اجراءات المرور المبهمه والحل معها ؟
16
3
إضغط هنا للإخفاء
بسم الله الرحمن الرحيم
حصل معي موقف من كم يوم وابغا شورتكم ونصايحكم وان كان لاحد تجارب اتمنى يبلغني
يوم الاحد مباشره بعد المحاضره توجهت لمرور الخطوط الاربعه بالدمام لاجل استخرج رخصه قياده بدل المنتهيه
و سلمني العسكري النموذج وكان قمه في الاخلاق
استكملت النموذج وارفقت صوره شخصيه و مسكت سره حتى يختم لي عشان افحص نظر
مجرد ما ختم لي توجهت لمركز صحي قريب استكملت الفحص ورجعت بعد ما مسكت سره طويله الا العسكري يبلغني اني لازم اتوجه لمرور دله !
كان كلامه غريب وماله داعي ، قلت له انا الحين قدامك والنموذج في يدك وش يوديني لدله وانت تقدر تخلصها هنا
رد برد غبي : يقول روح هناك انت وبس
ما حبيت ادوش دماغي معاه وتوجهت لدله
وما يخفى عليكم السره العقيمه في مرور دله وكيف ترفع الضغط ولما وصل دوري وسلمت العسكري النموذج
رده لي قال صلاه تعال بعدين .... !!!
بعد الصلاه رجعت له الا يقولي فين ورقه التبرع بالدم حقتك ؟
شرحت له ان انا رخصه وليس تصريح قياده واني تجديد وليس اصدار ... ! قالي والله تعاميم وزاره الداخليه مالنا خص
تناقشت انا وياه وكان النقاش حول انه ليه ما يكون هناك اجراءات واضحه ومكتوبه ليه لازم اوقف نص ساعه لين تتكرم انت وتقولي وش اسوي
ارتفع ضغطي ومشيت عنه
ما قدرت اكمل فحص الدم لاجل عندي كلاس بعد الظهر ، توجهت للجامعه وما خلصت الا ودوام المرور خلص
--------
يوم الاثنين صحيت الصبح اكلت لي لقمه وتوجهت لبنك الدم اول ما وصلت قابلتني الممرضه قالت تعال نشوف فصله دمك اختصرت لها الموضوع وريتها الرخصه المنتهيه وفيها فصيله الدم !
قالت لي طيب ليه جيت ؟ واحتياطا طلبت منها ورقه التبرع حتى اوريها المرور
رجعت للمرور مسكت سره حول ربع ساعه ولما وصلت قالي العسكري فين الملف الاخضر ؟ ورجعني اجيب ملف التبن الاخضر
مسكت سره ثانيه حول ربع ساعه ولما وصلت قالي نفس العسكري فين صوره البطاقه ؟ ورجعني اصور البطاقه
توجهت للاتصالات الاداريه عند عسكري اسمه تركي مثل العسل ، صورلي البطاقه وعلمني بالاجراءات
رجعت مسكت سره للمره الثالثه ولما وصلت وريت العسكري رخصتي المنتهيه وقلت ابي اجدد ويختم لي ختم احمر يقولي توجه لمدرسه دله !!!!!
رحت دله ودفعت ١٠٠ ريال وقالو لي تعال بكره ؟ ... شفت ان الموضوع ما يخارج ورحت على مكتب النقيب حق المرور واشتكيت الاجراءات العقيمه المطوله واني ما اقدر اختبر قياده وغيب اكثر من الي غبته وتاخرته عن الجامعه
قالي هذا النضام !
رجعت لعسكري المرور تركي في الاتصالات الاداريه الا هو يقولي التالي :
انت ليه رحت دله وليه دفعت ؟ وليه رحت بنك الدم ؟ انت تجديد مو اصدار
مين الي ارسلك
طلع كرف هاليومين كلام فاضي وخطاء عسكري
رحت مسكت سره رابعه عند العسكري نفسه الي ختملي لدله و بعد ما وصلت قام شخبط في الورقه ويقول امسك سره عند شباك ٤
شباك ٤ عند العسكري الي رجعني عشان الملف والبطاقه و كانت السره قليله شويه عنده ، اقسم بالله اني اول ما سلمته الملف سحب الاوراق منه ورمالي الملف
ليته حطه او او ! والله رماه رمي طيب كان بالآولى ما خسرتوني وقت وفلوس على شي ماله فايده
طلعت من عنده ورحت لدله استرجع ال ١٠٠ حقتي
رفضوا بحجه لازم اصل النموذج المختوم الي اخذوه المرور
واقعد ساعه بين دله وبين المرور كل واحد يرمي الخطاء على الثاني لين استلمت فلوسي
الحين بعد المرممطه ذي كلها والروحه والجيه
واليومين الي خسرتها من حياتي والغيابات والتاخيرات عن محاضراتي مين يعوضها لي ؟
ومين يتحمل مسؤوليه الاخطاء الغبيه الي سارت ؟
اتمنى الي يقدر يفيدني بجهه مسؤوله اقدم فيها شكوى لا يبخل علي
والي حصل معه موقف مشابه يشرح لنا كيف تصرف
إبلاغ
الردود
0
0
الموظف هذا يمر عليه الناس اصناف وانواع. شي فاهم وشي مو فاهم، واحد عارف النظام وواحد جاي يطقطق وكذا وانت ماشي.
صحيح ان طبيعة عمله كذه ولازم يتكيف مع الوضع هذا بس كثيرين ما يقدرون. لان التعامل مع كافة اطياف الناس يحتاج مهارة وطولة بال
الشاهد يا طويل العمر ان اللي صار معك امر غير مقبول وكان الواجب انهم يعلمونك النظام بالكامل من اول مرة ردوك فيها لكن عدم اكتراث الشخص اللي واجهته هو اللي سبب لك كل هذي الاشكاليات.
من اصعب المشاوير اللي ممكن تواجها هي المشوار لاي جهة حكومية تخدم الجمهور. مثال: احوال، جوازات، مرور، شرطة، جمارك وانت ماشي. فتجنباً لتكرار ما حصل معك انصحك إنك تقرا عن اي خدمة بالانترنت وتشوف متطلباتها قبل ما تتوجه بنفسك للجهة المسؤولة، بعدين يالغالي ترى الرخصة تجددها وانت ببيتك وتروح بس تسلم البطاقة القديمة ويعطونك وحدة جديدة عن طريق موقع وزارة الداخلية.
تعوّذ من الشيطان دامك اخذت فلوسك وانتهت المشكلة. الدنيا هذي دروس، والدروس لها ثمن.
قبل 10 سنه و 2 شهر