له واريح له ويمكن يحمد الله انه شراها ولا خذا اللي كان حاط عينه عليها

المعذرة على الاطالة ، تحياتي لكم واتمنى تتقبلون كلامي بصدر رحب














إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


صراحه كلامك سليم......



up 2 down 0
المناخ 626
قبل 6 سنه و 5 شهر



كلام جداً جميل و في منتهى الروعة 

أنا توني شاري سيارة وأستمر البحث عن السيارة المناسبة تقريباً شهرين ونص ..


مابين بحث وتجربة ومقارنة أسعار 

فـ الاخير احترت مابين 

جيب الفولكس واجن ( طوارق )
أو 
المازدا ( CX9 ) 


واستخرت و اخترت المازدا 
لان شكلها سبورت أكثر من الطوارق وسعرها جميل جداً مقارن بمنافسي المازدا 


وبصراحه خلال بحثي ابتعدت عن اللي قلته في موضوعك 
( كلام شيبان )


سيارتي السابقة كانت سوناتا 2009 

يوم شريتها 
كلن قال وشوله تشتريها يطيح سعرها وكوريه ماتسوى 
قلت طيب هذا ذوقي ولا عليكم 


المهم كرفتها كرف لدرجة أطب فيها البحر وأطعس فيها 
وكل مايخطر في بالك سويته 
يعني باختصار وسعتي صدري عليها ولا فكرت اني احافظ عليها عشان لين جيت أبيع 

المهم 

انت تشتري موتر عشان تفلها وتوسع صدرك وصدر عيالك 

انبسط و اشتر اللي تبي 
وفـ الاخير الموتر عليه ضمان 

يعني ريح بالك 


آسف عـ الإطالة لكن أُعجبت بالموضوع 
والله يعطيكم العافية جميعاً ^_^


up 3 down 1
بـندر 99 77
قبل 6 سنه و 5 شهر



انا صارت معي شخصيا 
انا شريت التيما الشكل الجديد و المهم ان كل ما قلت لاحد ابشتري هذا الموتر قال لك 
تتفكك و تتهربد
ولا القطع غالية
ولا ما تمسك سعرها (ابغض كلمة )
المهم ان كل اللي قالوا لي هذا الكلام ولا واحد منهم يملك الموتر 
و أسأل اصحاب السيارة اللي امتلكوها 
و كلهم يمدحون فيها 
و بقت سالفة قطع الغيار و اروح للوكالة و اطلع فاتورة ب القطع الاستهلاكية و البدي 
و اتفاجئ بالسعر بأنه عكس ما قالوا و ان القطع اسعارها معقولة 



و الشئ الثاني ان قير الموتر CVT و اغلب الناس يقولون انه قير ابو كلب مع انهم ما جربوه 
مع اني اشوفه قير ممتاز يعني من ناحية صرفية البنزين و استجابة اسرع و rpm اقل لاني امشي بسرعة 180 و rpm على الثلاثة 
و تحت 
و للعلم شركة للكزس تستخدم نفس هذا القير على LS600 و شركة اودي تستخدمة و الهوندا و الهيونداي 
و شركة نيسان 



up 4 down 0
5alaf 694
قبل 6 سنه و 5 شهر



اخوي المناخ شاكر لك مرورك وشرفتني يا غالي

اخوي بندر 99 فعلن كلامك صحيح 100 % انا ياما جو في وجهي معارضين لما جيت اشتري اول سيارة وحتى ثاني سيارة له يقول لك ما تصبر ومدري ايش وكوري وهم بنفسهم لما ركبوا معي وشافوا استخدام وجودة السيارة وتحملها تغيرت وجهات نظرهم

مثال : لما شريت السوناتا عام 2010 كان موديلها طبعاً 2006 امريكية تخيل ماشيه 240 الف ويعتبر ممشى مهب بسيط على موتر ماله الا اربع سنوات لكنها نظيف بمعنى الكلمة ، يوم شريتها اللي قال لي حدها 300 الف وتخبط معروف الكوري واللي قال لي الامريكية حرارة لكني سافهم لاني ولله الحمد عندي ثقة في نفسي وفي اختياري وخلفية بسيطة في السيارات ما اقول لك خبير

تخيلت جلدتها 3 سنوات خط ، توقف في بريكات الكلية ساعتين ونص ثلاث ساعات والله حرارتها ماتحركت شرطة

وصلت معي الى 310 الف بدون مشاكل ولله الحمد ومكينتها نظيفة لا تنقيص ولا دخان ولا تفتفة ولا غيره

بعدها حمدت ربي اني مشيت برأيي بعد الاستخارة واني سألت وعرفت

يعني لو اني ماخذ لي بقيمة السوناتا الالنترا وكنت باخذها هل بكون مرتاح فيها مثل السوناتا الامريكية ؟؟؟

الجواب اكيد لا هذي فيها ثبات الكتروني 8 ارباقات في الخطوط ما شاء الله اطربتني رغم انها اربعة لكن رساوتها حلوة عزمها مقبول
اشكرك اخوي بندر على الاضافة



up 0 down 2
a.ibrahem 3167
قبل 6 سنه و 5 شهر



طريقه انك تشتري سيارة جديده :
1/ حدد الميزانية 
2/ حدد نوع الاستخدام 
3/ توافر و رخص القطع الاستهلاكيه و سهوله الصيانه .
4/ يفضل توافق الاستخدام مع عدد افراد العائلة .
5/ لا شخص ما جرب ولا تحكم عليها من شخص او اثنين او عشره لان السيارة تمشي و تعيش حسب الاستخدام .

الكوري يعيش اذا عاملته صح يعطيك اكثر من الي انت تعامله و كلامي من تجرب مع العائله 3 سيارات من موديل 97 حتى موديل 2011 


up 1 down 2
khalidoo 1167
قبل 6 سنه و 5 شهر



موضعك في الصميم ليش افكر كم ببيع السيارة بعد كم سنة قبل ما اشتريها
غالب السياراة ينزل سعهرها
اذا حد سئلني بقول اسئل المجربين فقط
ولا تشتري الا السيارة الي في بالك وبخاطرك يعني شوف ميزانيتك واحتياجاتك وخذ فكرة عن السيارة
اما اشتري سيارة عشان تمسك سعرها وراحة ورفاهيةة ما في ما اسويها
+1


up 1 down 1
sniper_sa82 307
قبل 6 سنه و 5 شهر



كلام سليم

اهم شي تكون انت مقتنع بالسياره اللي تبي تشتري وخل عنك كلام الناس اكثرهم يفتي من راسه وتلقاه متعصب لشركه وحده متوارث التعصب




up 1 down 1
mohhmd5454 59
قبل 6 سنه و 5 شهر



كلام معقول والله.... ما الفائدة من انك تشترى سيارة وتنظر لسعرها عند البيع وانت لسة ما تمتعت بها ولا ركبتها .....اشترى ما ترتاح له نفسك ويطيب خاطرك ..والله يخلف عليك عند البيع بأفضل منها


up 1 down 1
elhapal 274
قبل 6 سنه و 5 شهر



صراحه الموضوع عجبني كثير


up 1 down 1
m9rg31 46
قبل 6 سنه و 5 شهر



صراحة موضوع جميييل جداً وجزاك الله خير 


up 2 down 1
abo abdulah 909 3
قبل 6 سنه و 5 شهر



شف كل شيء اشره من قولك شيء بس الى الامريكي ييطيح سعره وماينباع بسرعه وبس 


up 1 down 1
selvstr 2
قبل 6 سنه و 5 شهر



اخوي بدي اياك بموضوع بالخاص لو سمحت 


up 0 down 0
mohammed.sabri
قبل 6 سنه و 5 شهر



ابشر يا محمد صبري ماطلبت شي


up 0 down 0
a.ibrahem 3167
قبل 6 سنه و 5 شهر