تقريري المفصل بعد استخدام النافارا 2014 لمدة سنة وشهرين

43 5

لايمكنك التصويت حتى الحصول على 20 نقطة على الأقل
إضغط هنا للإخفاء

مخاوي النت 231
قبل 8 سنه و 3 شهر

بسم الله الرحمن الرحيم
السلام عليكم ورحمة الله وبركاته

بعد شراء نيسان نافارا 2014 واستخدامها لمدة سنة وشهرين
حبيت أكتب لكم تقرير مفصل عن عيوبها الكثيرة ، ومزاياها القليلة

السيارة قير تماتيك فئة SE خمس نمر
وكالة العيسى
أخذتها من معرض عماد الدين بالرياض
كنت أتابع إعلاناته ولقيته عارضها بــ 67 الف ريال
رغم انه كان يبيعها قبل شهر من شرائي بـ 69 الف ريال
تواصلت معه خاص وقلت هل أصبر لعلها تنزل زيادة
قال : أنا مدمر سعرها وابيع براس المال !!

بعد ماشريتها لقيته كل شهر ينزل السعر لين وصلت الآن بــ 53 ألف ريال !!
وين كلامك والبيع براس المال يابو راس ؟
ماعلينا كلهم شريطية والكذب يمشي بعروق الدم
والذمة وسيعة

أجي للتقرير .. واذكر العيوب :
1- السيارة قاسية جدا بالمطبات ومراتبها قاسية
وفيها مناقز أشد من الددسن والهلكس وبدون مقارنة ابد .

2- صرفية البنزين عالية مقارنه بالهلكس والددسن

3- عزمها دمااار دمااار مثل التريلة
بحياتي ماسقت سيارة ميت عزمها مثل هذي
يمكن التماتيك له دخل ، لكن ماهو لهالدرجة المملة
اتوهق لاجيت اتجاوز سيارة أو لا قابلت طلعة
وانبه الأخوان بالجنوب يحذرون منها
كمثال :
طلعة الغاط بطريق الرياض القصيم السريع
أمشي 170 إذا اقبلت علشان العزم الميت
بنصف الطلعة تنزل لسرعة 100 وترد نمرة
وكل السيارات تكبس لي أوخر عن طريقهم
حتى الإكسنت واليارس !!

4- إذا واجهها الهواء تصير مثل المربوطة بالجلنط
ماتمشي اكثر من 140 كيلو واقل حسب قوة الهواء !

5- حراراتها مع المكيف في ( صيف نجد ) توصل لتحت النصف شيء بسيط

6- المكيف سيء وتعبان وكأنه مكيف صحراوي
ودفع الهواء ضعيف رقم 4 كأنه 2
يعني مستحيل تحس بالهواء والبراد إلا لو حطيته على رقم 3 أو 4

7- فيه رجة بمرتبة الراكب قدام وتهتز طول الوقت رغم تثبيتها وشد المسامير
تذكرني بمراتب باصات سابتكو المدمورة !

8- بعد شهرين انسدت فتحات رش ماء المساحات رغم إني أعبيها ماء صحة !!
وماكملت المساحات 5 شهور إلا متقطعة رغم إني أوقفها بمظلة بالبيت والدوام
ولا تلمسها الشمس إلا خلال المشاوير!

9 - نوع مواد الطبلون سيئة وركيكة
ضغطت مفتاح جنب مفتاح المراية راح داخل وماقدرت ارجعه لمكانه

10- عصا ماسك الكبوت انفك وانكسرت الربلة اللي تثبته فوق الرفرف من اول شهر استخدام !

11- لمبات الطبلون لونها برتقالي مؤذي للعين ومقرف !

12- قطع الغيار غالي وغير متوفر بشكل عام وخصوصاً الاكسسوارات
والله يعين ن صدم فيها لا يلاقي تشليح ولا قطع غيار
وسمعت إن المكينة بسعر 30 الف ريال !

13- السيارة يهبط سعرها بشكل غير معقول
اشتريتها بــ 67 ألف من غير النقل والاستمارة
والآن تباع بــ 53 ألف وفيها مواصفات اعلى من مواصفات سيارتي
مثل اشارات بالمرايا وجناح بالصندوق

14- وكيل سيء ولا فيه مراكز صيانة الا بالمدن الكبار فقط ( حسب علمي )
الرياض ، جده ، الشرقية


وبالنسبة لمزايا السيارة :
1- المرتبة الخلفية واسعة للراكب عكس الددسن

2- شكلها أجمل من الددسن ( من وجهة نظري )

غير كذا ماتسوى سعرها وانصح الجميع يبتعد عنها
واللي وهقني فيها هم المتعصبين اللي اذا  الواحد اشترى سيارة
يعتبرها شرفه وأي شخص يوضح عيوبها كانه معتدي عليه !
أو يظن إنه صنعها وله حق يكذب ويطبل ويكثر المدح !

أو يمكن الفكرة هي تسويق السيارة بمدحها ورفع سمعتها علشان يحاولون
يرفعون سعرها عند البيع خوفاً من الخسارة الأكيدة
أو تشجيع الناس على الشراء بالمدح الكاذب لقصد انتشارها لعله تتوفر قطع غيار وتكثر بالتشاليح !!

باختصار :
الناقارا مقلب واكلته والشكوى لله
سيارة ماتستاهل يندفع فيها أكثر من 30 الف ريال .
وللعلم كان سعرها 72 ألف قبل سنيتن لموديل 2013 و 2014
واللي مايصدق يبحث عن اعلاناتها
أو يدخل موقع نيسان ويشوف كلام اللي توهقو فيها

والله يعين من اشتراها وابتلى فيها
يصبر لين يحللها أو يبيعها بخسارة 20 الف باول سنة استخدام وقبل تكمل 20 الف كيلو !

وأنا مسؤول عن كلمة كتبتها
وتراني رجال فوق الاربعين
سواقتي راكدة ولا اطلع البر ولا أتعدى 120 إلا للضرورة

إبلاغ

الردود