أضف سؤال أو موضوع جديد          

واحد صدمني و ماعنده تأمين و ماعطاني حقي للآن من 4 شهور

up 6 down 1
tangentline 16
قبل 5 سنه و 6 شهر



الاخوة الكرام السلام عليكم ورحمة الله وبركاته

ارغب بأخذ المشورة منكم بخصوص ان في شاب مامعه رخصة و لا معه تأمين كان يفحط قدام بيتنا و صدم سيارتي و هي واقفة فالمواقف و جاب أجلها...

جا المرور لأن ماعنده تأمين و لا رخصة و قرر المرور ان الغلط عليه مية بالمية..

طبعا المرور اخذ الولد للتوقيف و لكن طلع ليلتها بكفالة عمه..

اليوم اللي بعده سويت الاجرائات من تقدير و غيره و سلمت التقدير للمرور... عندها طلبوا مني الاتصال بوالد الولد و طلب حضوره للمرور... و فعلا اتصلت عليه و قالي خير ان شالله... و لكن الا الان ماراح لهم و شكله ماهو ناوي... و عند الاتصال به مايرد

رجعت المرور و قالوا اللي نقدر نسويه هو التعميم على هوية الولد... و لكن انا متأكد مية بالمية انهم ما راح يجيبونه لان اكيد ابوه ماراح يخليه يسوق بعد اللي صار....

الان سؤالي: وش تشورون علي؟ هل ارفع عليه مطالبة فالمحكمة؟ و ان كان كذلك كيف الاجرائات

مع العلم ان سيارتي متعطلة من ذاك اليوم ماتتحرك لان راح فيها الجنط و دودة الدركسون و كراسي القير و يعلم الله كيف جالض امشي اموري







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


قضيتك عند مسؤل الحادث الي بالمرور 
احشره واشتك عند مديره لانه الي وقع اوراقك معطلك 4 شهور 
ليش تتعب نفسك ومحكمه والغلط من المرور سلامات 


up 8 down 0
tttt35035 1050
قبل 5 سنه و 6 شهر



الله يعينك وبكون بعونك
المفروض التعميم على الكفيل مو على الولد


up 2 down 1
زيت زيتون 2015 1046
قبل 5 سنه و 6 شهر



ماتشوف شر
بالنسبه لوضعك اهم شئ تروح تراجع المرور وتتاكد انهم عممو على صاحب السياره وبعدها خلاص تنتظر انت الين ماينحد ويجي يخلص معاملتك اللي بالمرور


واحد صدم بيتي وانا على زاويه والمهم اسلوبه سئ ورفضت اتنازل فحط قدام البيت وهج اخذت رقم اللوحه ومعممو عليه بعد ماانجبر لاضافه مولود ماادري يبي رخصه لولوده انجبر يجي للمرور وفعلا عطاني مبلغ التصليح واخذت السعر بدون خصم وجاني التعويض بعد سنه و 4 شهور




بالنسبه للمرور لو يشوفونه يمشي قدامهم ماكلموه او يروحون لبيته لاني قد جيتهم وعطيتهم البيت وطلبت احضاره ورفضو






يعني صلح وكذا والا كذا الفلوس جايتك واهم شئ احفظ رقم الحادث واليوم والمكتب لاجل بعض العسكر يسوي كف بحث عنه لاجل ان له معرفه هنا انت تروح للاماره ويروح فيها فرد والا ضابط






بالتوفيق


up 5 down 0
khaled3224 285
قبل 5 سنه و 6 شهر



مالك دخل انت تتصل عليه هم يتصلون 
ثانيا يجيبون كفيله الي طلعه لانه كفيل غارم واذا ماجا توقف خدماته الين يراجع المرور واذا رفض يدفع المرور يوديها للمحكمه
راجعهم وخل عينك قويه عليهم لانهم واضح انهم ماخذينك طقظقه


up 4 down 2
اغسطس 125
قبل 5 سنه و 6 شهر



التعميم ع الولد والسياره ي الحبيب ،، موب بس ع الولد 

راح للمرور وقلهم التعميم ع ايش ،، 

واذ انحجز الموتر والولد مارده الا بيجيك ويدفع لك ،،

والله يان في ناس عندهم اكل مال الناس بالحرام كيف يقدر ينام 

وهو مأذي له مسلم ،، 
عموما انصحك تقابل رئيس الحوادث ملازم ،، وتقوله هالموضوع وهو مارده الا بيجيك ومعه فلوس تصليح السياره


up 2 down 0
أبوتـركي 752
قبل 5 سنه و 6 شهر



لاتزعل مني وانا اخوك لكن اربع شهور ساحبين عليك ويخلونك تتصل على ابو الولد سلامات!! 
هم يتصلون على كفيله ولاحظ هم يتصلون مو انت


up 2 down 0
اغسطس 125
قبل 5 سنه و 6 شهر



فعلا كفيل الغرام ،،زي ماقال اخونا اغسطس بيسحبونه ب توقيف خدماته خله يوقفون خدماته ويجيك و دلي ع التوقيف لان هو الان الي بوجهه 


up 1 down 1
أبوتـركي 752
قبل 5 سنه و 6 شهر



اخوي شكلة هذا عنده معارف بس الحل تروح ترفع قضية في المحكمة العامة ويوقفوا معاملات كفيلة ادخل على موقع وزارة العدل وسوي صحيفة دعوى او روح للمكاتب جنب المحكمة يسووها لك بـ 30 مايمر شهر إلا فلوسك في مخباك


up 2 down 0
ضجيج قلم 151
قبل 5 سنه و 6 شهر



الان فيه قسم للحوادث بالمحكمة روح للضابط اللي مستلم الحادث وقول له يرفع قضيتك للمحكمة وبعضهم يقول انت سوي صحيفة دعوى بنفسك عن طريق موقع وزارة العدل عشان انه كسلان ولايبغى يشتغل فأنت سوها بنفسك في ذي الحاله وعلى طول بالمحكمة يحددون لك موعد بعد شهر تقريبًا او اقل حسب الزحمه وأول جلسه لو ماحضر يبلغونك بأنه لازم تروح للبحث الجنائي وهم عن طريقهم يبلغونه بموعد الجلسه الثانيه ولو ماجاء على طول الشيخ يوقّف خدماته وبعدها يجيك يترجاك الولد والله يرد حقك


up 1 down 0
c a p r i c e ss 257
قبل 5 سنه و 6 شهر



ماعنده تامين ما يطلع من التوقيف الا بدفع المبلغ؟ 

الرجال طلع واسطه... والكفيل الي جا لو خو كفيل غارم المفروض يدفع...

العلم يا طويل العمر من نفس المرور... ادخل لقايد القسم اذا ما افادك...

ارسل فاكس لاداره المرور بشكوى كامله وارفق معها تقرير الحادث واي اوراق تخص الحادث...

اذكر في الشكوى ان مسؤول الحادث وقايد القسم ما افادك بشيء...

وخصمك طلع من التوقيف بدون ما يدفع...


up 3 down 0
asalami 2179
قبل 5 سنه و 6 شهر



ليته هرب بس كان انمسك عند اي معاملة حكومية وكان بحب الخشوم لانه وقتها مابيجي بباله انه معمم عليه ولا بياخذ احتياطاته 

اسال مجرب بعد سنة اخذت تعويض منه وهو شايب هرب من موقع الحادث وانا مصور اللوحة وسويت بلاغ جا بيجدد جواز سفر زوجته لازم عملية عاجلة قالوله راجع المرور ورجعلي بسبب المشكلة واخذت 5000 ولا تنقص ريال وحاولو فيني قلت ابد والله ماتنقص هللة واخذت حقي ومشيت 


up 3 down 0
benz lover -77
قبل 5 سنه و 6 شهر



مخلي حقك وجاي عندنا
رح لهم واخرشهم خرش
وين الكفيل وبعدين لااطالب الولد طالب اللي كفلة وطلعة
من التوقيف واذا شفت المرور يلفوون ويدورون هددهم باالاامارة
وفعلا اشتك للاامارة


up 2 down 1
باترول 2020 2624
قبل 5 سنه و 6 شهر



لا تسكت لا تسكت نصيحتي لك ترا بيطير حقك وبتاكل هوا

اسمع انت وح للمرور اذا ما افادوك الافراد وشعبه الحوادث ادخل على المدير 


انا اقولك حقك مراح يضيع ابد ابد الا اذا سكتت

الان الولد طلع بكفاله عمه وعمه موضف اكيد لأنه كفيل يعني ابو الولد ماله اي دخل بالموضوع 

الان لو انت رفعت شكوا راح يطلبون عمه اذا ماجا يرفعون خطاب من المرور للأماره ويخاطبون جهه العمل حقت عم الولد ويجيبونه 
ولو ماجابوه عن طريق الاماره يسحبون من رصيده في اي بنك ويغطونك حقك انا صارتلي قبل سنه


up 1 down 0
abood-111111 244
قبل 5 سنه و 6 شهر



انا نفس حالتك 
انصدمت سيارتي في شهر ٧ 
وهي واقفه عند البيت واللي صدمني سكران 
والتامين مايشمله ف جا المرور وحط الغلط عليه 100% 
وكتب حاله ( سُكر) وتسلم لقسم الشرطه والتقرير تسلم 
للمرور 
وانا كنت شبه يومي امر الشرطه بشوف وش صار 
يقولون لي موجود في التوقيف لمده اسبوعين وكنت 
متطمن يعني اهم شي مايطلع 
اثاريه طالع من اليوم الثاني بكفاله عن السكر بس 
مو عشان الحادث 
والمرور يقول ماتسلم لنا سو ايقاف خدمات له 
سويت وبعد فتره رحت بسوي ايقاف خدمات 
للي كافله من الشرطه مع ان مدير مرور السويدي 
هو قايل لي روح جيب لنا صوره من الكفاله اللي في الشرطه
رحت عيو يعطوني قالو هو طلع عشانه سكران مو عشان الحادث 
قعدت السياره فتره واقفه وهذاك صلح سيارته ويمر من عندي 
ولايشوفني شي مع ان كنت بسامحه في ٤ الاف والمبلغ كله ١١ الف 
لاكن الحين لو ايش مانقص له هلله وحده 
بس وش نسوي صلحت سيارتي لين تمشي بس 
وحقي باخذه ان شاء الله 


up 2 down 0
alammari 309
قبل 5 سنه و 6 شهر



حبيبي الاجراء ك التالي :

1- بعد تقدير ثمن الاصلاح المحقق [ العسكري اللي كان مستلم وقت ماجات اوراقك ] هو مسؤول عن حادثك !
بمعنى هو يتصل على طرف ثاني ليحظر للمرور ويعرض له الاسعار ويلزمه يدفع لك ويكون انت خارج الموضوع نهائي
الامر بين المرور [ العسكري ] وبين طرف الثاني يطلع فلوسك منه ويعطيك اياهم انت مالك علاقه نهائي فقط تنتظر فلوسك

2- في حال العسكري طلب حظور الطرف الثاني وماحظر مع ولي امره بحكم انه ماعنده رخصة , يطلب حظور الكفيل اللي طلع
الولد من الحجز بكفالة , ويتم الزام الكفيل بدفع وذلك يؤدي انه يجيب اللي كفله غصب . عشان مايتمشكل بسبب ولد اخوه .

3- في حال ماتجاوب الطرف الثاني ولا  الكفيل .. وبعد اجراء 3 اتصالات من [ المرور ] وليس انت وليس انت وليس انت
كررتها ثلاث مرات .. يقوم المرور باجراء حجب خدمات حكومية للمطلوب [ عدم تجاوب البنوك ومحلات الاجار والدوائر الحكومية ] الى ان يحظر

4- في حال العسكري ماطبق لك الثلاث نقاط اللي فوق كتبتها لك , المطلوب منك تتوجه لرئيس قسم الحوادث وتكتب له خطاب وتعرضه لك ويكون مضمون الخطاب 
هي ماحصل من قصور من العسكري اللي ماسك حادثك وانك تكتب الفتره 4 شهور .

5- لسمح الله رئيس قسم الحوادث سحب عليك تتوجه للمدير العام وتكتب عليه معروض او خطاب توضح له سالفتك وانه حصل تقصير من 
المحقق اللي ماسك حادثي + تجاهل رئيس قسم الحوادث لمشكتي . المدير بهالحالة راح يحاسب المقصرين
 وبيحل مشكلتك بنفس الوقت .

6- في حال المدير ماتجاوب معك وسحب عليك مثل ماساحب عليك رئيس قسم الحوادث والعسكري تتوجه لاماره منطقتك وترفق مشكلتك + وخطابات اللي كتبتها للمسؤولين وتجاهلوك
وبعدها بتاخذ حقك وبيتحاسب كل مقصر بالمرور .

..

وسلامتك وخطاك السوء


up 2 down 0
.. abady 116
قبل 5 سنه و 6 شهر



انا صادم لي رجال ومامعي تامين
والغلط علي وعليه 50/50
وجبت كفيل وقررت السياره
وماقصر عطاني التامين
وجيت ابا اعطيهم اياه وقالو محد استدعاك
روح لين نستدعيك
اخذت الفلوس ورحت طلعت السياره على اساس ابيعها
واسددهم بدل انها تكون في الةرشه
اليوم متصلين على كفيلي
يقول وقفو خدماتك ليه ماحد اتصل فيني
وانا اللي جايهم وراديني
مع العلم اني اطلع السياره بكره
وابيعها


up 0 down 0
alhoawe571
قبل 3 سنه و 5 شهر



افيدوني ياجماعه
وانا من البدايه جايهم بالوفاء ورفضو يستلمون الفلوس

وبعد مادفعتها للورشه طالبين كفيلي بالحضور
وش الحل


up 0 down 0
alhoawe571
قبل 3 سنه و 5 شهر