أضف سؤال أو موضوع جديد          

موتري يخرب ام قطع استهلاكية

up 15 down 11
a.ibrahem 3167
قبل 6 سنه و 5 شهر



السلام عليكم ورحمة الله وبركاته ،،،
أسعد الله مساءكم وصباحكم جميعاً عساكم بخير ؟؟؟

ندخل في صلب الموضوع على طول ، للأسف بعض الناس مايعرف يفرق بين تغيير القطع الاستهلاكية وبين الخرابات

يعني تجي لواحد اخوه ولا خويه ولا هو معه السيارة الفلانية ويقول لك ياخي انا كل شهر تخرب علي السيارة ولا فلان دايم يخرب موتره تقول له وشلون ؟؟؟ يقول لك الآتي :
الشهر الماضي صار عنده احتكاك ورجه وهو يهدي غير فحمات وخرط هوبات
الشهر اللي بعده تفتفت السيارة وراح يغير بواجي
بعدها بأسبوعين حس بكتمه في السيارة وصار يبي لها صفاية بنزين
اليوم الثاني جاء يشغل الصبح ما اشتغلت يبي لها بطارية


ويبدأ يعطيك السيناريو كامل انا في نظري هذي ليست خرابات هي صحيح بعض الاحيان تعيق السيارة لكن من الطبيعي تغييرها في أي وقت

لابد التفرقة بين الخراب وتغيير القطع الاستهلاكية يعني بعض الناس يغير زيت ويعبي بنزين ويشيك سوايل ويمشي ويجلس الموتر صابر سنتين سنتين ونص ثمن يدقر له في شي يا تفتفه يا صوت احتكاك وهو يهدي ثمن يقول موتري خرب او خرب كل شي مع بعض وكلاني أكل

طيب انت لابد يكون عندك سياسة تتبعها في الصيانة بمعنى : ( انا اعرف موتري واعرف وش غيرت وش ماغيرت ومهب لازم ما اغير القطعة الا لما ينهبل الموتر واجمع على راسي اشياء واخرتها تدفع لك حدود 5000 ولا 4000 صيانة بس )

يعني فحمات الحين ركبتها خلاص انساها سنة ان شاء الله قدام وطبعاً على حسب السيارة وعلى حسب استخدامك اجي للبواجي غيرتها وحسيت الصفاية على حروه اغيرها مررره وحده واشيك على السير عشان ما ارجع مررة ثانية لين غيرت ذولي كلها او شفت التالف او اللي بادي يتلف وباشرته كذا ترتاح

يعني لو جاء احد سألك بعدين الشي الفلاني عندك زين تقول ايه توني مغيره من كم شهر عضلات توني مشيك عليها اعرف وش يحتاج موتري او وش بيطلب بعد فترة بحكم اني لي فترة مركب القطعة الفلانية .


------------

القسم الثاني :
الخرابات اللي بدون سابق انذار مثل ( تهريب في زيت المحرك ، تهريب طبة الموية ، خراب احد الحساسات المهمة بدون سبب واضح )

طبعا هذا النوع من التلف غير متوقع وبدون مقدمات يحصل ويعتبر خراب من الدرجة الثانية لأن فيه خرابات تعتبر قوية جداً واهم من ذلك

يعني لاتجي تقول موتري يطلب قطع كل فترة وانت جالس تغير قطع استهلاكية هذي عمرها مالها دخل في الخرابات اللي تواجه السيارة او الاعطال نسميها

وبعض الناس للاسف هو اللي يجيب الخراب لسيارته امثلة لذلك :

1- اللي يهمل لك فلتر المكيف الداخلي ويغبر ولا يغيره لين يضعف دفع المكيف ويقول لك والله توسخت الثلاجة واظطريت افرغ الفريون وانظف وخسرت واخرتها مارجع المكيف مثل أول طيب شف اهمالك في تنظيف الفلتر وتغييره قبل او بداية تلفه تسبب لك في هالاشياء ( المشكلة انه شي تافه يعني فك الدرج ونظفه وشفته وسخان جبه معك تغييرت الزيت الجاية مايبي لها شي ، وحتى مهب انت اللي بتفكه البنشري ولا ياخذ منك ريال لكن الناس هنا عندها مفهوم لاتغير لين يخرب او ما ابي اتعبث في السيارة وتخرب وهذا خطأ )

2- اللي يهمل لك فلتر الهواء حق المكينة وينظفه كل مررة تقول له غير يقول توه طيب هذا ممكن يدمر لك البوابة ويخرب حساسات القربة واخرتها تدخل في متاهات او تلقى اذا شغل الصبح يقول لك موتري يلعب ظغطه

خلاصة الكلام واعتذر منكم على الأطالة لكن حبيت اوضح لكم طريقتي في التعامل مع السيارة وان شاء الله يستفاد منها واللي عنده اضافات ما نستغني عن اقتراحاتكم .

انا سياستي في التعامل مع السيارة خلاص شيك على العضلات مافيه تالف او بداية تلف انساها فترة لأني خلاص عارف بعد نقول 8 شهور اكثر بشوي وعلى حسب الاستخدام بديت احس بقربعه ولا كليت لي حفرة سببت لي مشكلة اشيك وان لقيت شي على بداية تلفه اغير والصاحي اخليه لأني بكذا بنساها ان شاء الله بعد فترة معينة لكن ما اجمعها على راسي مساعدات تخر وكراسي تقربع ثمن لين خرب المقص ولا شي آثر في السيارة بشكل كبير رحت غيرتهم كلهم واخرتها مايرجع لي مثل اول

وكذلك القطع الاخرى بواجي صفاية السير كلها تقريباً نفس المبدأ


تحياتي لكم جميعاً
اخوكم / احمد بن ابراهيم







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



سيارات للبيع

الردود


عند الكثير اعتقاد ان جدول الصيانة الدورية وضع عشان يسرقنا لكن في النهاية الصيانة الدورية توفر عليك على المدى الطويل و تطول عمر القطع 

الفرق المهم بين القطع الاستهلاكية بعضها عمرها قصير مثل الفحمات الامامية لسيارات تويوتا 20-25 الف والفحمات منتهية غيرها مثل هيونداي كيا تعمر 60 الف يعني كل 3 تغييرات بمرة تغير غير توفير اجور اليد و الوقع الضايع في الورش


up 1 down 1
super x 175
قبل 6 سنه و 5 شهر



كلامك صحيح يا superx تصدق اخوي معه لكزس es2013 ما كمل الموتر سنة ونص غير طقم فحمات قدام وورا


واللي قاهرنا انها تسود بالجنط يطلع زي البراد


المشكلة طول السنة هذي الموتر كله ممشاه خطوط واخوي دوامه اشارتين وهو واصل يعني ما يصادف زحمات او شي بس الشكوى لله


السوناتا اذكر جلست معي سنتين وسبع شهور وغيرتها كذا من راسي لقيت فيها الربع او اكثر يعني كانت تمشيني شهرين ثلاث شهور زيادة


لكن انا لما تكلمت عن القطع اقصد كل شي مهب بس الفحمات لكن للاسف البعض يجهل الشي هذا


شاكر لك مرورك ، بالتوفيق


up 1 down 0
a.ibrahem 3167
قبل 6 سنه و 5 شهر



صادق والله 
انا غيرت قماشات امامي قبل سنة و 3 شهور للازيرا الشكل القديم و جيت بغيرها لقيت فيها نص عمر 
مع اني مشيت عليها 50 الف و زود و خطوط و بلد 
و سعرها وكاله 160 مرررره يا بلاش 

و كان معي كامري 98 و الله كل 6 شهور اغير اقمشه و كان سعرها 140 



up 2 down 1
rraammooss 965
قبل 6 سنه و 5 شهر



^^ والله حتى انا الفحمات عندي تسود الجنط 

كل ما اغسل السيارة انقهر تقعد يوم يومين السيارة كلها نظيفة والجنط اسووود 

رجعت رشيت الجنوط اسود مطفي وارتحت من المشكلة نهائيا 

منها شكل رياضي و احلى وارتاح من السواد


up 1 down 0
feroo li 1816
قبل 6 سنه و 5 شهر



كثير من الناس ما يفحص و لا يراقب وبس زيت و مويه و بنزين و هذا غلط كبير لان اذا كنت تراقب الصوف و جلد السيارة و الاذرعة كل بين فتره و الثانية راح تنتبه ان صار فيه شقوق بسيط ثم تبدا تحسب حساب القطع بعد فتره انك لازم تغيرها .

صن السيارة وقت الرخاء تصونك وقت الشدة 

بعض من الناس يقول سيارتي صارت تقرقع فجاه او المساعد يصرصر او كانت تفتف ثم صارت تقطع و تهتز المكينه او طفت خربت عليه فجاه في سفر او بر .

- الخراب الفجاه في الغالب كهرب السيارة . اما التهريبات او غيره لها مؤشرات و دلائل في كثير من الاوقات .


up 1 down 0
khalidoo 1167
قبل 6 سنه و 5 شهر



امكن سؤال انا عندي صني الشكل القديم قبل 2012 ومايجي معها فلتر مكيف من الوكالة
رحت سويت منع دخول الهواء من خارج السيارة وماشغل مكيف فيه ضررر؟


up 1 down 0
ibo3276 448
قبل 6 سنه و 5 شهر



كلام ممتاز حقيقه وانا صار لي مثل هالشي اهملت السياره والان مااخذه حول 5000 الاف ريال قطع وشغل يد 
لكن تعتبر درس لي في المستقبل 
اشكرك اخوي صاحب الموضوع 


up 1 down 0
ابو سامر1400 20
قبل 6 سنه و 5 شهر



حياك الله يا ابو سامر 1400 وتشرفت بمرورك

واشكرك اخوي khalidoo على الاضافات الجميلة


بالنسبة لاستفسارك اخوي ibo3276 فيه سيارات واجد مايجي فيها فلتر داخلي بس الخارجي عندك اليوكن حقنا 2001 فيه فلترين يجي له من 2002 اعتقد او 2003 ماعاد فيه فلتر لين 2006 الشكل الجديد 2007 مدري هو فيه ولا لا

الفرود كذلك لكن دام الوكالة مصممتها كذا الشكوى لله ولو انه في نظري غلط لأنه يحفظ الثلاجة من دخول الاتربة


انا اذكر السوناتا اللي كانت معي وهي 2006 ماشاء الله تبارك الله ماقد شغلت مكيفي ريحته غبار ولا خياس لاني كنت محافظ اول بأول على الفلتر وسعره بعد رخيص 15 ريال الله يديم الرخص


تحياتي لكم


up 0 down 0
a.ibrahem 3167
قبل 6 سنه و 5 شهر



يالبى القديم ماعرفنا قطع استهلاكيه الا بالسيارات الجدد 

ولا اول الموتر يمشي ١٥٠ الف ثم يطلب فحمات 


up 0 down 2
أبو ناصر 60
قبل 6 سنه و 5 شهر