أضف سؤال أو موضوع جديد          

نظم حياتك وفائدة التأمين

up 23 down 14
a.ibrahem 3167
قبل 6 سنه



السلام عليكم ورحمة الله وبركاته ،،،

اسعد الله مسائكم وصباحكم بكل خير

كالعادة ندخل في صلب الموضوع بتكلم عن نقطة موجودة لدى الكثير من الناس ليس الشباب فقط الا وهي تنظيم حياتك من جميع النواحي ومن ضمنها السيارة وتوابعها

يعني بعض الناس تشوف حاله اعوذ بالله ينرحم وهو اللي تسبب على نفسه بالشي هذا يعني عليه مخالفات 2700 او 3000 وبعضهم مير في العلالي واستمارته منتهيه من عام 1429 هـ وطبعاً الرخصة لحقتها تقول له جدد يقول يبيلها دراهم المخالفات ومدري ايش وبدون تأمين وحالته حاله وبعضهم موتره ولى انهبل وكل شوي يصلح فيه تقول له طيب طلع لك جديد يقول لك وين اسدد ذولي معه يبيلي اسدد مخالفاتي واجدد الرخصة وشف كم بياخذون علي يبيلها دراهم

طيب لحظة من اللي تسبب في الشي هذا مهب انت اللي راكمت على نفسك الديون

لحد يجيني يقول ماتدري عن ظروف الناس والله يا الضعيف اللي على قده تلقاه وش حليله موتره ساتره واستمارته جديدة وامورة زينة مايبي تتراكم عليه ديون وحاله كذا

واغلب اللي منتهيه استماراتهم وعليهم مخالفات وحالتهم حاله هذا حاله متوسط وزين وتلقاه في العيد طاس مسافر منا ولا منا

ماقلنا لك احرم نفسك ولا تسافر بس خلص امورك اول

فيه شي اسمه مهم وفيه شي اسمه الاهم

--------------

يعني بعضهم تلقاه نزل ايفون 6s راح مصعه ب 3200 ومدري كم ، يقول مليت من الايفون 5 ولما تجي تقول له ورا ماسددت مخالفاتك ورا ماخلصت امورك كنك قايل له طب في جهنم والعياذ بالله ينقلب وجهه ياخي وين يبيلها دراهم تحسبها سهله

طيب انا اشوفك كل شهر جالس تدفع مبالغ على اشياء مظهريه وتافهه متعيجز تخلص امورك من الناحية ذي وبعضهم يجمع بعد .

--------------

بذكر لكم قصة صارت لواحد وبسبت الاهمال والتأمين وغيره

هدو في وجهه ودقش في اودي وكلفت الاودي 50,000 الف ريال غير ان سيارته شبه انعدمت طبعاً سيارته من اول منهبله بس زاد الطين بله يبيله خمسين الف بس للأودي يدفعها وهذا اقل شي وبتعاون من صاحب الاودي

يعني الخمسين الف هذي لو تحسبها تكفي اجار شقة سنتين تدفعها تكفي انك تشتري لك سيارة وكالة او تساهم في شراء سيارة وتطيح جزء كبير طارت بسبت اهمال وكل يوم بكره ووين الدراهم

طبعاً لاشك ان كل شي مقدر ومكتوب ولا اعتراض على قضاء رب العالمين سبحانه

لكن الانسان يفعل بالاسباب مايرقد مشرع بيبانه ولاانسرق قال كتبت الله يخوي الله مخيرك بين جنة ونار ان عملت صالح افلحت مع الصالحين يعني مايجيني واحد مايصلي وما افلح في دنياه ويقول اللي الله كاتبه بيصير انت عندك عقل تميز بين الصح والغلط

طبعاً الرجال ذا متزوج والله يعينه واتفقنا ان حنا نحط عانية له على قيمة الاودي طبعاً ماقلت هالكلام والله مقصدي بمدح عمري ان حنا فزعنا غصبن علينا نفزع خوينا والصديق وقت الضيق

لكن ذكرت هالموضوع عشان انبه الناس اللي نايمه في العسل وهو حالته حالة استمارة منتهيه وحياته معفوسة وبكره ولا بعده انهبل موتره ولا راح تشليح الله لايقوله وجاء بيطلع سيارة فق ثمه عليه مخالفات ويبي لها رخصة ويبي له طواعين ويروح يوهق اخوانه ولا امه

الحذر ثم الحذر يا اخوان

التأمين مهم جداً ادفع ان شاء الله 2000 ريال لاتقول غالي ولا يجيك ذاك اليوم اللي تسود الدنيا في عينك لاشفت اللي صادمه ولحد يقول انا عارف سواقتي واثق من نفسي ، كلن قال هالحكي لكن يجيك من يبتليك او يوم بزله او هفوه تصدم الله لايقوله اغلب اللي كانوا يصدمون هل كانوا متعنينها يا هفوه ولا تعطلت السيارة فجأة او شي صار امامك اربكك وسبب الشي هذا

اسف على الاطالة واتمنى من الناس اللي تعرف اشخاص كذا تنبهمم وايضا تاخذون الحذر انتوا

تحياتي لكم
احمد ابراهيم







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


طيب انا علي ١٢ الف وماني متوظف من وين اسددها
حتى لو جت علي ٣٠٠ مقدر اسددها فخلها تتراكم لين الله يفرجها


up 3 down 6
mohaammad 166
قبل 6 سنه



والتامين زي مقلت مهم بس معرفنا لهم كل يوم بسعر


up 1 down 2
mohaammad 166
قبل 6 سنه



من وين جتك ذا ال 12 الف ؟؟؟

هذا بسبت استهتارتك بالنظام لا تحاول تقنعني

محد مايصيده ساهر انا صادني مررة مرتين


لو نقول عليك 1000 ريال 2000 مقبولة بس 12 !!!!!!!


وبعدين ليش منتاب موظف الشركات وكل مكان فاتح بابه تقدر تتوظف لو في بنده ب 3000 ريال وتسدد وتزين امورك وتقدر تجمع لك بعد كم قرش تنفعك بعدين


لكن الربادة واللامبالاة فينا يا السعوديين مسيطرة علينا خلها على الله


طيب لين متى ؟؟؟؟


راجع حساباتك يا اخوي والله يوفقك دنيا واخره


up 12 down 11
a.ibrahem 3167
قبل 6 سنه



الله يجزاك خير كلامك واقعي 
وانشهد انك صدقت الربادة واللامبالاة مسيطرة علينا 
بعد ماجلست مع عامل ميكانيكي اليوم 
وعلمني باشياء عن بعض السعوديين 
يارجال اصبع بطارية بعضهم مايعرف يفكه 
اشكرك يالغالي


up 8 down 4
الرفاعي33 13914
قبل 6 سنه



محمد قوم وخذ لفة على الشركات خصوصا بنده ومثيلاتها وان شاءالله تحصل براتب 5500

والله يعطيك العافية ابراهيم

فعلا كل واحد لابد ينظم حياتة 


up 4 down 0
coco13 893
قبل 6 سنه



جرير تبي سعودين كاشيرات 
ايكيا
بنده 
هذي وظايف تمشي الحال لين الله يفرجها 

بخصوص موضوعك يا ابراهيم
فعلا ماغرق الشعب فالديون الا شراء اشياء ماهي مهمه وتلبية هوا النفس واشباع الرغبات وبعد مايمل يقول مابيها 

الواحد ياخذ الاساسيات ولو لقي شي ضروري بس غالي عنده بدائل 
مثلا جوال ب 3000 يقدر ياخذ جوال ب 1400 يؤدي الغرض 
وبهذا الشكل يقدر يرتب نفسه ويشوف وش المهم ووش الاهم


اكبر دليل الايفون الجديد اول مانزل صارت زحمة وطوابير فجرير وكئنهن يوزعون صدقات 
لو انها جمعية خيرية محد صف عندها كذا

ونصيحة الي الله يبارك فحياته وراتبه
يكفل يتيم اذا قدر
ويتصدق شهريا من راتبه باي مبلغ 

الاجتهاد في الامور الدنيوية اصبح يغلب على امور الاخرة 
المساجد ماتمتلئ الا صلاة الجمعة
صلاة الفجر يادوب الصف الاول يكتمل 



الله يجزاكم خير يا 

١- الرفاعي ٣٣ 
٢-  coco
٣- شويخ من ارض مكناس 

وانا يشهد الله ماقلت هالكلام الا من محبه يضيق صدري لاشفت واحد كذا انا ودي الناس تصير بأحسن حال 




up 2 down 3
a.ibrahem 3167
قبل 6 سنه



للأسف ناس كثير غرقانين في الديون ومكبر المخدة ويرفض يشتغل في القطاع الخاص وجالس ينتظر الوظيفة الحكومية

إدارة المال وإدارة الوقت ضايعة عن الكثيرين


up 2 down 3
أبو عبادة 4852
قبل 6 سنه



انشهد بالله انك صدقت بذي يا ابو عبادة

كثير من الناس وقتهم ضايع يتسدح في الاستراحات بالساعات ولين جاء عزيمة ولا عزاء  وقلت له قم قدر الرجال قال منيب فاضي 

وبخصوص القطاع الخاص والله يابعضهم في القطاع الخاص  يستلم راتب ما استلمه اللي في الحكومي له عشر سنين 

لكن القطاع الخاص يبي ناس تشتغل يبي ناس طموحه مهب ربادي يفكر في النحشه عقب الظهر ويبي يبزوط ويقولون الراتب مايكفي الحاجة


up 5 down 4
a.ibrahem 3167
قبل 6 سنه



الشغل مو عيب  بعض الناس يقولون ذا شغل اجنبي وانا سعودي ليش اشتغل و الرجال عاطل من سنين  و يقول ذا شغل اجنبي و انل ليش اشتغل وووو ياحبييي السعودي الشغل مو عيب  الواحد يرفعه الناس من اسمه و شغله 

والشغل مو عيب 


up 2 down 4
fowad 123
قبل 6 سنه



بالفعل التأمين شر لابد منه
و يفكك من بعض الناس العله
لو تدقش طرف سيارته او حكه خفيفه
اشغلك ما يمشيها لك لو سيارته قديمه و مكسره 


up 2 down 0
أبو نجوى 2442
قبل 6 سنه



الي يترك الحرام يعوضه ربي بالحلال
واذكار الصباح والمساء تكفيك من الحوادث


up 2 down 1
t2zt2z 585
قبل 6 سنه



يعطيك العافيه على الموضوع الرائع والذي ترددت كثيراً في الكتابه عنه لعلمي التام بأن أغلب الشعب سيكون من أشد المعارضين ، بل الأدهى والأمر حتى لو كان أخوك قسم بالله يكرهك ولاعاد يكلمك ( النصيحه صارت تزعل بعد ماكانت بفلوس ) .

ولاحظ أخوي إبراهيم أغلب الأعضاء هنا مارد على موضوعك لأنه صحيح مليون في المئه ..

كثير لي زملاء وأقارب أنصحهم بالحسنى وبنفس موضوعك صدقني أصبحت مكروه لديهم ولكن لايهمني لأنني لست على خطأ ..
وعندي ملاحظه وهي مثال على من صدم الأودي وكنت أود أن أقول دعوه لكي يتعلم الإهتمام بحياته وبعمرك وبحلاله وحلال الناس ولكن لن يأيّدني الكثيرين وكنت أتمنى بعد أن تقطوا له تشدّدوا عليه بأنه لو حدث له مرةً أخرى لن يقف أحد بجانبه لتعلّم أو أن يطالب بسداد ماعليه ..


up 3 down 0
jakwar2004 437
قبل 6 سنه



* وبعمره

* ليتعلّم



up 2 down 0
jakwar2004 437
قبل 6 سنه



أتفاق معك
 يا شويخ من ارض مكناس



up 1 down 0
عبدالمجيد a 46
قبل 6 سنه



اذا المخالفات كثيرة عليك قصدها .. شوي شوي وربك ييسرها 


كانت عليا مخالفات وقصدها برقم المخالفة 

اذا بيدفعها احد غيرك ما بتحس في الفلوس لكن لو جت منك ومن عرق جبينك 

والله انك بتحسب الف حساب للمخالفة 


up 1 down 2