نصاحكم للحصول على أكبر قدر من توفير الوقود

ركب استبنى وزن اخف
شيل المراتب ولاتركب معاك احد
تخفيف الوزن يساعد على استهلاك الوقود بشكل اقل

الموضوع مهم جدا وخاصة بعد ارتفاع اسعارالبنزين ولازال يعتبر رخيص ..... حساس الاكسجين له دور كبير في الصرفية
وقبل كل هذا ثقافة القيادة , فكرة تدعس للسيارة على اخر شيء وقدامك بكيلو اشارة او مطب او دوار كلكم راح توقفون بنفس الوقت ... القيادة داخل المدينة تفرق عن الطريق المفتوح او السفر .....

سيارات بحجم الكامري والسوناتا والمازدا 
جيده في صريفه البنزين 

والسيارات الفئه كورلا والنترا ومازدا 3
افضل في صريفه السياره 

لها علاقه بحجم السياره ونوع البنزين 91 و حجم المكينه 

سياره مثل الكورلا 1.6 لتر ماراح تستهلك بنزين كثير 
تقريبا الفل مع التسعيره الجديده 32 ريال ويمشيك 450 كيلو تقريبا هاذي سيارتي الان 


صديقي عنده مازدا 6 بس تصدق ان صريفة البنزين مشابه بالكورلا فرق بسيط 
لان عنده نظام توفير الوقود واعتقد اسمه eco 
يعبيها تقريبا 37 ريال بس ماشاء الله تمشيه فوق 500 كيلو 

فعندك انظمه توفير الوقود + حجم السياره 
لان بعض الناس يعتقد اذا شرى سياره صغيره فقط راح يوفر وقود 
والصراحه ممكن اصحاب السيارات المتوسطه يوفرون وقود اكثر من اصحاب السيارات الصغيره 
بسبب الانظمه الي بالسياره 

فعلا مثل ما قال الي فوقي
حساس الاوكسجين له نسبة كبيرة باستهلاك السيارة للبنزين والناس تقلك مهو مهم
والي يخليه يخرب ان السيارة تكون مصصمة على بنزين 95 وهو يعبي 91 (هذا السبب الرئيسي ، فيه اسباب اخرى بس هذا السبب الرئيسي)
عندك فلتر الهواء اذا كان متوسخ مرة تصير تصرف بس الاستهلاك يكون قليل نسبيا
عندك البخاخات اذا ما مانت نظيفة تصير تصرف بشكل كبير
عندك فلتر البنزين اذا كان متوسخ يسبب مشاكل بالبخاخات وتصير تصرف
البواجي اذا ما كانت جديدة تصير تصرف
طبعا الكفرات اذا ما كانت ممتلئة بالهواء بالشكل المطلوب تصير تصرف
بالعموم نسبة الصرفية لكل نقطة ذكرتها لا تؤثر بشكل ملحوظ
اما اذا كنت تيك عليهم جميعا تفرق معك
وبالنسبة للنقاط الي تسبب صرفية البنزين كثيرة وكل شيء يؤثر بشكل مباشر او غير مباشر
هذي النقاط الي اذكرها وان شاء الله تكون استفدت

بالنسبة للاخ ريان النظام الي تتكلم عليه بالمازدا اسمه sky active صرفية منخفضة بشكل كبير

اللي يقول البنزين لازال رخيص انت تدري انهم بعد الميزانيه رفعو سعره فوق 50% وهذي زيادة مبدئية يشوفو ردة الفعل اذا والله شافو الشعب مبسوط ومافي اعتراضات بيرجعو ويرفعوها 50% ويستمر الرفع التدريجي علي مدى خمس سنوات وانت كل سنه بتجي تقول البنزين لازال رخيص 

ههههههههههههههه
والله انكم تضحكون

يعني اللي يعبي فل قبل ب25 بيصير يعبي ب39 تقريبا
الفرق بسيط ولايضر
روحو شوف الاردن الكورولا تعبيها بفوق ال 200 وانتم زعلانين عشان زيادة تقريبا 12 ريال

المنتدى صار كله بنزين وشوي تقلبونها مناحله وبكاء

ياما كنا نشوف صور لبقايا الذبائح مرميه عن الزبائل برزها 
وهذا مثال بسيط على الاسراف والبذخ واحد اسباب غضب الله علينا
واعتقد هذي بداية العقوبة بسبب التبذير

الناس لازم تراجع حساباتها وتشوف وش سبب ارتفاع غلاء المعيشه

كما قال تعالى: وَمَا أَصَابَكُمْ مِنْ مُصِيبَةٍ فَبِمَا كَسَبَتْ أَيْدِيكُمْ. {الشورى: 30}.

اللي كانو يتفاخرون بالتبذير والي يغسل ايده بدهن العود و و و و و و
الناس اذا مالحقت نفسها وعدلت من اخطائها اللي بسببها حدث الغلاء راح تصير السعودية مثل افريقيا بعد الرخاء اللي هم فيه

أخوي شاقح اكثر الناس الفاسقة ماراح يضرها إرتفاع أسعار الوقود أوغيره

اعرف ناس تلعب بمئات الملايين  هذي الناس  لو يصير اللتر ب100 ريال ماضرها 

لكن اللي معود نفسه على التغشف والطفران اللي يقعد يناحل البايع مثلي وشرواي هو اللي بياكلها 

وبخصوص اللي يقول قبل كان البنزين غالي اقوله يالطيب هذاك أيام كانت أسعار المواد الغذائية وغيرها رخيصة

كان البنزين مقدور عليه  لكن  الحين بناكلها من كل صوب هذا ماارتفعت أسعار السلع الإستهلاكية اكثرواكثر

^^^
اعرف ناس مطفرين بكثره
يستلم الراتب من جهه ويروح يصرفه فالبحرين من جهه ويرجع وهو يضحك
غير اللي اول مايتوظف يطقله بقرض عشان يسافر للخارج في كم اسبوع ومطير القرض كله ويجلس يسدد 5 سنوات
هذي فئة بسيطه 
الواحد اذا تصدق وحافظ على امواله من الحرام بجميع اكاله الله بيبارك له في ماله 

لكن ناس ماتعرف كيف تصرف ولاتعرف كيف تدير حياتها تجيك بعدين تقول وش اسوي فلوسي ماتكفيني

لاتخاف عالسعوديين
بعضهم يحتاج انك تحشره وتضيق عليه عشان يعرف قيمة الريال ويبطل الاسراف والتبذير

وحط فبالك انه النفط شي مستهلك وينفذ مع مرور الوقت
وكل ماقل كل ماراح يرفع الاسعار وهذا شي طبيعي

لاتحسبوني قاعد على بنك يوم اقول هالكلام
انا مثلكم ماعندي الا النترا وتقسيط لكن الواحد قبل مايطلب الدوله عليه يطلب ربه 
ويبتعد عن شراء الحرام بجميع انواعه ويتصدق ولو بمبلغ بسيط واموره راح تمشي والحافظ الله 

علبة دهن عود من المصنع تكلف 150 ريال و نوعية اعرفها
ما تسوى شيء و ما بقوا عذروب ما حطوه فيها 

شويخ
 لاتقارن سعر البنزين فالاردن مع سعره فالسعوديه لان الاردن ماعندهم نفط عكس السعوديه اكبر مصدر للنفط
عالعموم هي ماوقفت عالبنزين دام الميزانية مديونه راح يتاثر البلد كله بسببها مثل المشاريع والوظائف والخدمات وحتي الرواتب اتوقع بالفتره القادمه راح يلغو منها بعض البدلات وبتنقص مبلغ وقدره   

فك الجنوط الثقيلة وركب جنوط اخف اللي هي حقت الطيس للسيارة :)

الزيت زيت المكينه سمعت انك تحط زيت خفيف شوي او ثقيل شوي يقلل من استهلاك البنزين

لا جيت تعبي البنزين عبه طقة وحدة

اقلب بنزينك من 95 الى 91 علشانه رخيص :)

ماقصرتم شباب ألف شكر لكم على المشاركة ونشر الفائدة 

هل تعبئة السيارة ببنزين 91 يؤثر عليها ؟ علما بأن البنزين المخصص لها 95

الصيانة + الحفاظ على ضغط الهواء في الإطارات + الالتزام بالسرعات المقررة + لا تظل داير في الشوارع عالفاضي.