بسافر مكة يا رجال وابي المشورة ...

شيك على الرديتر و تهريباته
وشيك على الزيت اذا كان فيه تهريب ولا نقص خل معك علبة و كل شوي شيك وزود الناقص
وشيك على الفرامل

الطريق سهل جدا وبسيط ... امسك طريق الرياض ولاتوقف باذن لله الا بالطائف بعدها انزل مع الهدا ووقف سيارتك بالمواقف اللي بعد التفتيش وتذكرة بالباص 10 ريال للحرم والرجعه نفس الشيء... حاول بس تمشي من الدمام العصر واخر الليل باذن لله بالميقات

بس انا ابي اروح بالسيارة للفندق لاني بسكن في فندق ان شاء الله 

صباح الخير 

ي صاحبي انا كنت مثلك اول مراحت لمكه 

ماعرف شي حتى الطريق ماعمري مسكته 
لكن توكل ع الله انا كنت بالقصيم 
وطلعت من عفيف ع ظلم ع الطايف 
طبعآ الطريق سيد واحد وارسال مافيه 
انصحك بطريق الرياض الطايف 
طبعآ اول موصلا مكه ع طول تروح للحرم زين 
تلقى دوار خذه وأنشد عن كبري 
السليمانية 
عنده فندق والله اني ناسي اسمه هو اول متطلع 
من النفق تشوفه ع يدك اليسار وقريب بالحيل 
١٠ ريال اي تكسي وموفق خير 

وبعدين انتبه انتبه من العماله الي في السيل 
الكبير نصابين درجه أولى طلعآ
تبي غرفه تريح وتجهز للبس الإحرام 
يقولك الغرفه في ١٥٠ ع طول أمش عنه 
والله يلحقك ي شيخ انا قالي 
في ١٠٠ بشهر ٨ هذا يعني بالإجازة 
وتركته وأخذتها ب ٤٠ ريال وموفق ي ر ب 

العفو اخوي بالتعليق الاول 
اول متخرج من النفق تلقاه ع يدك اليمين وليس 
اليسار 

من الرياض للطائف
قبل الطائف تقريبا ب20 كيلو بتلقى على يسارك لوحه مكتوب فيها ( السيل الكبير )
ادخل معها وتوديك للميقات
بعدين عاد الله يعينك مايدخلونك مكه راح توقف سيارتك فمواقف على حدود مكه وتروح فباص

المشكله ان الجهات المسؤوله نايمه
من حرصهم على عدم الازدحام ومنع دخول سيارات المعتمرين

جوك حقين التكاسي رفعوا اسعارهم ل80 ريال للمشوار وهناك ماتقدر تمشي بدون سياره اذا منت ساكن قريب الحرم
لازم نظام يبضبط التسعيرات وعدم التلاعب واستغلال اوضاع المعتمرين

يالفراعنه

اعتقد اللي جاي من الرياض والشرقية لازم يحرمون من ميقات السيل الكبير
واهل الطايف يحرمون من ميقات الهدا

تاكدو من موضوع الاحرام في المواقيت

افضل طريق انزل عالرياض ثم الطائف و انزل مع السيل افضل لك كونك اول مره تنزل لان الهدا خطير عليك ما تعرفه
 و هو جبل يعني عقبه 
عموما اذا نزلت من السيل اللي هو و انت جاي من الرياض توصل القاعدة الجوية و تجيك لوحة مكة مخرج يمين و تروح سيده تجيك لوحه ايضا مكة المكرمة يجوار مقهى ابو هيثم 
و بعدها ممكن 20 كيلو و تلقى لوحه الميقات تحرم منها 
و اذا جيت من الهدا احرم من هناك ايضا يوجد ميقات 
اللي تبيه احرم منه 
و اذا دخلت ثاني كبري راح يوقفوك اذا انت سائق محرم 
و يحجزو السيارة و اركب مع النقل الجماعي للحرم الشخص 5 ريال و الله يعينك الفنادق فل 
مفروض تحجز بوكينق من بدري اريح عن طريق النت 
و بالنسبة للسيارة مثل ما قالو الاخوان شيك على الزيوت و الكفرات 
و الانوار و الاستبنة و العفريته و خذ معك دبة ماء كبيرة احتياط حتى لو الموتر جديد 
وعلى هونك و توصل بالسلامة

السلام عليكم 
ورحله موفقه بأذن الله 
اول شي وقبل كل شي ادخل للبوكنق واحجز لك سكن انت والعائله عشان ماتتوهق بالسكن 
ثاني شي اطلع من الدمام علي الرياض واجلس لك يوم برياض ريح نفسك انت واهلك لان المسافه الي بين الرياض والطائف ٧٥٠ كيلو 
ثالث شي اذا وصلت لطايف خذ يوم فيها ريح انت واهلك وبعدها اطلع عن طريق الهدا واحرم من ميقات الهدا وخذ عمرتك  وعمره مقبوله ان شاءالله وترفق مع طريق الهدا كله لفات 
شيك علي السياره قبل تمشي كفرات عضالات موية رديتر الفحمات 
وعتبرها تمشي انت والاهل خذ عزبتك معك صلح قهوتك وشاهيك وعشاك وعتبرها تمشي مو سفر 
والامور سهله والله يوفقك ويسهل امرك وجميع المسلمين 

عندي اضافه ترا قوقل ماب حق الخرايط فيه كل شي وتحديث دايم مستمر يعني لو الخط في حفريات ولا شي يعلمك حمل قوقل ماب علي جوالك قبل تطلع وهو احسن شي ودرب السلامه

الله يسعدكم جميع ويوفقكم ، بس متاكدين من موضوع السيارة مقدر ادخل فيها الى شارع الستين مثلا الي في مكة

اذا قصدك عمرة بس يعني ماعندك نيه تتمشئ 
احجز طيران افضل لك

لا اخووي ماتقدر تدخلها الى شارع الستين .. كل مداخل مكة فيها حجز سيارات
. اذا انت محرم راح يحجزون السياره وتركب باص للحرم واذا خلصت ترجع

للحجز وتستلم موترك

المهم لا تنسى الغلايه والنواشف اهم شيء ^_^

لانه صعبه تمشي بالسياره في مكه

ونصيحتي اسكن بعيد عن الحرم واطلع مع الباصات كل مابغيت


تبعد عن الزحمه وعن غلاء الاسعار

اخوي لا يمكن تدخل مكه الأيام هذي ب السياره دامك محرم 
بعد ما تخلص عمرتك وتتحلل بإمكانك الرجوع للمواقف واخذها 
والدخول لمكه وتروح عند الفندق 
ونصيحة لك خذ طريق السيل الكبير من عند الميقات ولا تأخذ طريق 
الهدا لأنه أصعب ونزله جبل ومحتاج تركيز في القياده عالي 
دعواتك الله يتقبل منا ومنك 

عمره مقبوله ان شاء الله
والشباب ماشاءا الله كفوا ووفوا

ماقصروا الأخوان و أزيد عليهم حاول تدخل مكة بعد ١٢ بالليل الحرن تخف فيع الزحمة 
و الطرق يفتحونها 

الحرن = الحرم
فيع = فيه