تبي سيارة جديدة

43 25

لايمكنك التصويت حتى الحصول على 20 نقطة على الأقل
إضغط هنا للإخفاء

a.ibrahem 3168
قبل 8 سنه و 6 شهر

السلام عليكم ورحمة الله وبركاته ،،،

صبحكم الله بالخير ومساكم الله بالخير جميعاً ، الله يحيي كلن بأسمه

كالعادة احب ادخل في صلب الموضوع على طول طبعاً كلامي موجه في الغالب للي توه متوظف أو صار له فترة وعزوبي وماعنده الا راتبه

بعض الناس للاسف سواءن دخل دورة عسكرية ولا كمل ثلاث شهور في شركة طق لك ذاك التعريف بالراتب ووين ؟؟؟ مارده الا الوكالة وامصع ذاك الموتر اللي بمبلغ وقدره

انا بتكلم عن الفئة هذي من الشباب ، حنا ياشباب كلنا ودنا اكيد نركب سيارة جديدة وفئة ممتازة متوسطة الفخامة ونبي دلع وفتحة وبصمة الخ ..... ، لكن يا اخوان لايصير هذا كل اهتمامنا يعني بعض الناس يقول اول ما اتوظف ان شاء الله بشتري موتر او لا توظفت بطق لي موتر طيب انت متوظف عشان تصرف وتعتمد على نفسك وتكون نفسك ولا عشان تشتري موتر ؟؟؟

ماقلنا داوموا ببعارين بس لازم الواحد يرسم لنفسه خطة مهب بس توظفت طق القرض ولا ايجار منتهي بالتمليك وكم بأقصد خمس سنين

طبعاً في العمر هذا ياخذك الطيش وعيش الشباب تقول بفلها في شبابي الدنيا فانية بوسع صدري مع الناس وبطق لي موتر يطربني ماقلنا لا

لكن فكر الف مرررة اعرف وش حالك اول

---------------------

يعني بعض الناس تلقى حالتهم المادية متوسطة او اقل من متوسطة يعني عايشين في اجار دخلهم محدود وحتى لو اهلك مرتاحين مادياً لابد تعتمد على نفسك يعني وراك زواج ووراك بيت الخ ...

والمشكلة بعضهم تكون سيارته حلوه مالها ثلاث سنوات شاريها مثلن له ابوه الالنترا ولا سوناتا ولا كورلا ولا اللي هي ولا فيها الا العافية يروح يبيع ويحمل نفسه ديون مالها لزمه ، والبعض للاسف يشتري عشان ولد عمي ولا فلان مايصير احسن مني

وحتى لو سيارتك اول قديمة مررة مهب شرط تطمر لين 2015 وفئة ملعونة والدين عادي تقدر تجمع لك كم راتب وتتصبر كم شهر وهي اصلن فيك فيك عشان التعريف وكذا واشتر سيارة موديل حديث ولا طلع صغيرة وكالة على يدك اجلدها خمس سنين ما تقول لا ولا تكلف صيانة ولا شي او اشتر بالمعقول

ولاجاء وقت الزواج وارتفع راتبك وحالك زان اشتر لو تبي يخت الله يوفقك

وصدقوني ياشباب ماقلت هالكلام الا من حرصي وحبي لكم لأني اشوفها في ناس واجد اعرفهم او اخو فلان والله توه متوظف ماله ثلاث شهور شوي موقف جنبي بقراطيسه

يشهد الله اني ما احسد احد الحمدلله انا في وظيفة مرموقة وراتبي الحمدلله مكفيني وزيادة واقدر من بكره انزل GS ولا جينسس 8 سلندر بس ليش الحمدلله موتري 2009 ونظيف ولا يطلب ومركبها زين ومريح

اروح احمل نفسي ديون ليه اذا الحين الراتب كذا يالله مغطي حده حده تروح تزيد نفسك ديون

يعني اذا انت عمرك 22 سنة او 23 سنة وتشوف نفسك صغير وتقول توني منيب معرس الا في 27 ولا 28 طيب احسب حسابك هالسيارة اللي بتشتريها بتنشب في حلقك لين يوصل عمرك 27 سنة وغير بتبقى لك الدفعة الاخيرة لحالها كنها مهر زواج ، ولا بتقصدها سنة ونص والحسابة بتحسب

نجي بعد خمس سنين خلص اقصاد الموتر طبعاً الموتر صار قديم ومشى حدود 200 الف وعليها جته كم دقشه بدأ يكرهها وهو حتى ما بعد خلص الدفعة الاخيرة يا يتنازل به ولا يكيشها ويبيعها او يخليها معه بس يقول ما تنفع اعرس بها
تسأله جمعت شي يقول لك لا وين سيارة ماخذه نص راتبي وين اجمع معه


طيب مهب من المفترض السيارة الجديدة اشتريها وانا على حروت زواج اكسب من جميع الجهات اجمع في ذا الخمس سنين بيزيد راتبك ويمكن يزيد ادخارك للمبلغ وبرضوه كانت معك سيارة مرموقة في الفترة هذي

ولاتقول ابوي غني بيساعدني ومدري ايش ابوك انتهت مسؤوليته في انه يصرف عليك ويزوجك ويدفع الحين هو مسؤول عن اخوانك الصغار

يعني فيه اشخاص اعرفهم عز المعرفة ابوه مرتاح مادياً والله الرجال متزوج ونصه ديون حتى السفر ماقدر يسافر طلع مكة وجدة والطايف وابوه ماشاء الله مزرعة وبيتهم وش كبره في اصنصير من البطره الله يزيدهم
وريال واحد ما طلبه من ابوه وابوه عطاه العانية المعروفة والمعتادة لأنه لو تكلف في زواج ذا بيزوج اللي بعده واللي بعده والثاني يبي موتر والثالث يبي غير مصاريف البيت والاهل



لذلك ياشباب اتمنى من كل قلبي أي واحد مقبل على هالشي يفكر الف مرررة لحد يفسر كلامي غلط اني اقول لحد يشتري بس انظر لحالكم اول اعرف هل فيها ظغط عليك هل بتكون مرتاح مادياً هل انت مظطر للشي هذا وبعدين قرر ، وفي النهاية السيارة وسيلة وليست غاية


اتمنى تتقبلون كلامي هذا بصدر رحب وما اكون اطلت عليكم

تحياتي لكم ،،،
احمد ابراهيم

إبلاغ

الردود