نصائح للشباب بموقع حراج .. حياكم الله ..

75 5

لايمكنك التصويت حتى الحصول على 20 نقطة على الأقل
إضغط هنا للإخفاء

سلطان ابن عبدالله 184
قبل 8 سنه و 8 شهر

بسم الله الرحمن الرحيم .. 
السلام عليكم ورحمة الله وبركاته 




هذا الموضوع راح اذكر فيه بعض النصائح من شاب بسيط جداً الى اخوانه الشباب  .. وكل  الي بكتبه مريت فيه او عشته يوم من الأيام ..
وادري ان فيه ناس يعرفون بعض الي بكتبه لكن غيرك يجهلها ! 
او يعرفها بس ناسي ونذكرهم .. 
فالمقصد خذ الي تبي من النصايح والي تعرفه او ماعجبك تجاوزه فقط ..
وآسف ان كنت بطول .. 




والنصائح في السيارات وفي غيرها يعني عامه ..


#########################################################



اولا بما يتعلق بالسيارات :

1- عوّد نفسك قبل لا تحرك ان تقول [ بسم الله توكلت على الله ولا حول ولا قوة إلا بالله ]
#
2- ان لاحظت أي صوت بالسيارة .. على طول اعرف وش السبب وحاول تصلحه .. أول بأول ..
#
3- لو تعطل شيء بسيارتك لا سمح الله ورحت للصناعية.. مثلاً صوت بالماكينة .. لا تستعجل وتصلحها عند اقرب ورشة .. خلك صبور .. أسأل .. افحص .. تأكد قبل لا تصلحه اعرف وش العله بالضبط .. باختصار خلك ذيب
#
4- لو الله بلاك بالتفحيط انتبه من آخر شوط هههههه
آخر شوط آخر شوط ي عيال ... غالباً يجيب العيد .. لأنك وصلت لأعلى مستويات الحماس .. المهم انه شيء غلط الله يكفينا واياكم شر الحديد ..
#
5- حاول تتعلم كيف تعاير زيت المكينة والقير .. ما يبيلها شيء ..
#
6- على طاري الزيت .. لآ تسأل العامل الي بالمحطة وتقول [ وش افضل زيت للموتري !! ] لأن الأغلب مايدرون يعبون للزبون الي يبي فقط الا ماندر.. واعتمد على الكتالوج 
#
7- خل معك اشترآك بالموتر اشتره وانسآه .. يمكن يجي يوم وتحتاجه ويا كثر ما تصير 
#
8- حاول قدر الامكان تتجنب التجاري في قطع الغيار المهمه .. مثل الفحمات .. الهوبات .. الجنوط .. الكفرآت .. الكهرباء .. السيور .. إلخ .. والله يستر عليك ..
#
9- لاجيت تعبي موترك بنزين طف الموتر .. وحاول تعوّد نفسك على [ طقه واحد ] اذا جا يعبي .. عشان طرمبة البنزين.. يطول عمرها .. لان التانكي احتمال يكون فيه شوائب او اتربه .. والتانكي فاضي .. وتعبي بنزين بكامل الدفع فتتحرك الشوائب وتشفط الطربة هالشوائب .. ~
#
10- من الاساس اصلا ..حاول قدر الامكان ما تخلي اللمبة حقت البنزين تشتغل.. تعقيبا على النصيحة رقم (9) ..
#
11- لا سمح الله تعطل الموتر بخط سريع .. إإإعرف وين توقف ان قدرت تطمّر الموتر الرصيف احسن لك وخل انوارك والفلشر شغغغغال.. 
كثير من المواقف ناس طايره وتسقط يمين من ورى التريلات وتتفاجئ بسيارة واقفه والتجاوز من يمين مصيبة ...للأسف كثير تصير ومنهم ربعي !
#
12- الأستبنة ي اخوي .. لا تمشيء بدونها =)
#
13- اذا وقفك مرور .. سواءاً قاطع اشاره او مسرع ..الخ
لا تترجى العسكري ابداً ! وكن صادق !
مثال .. قطعت اشاره حمرا ولحقك العسكري 
وقال قاطع اشاره اجل هاه ؟ [ باسلوب مستفز ] مثلاً !
كل الي عليك انك تكون صادق ! 
انت رجال قدحت من راسك وقطعت الاشاره وخالفت النظام ؟
اقدح وخلك صريح .. ايه والله قاطع الاشاره !
بأسلوب طبعاً مهب هياط ..
والله كثير جدا وقفوني .. اما من اجل تضليل او ربط حزام .. الخ .. واكون صادق معهم وواثق . ويفكوني !
بإختصار [ ان خالفت وسلمت فحمد ربك وتجنبها ,, وان خالفت واخذت مخالفه .. لا تزعل .. انت من قمت بها ]
=)




#######################################################



نصائح بخصوص البيع والشراء ...




1- الصدق والأمانة في البيع .. لاجاك شرّاي .. علمه بكل عيوب الموتر .. وصدقني بيجيك الي بيشتري الموتر بعيوبه .. ازين من تبيعه بغش .. ويكتشفها ويدعي عليك عشان كم ألف ريال !!
#
2- لادخلت المعارض واعترضوك الشريطية .. قل الموتر على السوم .. ولا تحط حد .. لا تحد موترك .. وخلك ابرد مايكون .. لا ياكلونك بالحكي ! [ خلك ذيب ]
#
3- لا سمح الله وبعيد الشر عنّا وعنّكم .. تعرضت لحادث .. والموتر راح فيها .. لا تقول كرهت الموتر وببيعه لو بريال .. خلك صبور .. ولا تستعجل بالبيعة ..
#
4- لاجيت تشتري .. الفحص ثم الفحص ثم الفحص !
#
5- لاجيت تبيع .. لا تعطي الموتر الشرّاي الا بعد ما تجيك فلوسك كاملة ويتم النقل .. بعدها سلمه المفتاح ..





########################################################


نصائح عامه للفائدة :

1- لاتخرجت من الثانوي ودخلت جامعة وجاك مصروف من الجامعة او الوظيفة ..
لا عاد تطلب من الوالد او الوالده فلوس الا وقت الحاجة الماسة..
 والله وماحلفتوني .. اني عايش كم سنة على 840 ريال !
لين ربك رزقنا برزق من عنده سبحانه .. وكثير نفس الحاله 
 فالوالد او الوالدة يحبون ان يرو ابنهم يعتمد على نفسه كـ"رجل" !
ي يزينها لا قالوا [ بعدي والله الشيخ =) ]
 الله يطول بأعمار والدينا و والديكم .. ويرحم من رآح ويسكنهم فسيح جنآته  
#
2- لا تندم واجد !
وامش على البيت الي انا امشيء عليه 
(( مانيب ندمانن على كل مافات & أخذت من حلو الزمان و ردّيه ))
#
3- اعتمد على نفسك واترك الاتكالية .. ادري ان الناس مهب سوا !
لكن والله مافيه ازين من انك تعتمد على نفسك وماتحتاج لأحد ..
#
4- لا تنسى والديك !
" ربما اعطوك كل ما يملكون ! فلا تتذمر وقل ربي ارحمهما كم ربياني صغيرا " 
#
5- لاضاقت بك الدنيا وانا اخوك وتبي تفضفض مشاكلك .. لا تطريها لأمك او ابوك .. ترآك كذا تحملهم هم وانت ماتدري !!
#
6- اذا شريت موتر جديد .. التفت لأبوك .. شف موتره ؟
لا تخلي ابوك على موتر مكسر وانت مريَح بالجديد .. هو اولى بالجديد ! حتى لو رفض !
#
7- لا تنتظر من والديك يطلبونك !
حاول تلبي طلباتهم اعرف وش يبون من عيونهم !!
.. وشف دنياك كيف بتزين =)

واذكرلك هالبيتين 


يقول رابح .. 

السور سور الشرف والعز دروازه ..
....... والكفو قد المهمه قبل ينجزها
سر إنشراح الصدر يا ناس وإعزازه ..
....... الحاجه اللي لغيري بعد ما انجزها
افرح بها فرحة اللي حقق إنجازه ..
....... كني ملكت السما والأرض حايزها
#
8- اذا عطيت .. لا تذكر !
ولاطلبك احد وتقدر عليه لا ترده !
#
9- لآ تصّرفهم !
كثير من الشباب الله يصلحهم لا دقت عليه اميمته ولا اهله .. 
يقول والله مشغول وطالع مقدر اوديكم .. وهو متكي مع اخوياه ضحك ولعب ولا فرفره!! 
.. ابسألك بالله ما يأنبك ضميرك ؟
#
10- اذا توظفت وانا اخوك .. مهب على طول تطق لك قرض وتديَن عمرك وتسدد خمس سنوات عشان تشتري لك موتر عشان شوفوني ي فلان وعلان ان كان معك موتر زين ويمشيك ماله داعي ثاني ..
وان كان مامعك  اشتر موتر على قد حالك ماقول اشتر موتر مكسر لا بالعكس لكن لا تشطح ..
 ولا تغرق نفسك بالدين بعز شبابك عشان ما تبلش بعد عمرن طويل ! .








الى هنا يا جماعة الخير .. تعبت وانا اكتب اعذروني والله يابراسي شيء وودي اكتب ..
 لكن راح احدث الموضوع كل ما كتبت او كملت 
راح اكتب بعنوان الموضوع .. [ تحديث1] واذا كتبت بعد بكتب [تحديث2] وهكذا ..

############ وقبل لا اختم بأكتب لكم هالبيتين =) ! ##############

اقول فيها ..

( أمي ) لها حقـ(ن) عليَا ولا انسسسساه !
.................... ياما سهرت مظَلمات اليالي !
و(الوالد) الذي عزني كيف ابجزآهـ ؟
.................. افديه انآ بروحي وحالي ومالي !
وسلامتكم ..


اخوكم الصغير / سلطان ابن عبدالله 
23 سنة =) ~

إبلاغ

الردود