حياكم تجاربي مع مجموعه من السيارات

34 13

لايمكنك التصويت حتى الحصول على 20 نقطة على الأقل
إضغط هنا للإخفاء

الرفاعي33 13917
قبل 8 سنه و 9 شهر

السلام عليكم ورحمة الله وبركاته 
مساء الخير على اخواني اعضاء منتدى حراج 
لدي موضوع عن عدة تجارب مع الكامري الامريكي
والتجارب :
كامري امريكي 98 فئة LE اربعه سلندر اللون ابيض

كامري امريكي 98 فئة LE  سته سلندر اللون فيراني

كامري امريكي 99 فئة LE  اربعه سلندر اللون اسود

كامري امريكي 2001 فئة LE اربعه سلندر اللون ابيض

كامري امريكي 2005 فئة XLE اربعه سلندر اللون بحري

كامري امريكي 2009 فئة XLE 6V اللون زيتوني

كامري امريكي 2009 فئة XLE 6V اللون ابيض
""""""""""""""""""""""""""""""""""""""""""""""""""""
بدايتا ياخوان وقبل مابدا في كتابة تجاربي
فئة LE تعني استاندر 
وفئة XLE هاذي المطنوخه الفل كامل وهي اعلا فئة في الامريكي
والفئة الرياضية SE ولاكني ماستخدمت الرياضية
والسبب داخليتها تجي تعبانه ولا يوجد بها مكيف خلفي
نجي للمهم ::
اول تجاربي مع الكامري الامريكي///
شريت 98 جمرك ابيض LE مثبت سرعه وايرباقين
وصراحه هالموتر 

كفى ووفى وتجمل معي جمايل وكمان مع اخوي
الموتر كرفته سنه ومشى معي زي الحلاوة 
وبعد سنه من الاستخدام وبدون خرابات تذكر
اشتراة مني اخوي وكرف امه ومشاة الى 700 الف
طبعا استخدمته سنه واخوي 6 سنوات 
والان خبطت مكينته وموقف في الحوش وما فضينا نضبطه

.............................................
الموتر الثاني كامري امريكي 98 6 سلندر فئة LE فيراني
اخذته جمرك وجلس معي 8 شهور
وهنا جاة خراب كرهني فية
والخراب في القير وترتفع حرارة الموتر
وقلت توبة ماخذ 98 6 سلندر 
وبعته 
،،،،،،،،،،،،،،،؛؛؛؛؛؛؛؛؛؛؛؛؛،،،،،،،،،،،،،،،،،،،،،،،،،،
بعد مابعت ال6 سلندر 98 قلت مالي الا ارجع الى 4 سلندر
لانه عملي وعطلاته قليلة وافضل من ال6 سلندر
وشريت كامري امريكي جمرك 99اللون اسود فئة LE اربعه سلندر
الموتر كفووو بس فية صدا خفيف وما ضر الموتر
المهم الموتر ترتفع حرارته مع الطلوع
والسبب يعود لصغر حجم الرديتر
والحل غيرت رديتر سعودي كبير 
ومشى الموتر زي اللوز 
استخدمته سنه و3 شهور وكان روعه 
وبعته على اخوي الثاني 
والى الان موجود معه وعلى بلدة وماشي قرابة 500 الف
ولسى نضيف ويعطي مجهووود 
؛؛؛؛؛؛؛؛؛؛؛؛؛؛؛؛؛؛؛،،،،،،،،،،،،،،،،،،،؛؛؛؛؛؛؛؛؛؛؛؛؛؛؛؛؛؛؛؛؛
طبعا الكامري الاسود مابعتها الا بعد ماحطيت عيني على كامري غيرها نضيفه
المهم اشتريت كامري 2001 امريكي بس مو جمرك 
اخذتها من عند واحد محافظ عليها 
فئة LE اربعه سلندر اللون ابيض
الصراحه هالموتر من اجمل وافضل السيارات الي امتلكتها
موتر متماسك ويصبر معك ولا يقصر يقولك امر 
المهم استخدمته 8 شهور 
ويوم من الايام جاني واحد من الشباب ونشب في الموتر الا يشترية
وازعجني عند الموتر 
واعطيته النية وبعته بمكسب ممتاز جدا
والله يرزق راعية الى الان موجود معه 
:؛:؛::::؛؛::::؛؛؛؛::::::؛؛؛:::::::::::؛؛؛؛؛:::::::::
بعد مابعت 2001 
قلت خلاص ملينا من 98 و99 و2001
بنتطور اشوي واشتريت 2005 جمرك بحري
فل كامل فئة XLE 
الموتر حلووو وشكلة جميل بس قطع غيارة اغلبها لكزس 
جلس معي قرابة السنتين وما يقصر في الخط
رحت علية تبووووك اكثر من 3 مرات 
ولا خسرت فية اشياء كثيرة فقط فحمات وبواجي واشياء بسيطه
وبعته على رجال شرواكم 
،،،،،،،،،،،:::::::::::::::،،،،،،،،،،،،،،،،،،''''''''''::::::::::::
المهم قلت بنتطور اشوي وناخذ موديل اجدد
وحصلت موديلات 2007 و2008 و2009
مليانه الصالات منها وفية اربعه سلندر وسته سلندر
وفي البداية خفت من 6V 
فكرت وفكرت وشاورت وفجئة مسكت على 6 سلندر
اخذت 2009 زيتوني لووووون مسكت 
طبعا جمرك فئة فل الفل XLE 
ومواصفاتها لاتعد ولا تحصى 
الموتر نضيف بس كان فية رفرف وما اكتشفته الا بعدين
صراحه اعجبتني مواصفاته وارتحت لهاذا الموديل بالذات
ولا يطلب كثير 
استخدمت الموتر سنه و6 شهور 
ويوم من الايام قدر الله وصارلي حادث شنيع
وراحت واجهية الموتر 
 وسبب الحادث رسالة واتساب ونحمد الله على كل شي
بعت الموتر تشليح ب18 الف
وهنا احترت يعني متعود على 6 سلندر 
صعبة ارجع الى 4 سلندر
المهم فكرت وفكرت وقلت مالها الا اجيب اخووو الزيتوني
........................................................
والحمدلله وقتها مقتدر وعندي استطاعه اطلع جمرك
المهم طالت حياتكم طاحت عيني على كامري امريكي جمرك ابيض
فل الفل 6 سلندر فئة XLE هههههههههههه ازعجناكم بفل الفل
حصلتها هنا في موقع حراج اتفقت مع الصالة 
وفحصتها وكل شي وطلع الموتر وكالة نضيف جدا 
والى الان موجودة معي والشهادة لله انه موتر خدوم
وقيرة نفس الاوريون بس الحمدلله ماشي الان معي 270 الف كيلو
وقير ومكينة بلد بدون اي مشاكل ....

هاذي تجاربي مع الكامري الامريكي 
طبعا استخدمت افالون بس ماطولت بعتها وعندي اليوكن
بس الموضوع خاص للكامري الامريكي
وبعضكم بيقول ليش هاذا مجنون كامري امريكي
وانا اقولكم انتم عارفين الاسباب الي تخليني اميل الى الكامري الامريكي
والاسباب كثيرة وتويوتا ممتازة بس بعض الوكلاء الله يهديهم
يكرهك في شي اسمه تويوتا ...
والمعذرة اذا طولناها معاكم 
ولاكن طرحت عدة تجارب للفايدة ،،،،،،،
اخوكم الرفاعي33.

إبلاغ

الردود