فك بلف الكابرس واللومينا 6 سلندر

السلام عليكم ورحمة الله وبركاته

الموضوع مفيد فقط لأصحاب 6 سلندر كابرس او لومينا

طبعا التجربة كانت مغامرة لأن فك البلف صعب وتجلس 3 ساعات عشان تبدل البلف او تفكه

حق 8 سلندر وكل السيارات جاي بالكوع قدامك واضح وفكه سهل ربع ساعه او اقل

وانت فاك القديم ومركب جديد

ولكن حق 6 سلندر من التخلف حاطينه خلف المكينه لازم فك الثلاجات عشان توصل له

المشكله البلف مكتوب عليه يفتح على 95 درجة

والمعروف درجة غليان الماء هو 100 درجة

طبعا متى تكون الحراره 95 لو كنت ماسك خط بالشتاء

لكن بالصيف داخل المدينه ما بين 97 الى 104 تقريبا

و بالخط تثبت على 96 او 97 يعني فوق الربع شوي

بغض النظر عن الحراره تحت الربع او فوق الربع 96 اقل شيء بحد ذاتها تعتبر كثيرة

ما بقى شيء على غليان الماء

عندك الفورد مثلا الحراره قدامك بالطبلون النصف ولكن بالواقع البلف يفتح على 88

يعني بالواقع الطبلون النصف و اللومينا فوق الربع بشوي ولكن حراره الفورد اقل

الناس تطالع على المؤشر ولا تهتم بالتفاصيل الدقيقة بالارقام

وانا ما كانت عاجبتني الحرارة صحيح من شريت السياره الحمد لله ما قد وصلت الثلث

دائما ثابته فوق الربع بشيء بسيط ولكن ما هي عاجبتني طالما الحراره توصل 100 درجة

اضافة الى هذا مبرد القير داخلي بالرديتر يعني المكينه الحراره 100 القير يكون مثلها او قريب منها

ولكن لو نزلت حرارة المكينه حتى القير تنزل معها

بحثت عن بلف رياضي او يفتح على اقل ما حصلت لأن بلفها صعب جاي صغير

و يركب بالكوع نفسه ما يجي لحاله

حتى لو اشتري بلف جديد مع كوع جديد حق نوع ثاني ما عندي مشكله ولكن ما حصلت

بحثت بالنت عن اي حلول لخفض الحرارة ولكن ما لقيت

و جميع الشكاوي من الحراره هي من 6 سلندر و 8 سلندر ما احد يشتكي منها

المشكله قبل كم شهر كنت ناوي افك البلف و كل ما رحت ورشة قالوا الحراره راح ترتفع اكثر

اقولهم سبق وفكيت البلف حق كامري والحراره نزلت اكثر وارتاحت السياره

يقولون نظام الشفر غير البلف ضروري فيه ولو فكيته ترتفع الحراره فوق النصف

و تبهذلك تفتفه و تضطر ترجع تركبه خساير فك وتركيب على الفاضي

طبعا لو كان البلف بالامام مثل باقي السيارات كان فكيته وجربت من زمان

ولكن فكه يكلف ما بين 350 الى 500 ريال غير الوقت لازم السياره توقف ساعتين او اكثر

عشان تبرد بعدين شغل اليد ساعتين او اكثر يعني اكثر من 4 ساعات عشان فك بلف

هذا اللي خلاني اتردد

الى جاء قبل شهر تقريبا عزمت اني افكه واحاول اقصه او اخرم البلف عشان تنزل الحراره

دخلت السياره الورشه بالليل و جيتهم الصباح السياره بارده فكينا البلف و اخذته معي البيت

قلت بسوي تجارب عليه و عندي بلف الاكسبديشن باقي محتفظ فيه يفتح على 88

و ركبت بداله حق كابرس صابونه يفتح على 71 الحراره نزلت للربع بالاكسبديشن بدل النصف

جبت البلفين وحطيتها بقدر وشغلت النار

انتظرت شوي بلف الاكسبديشن بدأ يفتح حتى فتح فتحه كاملة كبيرة وواضحه

و بلف اللومينا لا زال مقفل تماما ما تحرك من مكانه

عند بداية غليان الماء و بدأ الفوران بدأ يفتح بلف اللومينا بشكل بطيء حتى وصلت للغليان الكامل

فتح فتحه كاملة وكانت صغيرة بنصف حجم فتحة البلف حق الفورد

يعني ما يفتح بدري و فتحه صغيرة اصلا

فكرت كثير حتى حسيت رأسي صدع من التفكير ابي حل يخليه يفتح بدري او يخفف الحراره

العصر رحت الصناعية ولفيت لأكثر من 10 محلات خرط ابيهم يقصون لفة من السبرنق

و شايفين كيف عرضه عشان كذا قوي وما يفتح الا بصعوبة

كلهم يقولون ما نقصه طيب ابي اخرم البلف عشان حتى وهو مقفل يسمح بمرور الماء

ولو فتح يمر بشكل كثيف اكثر و تنزل الحراره قالوا ما ينخرم يحتاج ريشة ستيل ولا تحصلها

قمت حطيت البلف بالكماشة مدري وش اسمها و حطيت البلف وكبست البلف مع الجوانب

عشان ينعفط ويعطي أداء الخرم

طلعته و صار معفط مثل الصور رجعت البيت اجربه حطيته بالقدر

شغلت النار وصلت درجة الغليان البلف ما تحرك من مكانه

حطيته مباشرة على النار نفس الشيء ما تحرك عرفت اني عدمته ما عاد له فايدة

رجعت الورشة قلت خلاص طبق السياره بدون بلف

قالي ما ينفع وبتسخن السياره ومن هالكلام

اقوله جربت قبل كذا يقول لا بس تخمين من عندهم

قلت تجربه وانا متفق معاه على مبلغ 400 ريال شغل يد

لو ضبطت او برجع ادفع 400 مره ثانه و 260 قيمة البلف مع الكوع

يعني خسارة مضاعفة

لكن خلاص ابي حل يريحني من الحرارة و من البلف اللي ماله داعي حاطيته يفتح على حراره عالية

حاليا السياره لها شهر بدون بلف ولا بغيت انزل موضوع التجربه من اول يومين

حتى أتأكد من جميع اوضاع السياره بالخط وداخل المدينه ومع الزحمة والوقفات وكل شيء

طبعا مروحة التبريد ما تشتغل الا على حرارة 108 يعني بعد ما توصل حدها خلاص

اللي سويته ركبت للمراوح الثنتين فواصل كل وحده اتحكم بتشغيلها على كيفي

الحمد لله الحرارة مع الوقوف والزحمة اذا كنت مشغل مروحه وحده ومع المكيف تكون

90 تقريبا يعني اقل بـ10 درجات من قبل

اذا شغلت المراوح 2 كلها تنزل تحت الربع توصل 78 تقريبا مع الصيف هذا والحر الفترة هذي

مع الخط بدون مراوح طبعا بالظهر نازلت تحت ما بين 76 الى 81 ما تتعداها بالظهر

يعني الحمد لله السياره ارتاحت كثير بفرق عن اول وحراره القير نزلت كثير

والمكيف صار بارد اكثر و صوت السياره افضل طبعا

واكيد مع الوقت راح يكون حتى احتراق الزيت اقل و يطول معي اكثر