مع حرارة الجو ... هل من مقترحات لمكيف ابرد

الله يعطيك العافيه عالمعلومه ... الكبرسر كم ضغطه الطبيعي؟

مافي حل لتقوية التكييف اذاصلحته ورجعته لوكالته اكثر من كذا مايبرد

لكن في بعض النصائح تساعد من تخفيض الحراره

حاول ماتوقف السياره تحت الشمس مباشره

نسم القزارز الامامي اليسار والخلفي اليمين حتى تسمح بتدوير الهواء داخل السياره

البعض يضع قارورة ماء مفتوحه بالمنتصف صراحه لااعلم مدى فاعليتها لاني ماجربتها للامانه

تركيب عازل حراري اذا الامكانية تسمح

عند تشغيل السياره شغل المكيف وانزل الشبابيك حتى تطلع حرارة السياره الداخليه لمدة 3دقائق ثم ارفع الشباك

عشان تزيد فعالية التبريد نظف الثلاجه والرديتر وصيخ رديتر الماكينه لانه كل ماانخفضت حرارة السياره زاد تبريد الكمبريسر بالاضافع لعملية تنظيف الثلاجه ورديتر المكيف راح تتحسن البروده

هذي اهم النصائح لظمان كفائة نظام التبريد

مين اللي حاطه لك ٥٠ هذا ينفجر !!! اقصى شي ٣٥ ياحبيبي

ضغط الفريون يعتمد على مده استخدام الكمبرسر اذا كان جديد توك مركبه فتخلي ضغط الكمبرسر على 32
واذا الكمبرسر عندك من مده اكثر من 3 سنوات فتخلي ضغط الكمبرسر على 35 واذا هو معك اكثر من 6 فتخلي الضغط على 40
كلما صار الكمبرسر جديد فهو نفسه الكمبرسر يكون ضغطه قوي ومايحتاج تزيد فريون فوق 32 وكلما صار الكمبرسر اقدم صار ضغط اضعف فيحتاج تزيد كميه الفريون داخل دائرة التبريد لتعوض ضعف الكمبرسر بضغط الفريون

السياراه التيما ... 
شكرا على المعلومات ... من دخل الصيف شغلي الشاغل المكيف 
لانه مرت علي سيارات مشاءالله تتمشى بعز الظهر ومكيفها يعطيك 

بالنسبه للكمبرسر لو اغيره بيفرق ببروده المكيف ولا مايفرق كثير خصوصا انه مكلف

1/ غير فلتر هواء المكيف باصلي 
2/ تنظيف الثلاجه يسهم في التبريد .
3/ تنظيف مواصير الفريون و صافيه الفريون اذا كانت موجوده .
4/ تعبيه الفريون بالضغط او الوزن المطلوب . اذا زاد ما يبرد و اذا قل ما يشبك الكمبرسر اساسا.
5/ اعزل مواصير المكيف البارد ما عدا المفصلات الي تجي بين المواصير للتبادل الحراري .
6/ فل ليات المويه الحار ما لها دخل بالتبريد و السبب ان فيه صمام يسمح بمرور المويه الحاره للداخل يعني ان المويه اللي داخل دايما بارده بسبب انها معزوله عن مويه المكينه و ول كانت المويه تدور دايما كان المكيف ما يبرد لان الحرارة تنتقل من الجسم الحار الى البارد فا المكيف ما راح يبرد اصلا لان حرارة مويه المكينه اعلى بكثييير من حرارة التبريد نفسه فا يطلع مويه حاره اصلا .
7/ نظف رديتر المكيف من الاوصاخ اللي عالقه فيه و اذا كان صيني فا ما راح يبرد او ما راح يبرد صح لان قابليه المعدن الرديء للبروده اقل من المعدن الاصلي .
8/ تاكد انه عبى لك الفريون اصلي ولا تكتفي بالكتابه اللي على الكرتون لازم تشوف الدبه نفسها مكتوب عليها و احيانا يغشون يحطون نوعيه رديئه في دبه الاصلي .
9/ ظلل السيارة .
10/ لا تخليها في الشمس .
11/ لا تحط البروده على اقصى تبريد لان الكمبرسر راح يفصل لانه ثلّج 

هذا الي اعرفه و ان شاء الله الاخوان بيفيدونك اكثر 

^^^

فك الثلاجة لحاله يحتاج يوم كامل وبمبلغ حوالي 1000 ريال مع الفريون

ردك بالنقطة رقم 11 لا تحط المكيف على ابرد شيء لان الكمبروسر ما راح يفصل

فيه كمبروسرات اصلا نظامها ما تفصل وتشبك مثل الكامري 2007 وطالع

ومثل اللومينا ومثل كثير من السيارات الكمبروسر دعسة وحده لا يفصل ولا شيء صحح معلوماتك

رودك بالنقطة رقم 6 ان فصل الماء الحار ما له دخل

اقولك بعد صحح معلوماتك

الماء الحار يكون موجود بالثلاجة ويمر معها وهذا يقلل من البروده

والكمبروسرات اللي تفصل وتشبك مثل الكورولا والفورد والكامري 2006 وتحت وغيرها

تلاحظ كل ما فصل الكمبروسر تقل البروده بشكل ملحوظ واذا شبك يرجع بارد

ولكن لو تفصل الماء الحار ما عاد تدري عنه فصل او لا

لانه يفصل الكمبروسر والثلاجة تبقى بارده حتى يشبك مره ثانيه

لكن مع وجود الماء الحار مجرد ما يفصل الثلاجة على طول تصبح حاره لأن ليات الماء الحار يمر معها

ابراهيم التركي اود منك توضيح المعلومة بخصوص السيارة اللي فيها ماء حار والمكيف ما يفصل هل افضل اني افصله حتى احصل على برودة اعلى ؟
او اتركه ؟ 

سيارتك وارد امريكا ؟
على العموم اذا كانت السياره معك في الليل المكيف ثلج وهو على الشرطه الاولى
وفي الظهر تحطه على الشرطه 2 و 3 يكون برودته معقوله فالمكيف طبيعي ومايحتاج تصلح فيه شيء

السياره اذا كانت وارد امريكي شف نظام المرواح وخلها مثل السعودي

hemi_392

انا ملاحظتي على اللي يفصل لانه الكمبروسر يفصل ويقلب شبه حار المكيف لان المواصير تصبح حاره

ولكن الكمبروسر اللي ما يفصل نفس الطريقة الماء الحار موجود بالثلاجة

وان ما زادت البروده ولكن يزيد من عمر الثلاجة

لان الثلاجة تكون معرضة للحراره والبروده من جهتين وهذا يضر اي جسم

الشيء الثاني اللي تستفيده

لأنك بحال كنت بالسياره نصف ساعه او ساعه مشوار ووقفت السياره طفيتها دقاق

ورجعت تشغلها وشغلت المكيف يحتاج 3 او 4 دقايق عشان ياخذ وضعه الطبيعي بالبرودة

لان الكمبروسر توقف والسياره طافيه والماء الحار اختلط مع الثلاجة واصبحت حاره

ولكن بحال فصل الماء الحار تطفي السياره وترجع لها مجرد ما تشغل المكيف نصف دقيقه وهو رجع بارد

لان الثلاجة ما تكون حاره بحراره ماء الرديتر المختلط فيها

وانما تبقى محتفظه بشيء من البروده حتى لو فترة طويلة تبقى بوضع متوسط وليس حارة

لأن الماء لا يصل لها

غيم السياره كاتم


ولا توقفها تحت الشمس

وإذا عندك الكمبرسر تعبان غيره من التشليح

وبس

مافيه كمبروسر يشبك مايفصل يا ابراهيم حتى الكامري والكورولا تفصل وتشبك 
الالتيما من مديلات التسعين وهي كذا بس في الليل خذ مكيف اما الظهر حار تقريبا 
المكيف اذا ماتبيه يفصل حط المروحه على 4 

بريق الرياض 

صحح معلوماتك

السلام عليكم .
اولا من الاشياء اللي تؤثر علي تبريد السيارة لونها الخارجي وايضا لونها الداخلي و نوعية الفرش هل هو جلد وهل فيه ثغرات للتنفس وتبديل الهواء عند جلوسك علي الكرسي والتصاق جسمك عليه.وايضا العازل مهم جدا وجوده العازل ونوعيته انا استخدمت زيبارت ممتاز و لومار ايضا ممتاز.وايضا وجود السيارة في الضل يوثر جدا لدرجه انها تخف من حرارة السيارة تقريبا 10 درجات مؤيه. وايضا تنسيم الدرايش مهم جدا لان يحافض علي الطبلون من التشقق والتنفخ ووجود تغير في اللون او السطح. و لتبريد افضل اعمل صيانه دوريه لمنظومه التبريد كل سنتين من خارج السيارة السيارة الي داخلها من الكوندنسر والكمبرسر وانابيب الغاز و دورة الماء و زيت الماكينه والجير وفلاتر الزيوت و من الداخل الثلاجه و فلتر المكيف و فتحات التكيف و جهاز احكم بالتكيف . والله يسهل امورك.

الشباب ماقصروا والله ماقريت ردودهم لكن ابضيف بعض النقاط 

اذا المواصير نظيفه والثلاجه نظيفه
رح لمحلات التبريد وخذ منهم عازل مواصير حقت الاسبليت 

ولفها على مواصير المكيف البارده ولفها بالشطرطون العازل من نفس المحلات 
واذا عازل علبة الفريون مقطع لف على علبة الفريون من العازل 

ومن ناحية العازل الحراري للقزاز انا مجرب مافي فايدة مجرد لهط فلوس ع الفاضي
لكن والله ثم والله ثم والله عن تجربة
ضللت نيكل من برى وسافرت في عز قايلة رمضان والمكيف على 1 
مع ملاحظة اني ماسويت عزل لمواصير المكيف ولا لعلبة الفريون

السقف اذا انت فاضي تقدر تنزل السقف كامل وتسوي عازل بنفسك في البيت 

بس يبي لك تصمل وتجهز الادوات كامله واضمن لك الداخلية تكون بارده 

لانك بتكون عزلت السقف بطبقتين عازل حراري 
وعزلت الزجاج بالتضليله النيكل لانها تكون عاكسه لأشعه الشمس بنسبة عالية 

طبعا تضليله النيكل افضل من الاسود لأن الاسود يجذب حرارة واشعة الشمس والنيكل يعكسها بشكل كامل تقريباً

النيكل عادة مايضبط على اي سيارة كشكل 
لكن من ناحيتي الشخصية يهمني المضمون ولا يهمني المظهر طالما ان النتيجة مرضية فهذا اهم شيء

واعذروني ان كانت النقاط مكرره