أضف سؤال أو موضوع جديد          

تحايل بعض الشريطية

up 33 down 7
يارب توفيقك 2014 1548
قبل 2 سنه و 2 شهر



السلام عليكم 

اخواني الكرام حبيت اذكر موضوع بما ان الاخوان جزاهم الله خير ذكرو محاولات الغش والتحايل في بيع السيارات المنتهية 

في البداية حاب اذكر لكم اني اوفر خدمة فحص سيارات بمناطق معينة بالمملكه ووجود اشخاص موثوقين لتغطية باقي المناطق الي لااستطيع الوصول لها طبعا برسوم رمزية ..انا ذكرت هالكلام لا للتسويق او للعرض لأن المنتدى مكان تجارب فقط ابذكر اخر موقف حصل معي..

فيه شخص لدينا بالموقع اتصل علي وقال لي حصلت سيارة بالمنطقة الفلانية وابغاك تشيك عليها ماراح اذكر نوع السيارة ولا المنطقة حفاظا للخصوصية ..المهم الزبون كلمني وقال انا اتفقت مع صاحب السيارة وحلف لي وعطاه من الرخيص  الزبدة قال لي حصلت رقمك بآخر لحظة ولا الرجال كان ناوي يحول له الفلوس ويتوكل على الله يشتري بدون مايحضر ويشوف السيارة بنفسه بحكم بعده عن المدينة وضغوط عمله المهم نسقت مع صاحب السيارة واتفقت معاه اروح اشوف السيارة وسبق علمني ان البدي فيه رفرف فقط والباقي شرط مادرى اني جاي له وقلت له فاضي اجيك الحين قال ايه حياك مع بلعت ريق لأن الزبون سبق اتفق معاه ولا علمه اني بجي افحص قبل التحويل الزبدة اروح لصاحب السيارة بمدينته وواعدته قريب الصناعية واشوف السيارة ماشاء الله ايش هالوقفة ياولد شكلها زوينة واجنب عنده واسلم عليه ونسولف وركبنا السيارة لتجربتها ونزلت ع الشارع العام واكتم للدعسة بشوف العزم والا يطلع فيه صوت صفير  تحت من جهة القزوز مع ان السيارة جديدة وماهي ماشية كثير،  وشوي اسمع صوت من جهة المروحة ومشيتها وادق بوري الصوت ماهو مثل نغمة البلد ياانه مغير او الي شغال واحد وهذي علامة ثالثة واطالع جهة الراكب الا والايرباق مرتفع ومرجعينه اي كلام وحق الطارة برضو مرجع لافيه لمبة مولعة ولا شي والظاهر انها مفصولة واحزمة الامان اثنينهم ماهي بالسيارة هاذي العلامة الرابعة بوجود صدمة ..المهم انتهيت من تجربة السيارة ولي انطباعي الخاص وجاء وقت الفحص الاكتروني الي هو القاطع بيني وبين المالك وندخل السيارة بالمركز وجاء الفني يشبك بالكيابل والوايرات وطلع معنا ان الايرباقات جميعها مفكوكة وتم تعبئة اكياس فاسدة لتملئ فراغات الديكور ووالله ياخواني ان السيارة مقصوصة من الامام ومغير الرفارف وملحم الشاصي من ورا الكمر بشكل يهول وتم تركيب جميع القطع من التشليح من رفارف وكبوت وشبك شمعات كشافات ماخلى شئ وياليت غيرها جديد بدل الحوسة وطالع بصاحب السيارة بنص عين الا وهو معرق وحالته حاله لا حول ولاقوة الا بالله واتصل على الزبون واعطيه التقرير من الى قال الحمد لله اني ماحولت ال85 الف ريال بدون ماشيك ع السيارة وبعدها جاته عقدة شكله 

الفائدة من الموضوع :

لاتسمع لأي كلمة يقولها لك المالك حتى ولو كانت عن مشاكل السيارة لأنه ممكن يضللك بمشاكل بسيطة ويخفي لك الكبيرة 

لا تتفق مع البايع بأي مبلغ حتى تفحص وتتأكد من سلامة السيارة

حاول تجرب السيارة قبل الفحص لترى العلامات وبنفسك واهم العلامات 

وجود اصوات صفير او احتكاك مع المشي بسيارة جديدة يدل على وجود صدمة 

اختلاف نغمة البوري في حال معرفتك للصوت الحقيقي 

صوت مرتفع من المراوح 

حرارة زايدة من الشكمان تدل على وجود مشكلة بالمكينة حتى وان كانت بدون دخان

واتوكل على الله في مالك ونفسك فهو حسبك








إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


اللهم صلي وسلم وبارك على سيدنا محمد وعلى اله وصحبه اجمعين "
إذا ضُيِّعَتِ الأمانةُ فانتظر الساعة "
سبحان الله تعرفهم من وجيهم كالحه فيها سواد غريب من كثر حلوفهم الكذب


up 3 down 0
غريب 111 454
قبل 2 سنه و 2 شهر



والله لو اني بمكانك ما اكمل معه للفحص الالكتروني وانزل من السيارة واعطيه في وجهه كاش ان موترك شي وكلامك للرجال شي مختلف.. ماله داعي تضيع وقتك مع هالأشكال


up 2 down 0
chevrolet zr1 705
قبل 2 سنه و 2 شهر



حياك الله اخ غريب فعلا الكذاب والمحتال لهم هالة تبان معك مباشرة من اسلوب المراوغة

اخ شيفروليه والله لو السيارة لي اني مااكمل معه لكن السيارة لشخص معتمد ع الله ثم علي وسبق وقال لي ان السيارة سعرها مناسب جدا ولا تفرط فيها وتقريبا سعرها كان نازل 15 الف عن قيمتها الحقيقية فقلت ماتضر الأشياء الي انا لاخظتها طالما لايوجد صدمة وحوادث وبفرق السعر يقدر يغير كل القطع جديد على يده ولكن بعد كشف الصدمة الموضوع ماينسكت عنه ولازم اوضح كل شي للزبون وهو يقرر بعدها يتفاوض مع المالك او ينسحب والانسحاب افضل في هاذي الحالة والله يرزق الواحد على قد نيته 


up 0 down 0
يارب توفيقك 2014 1548
قبل 2 سنه و 2 شهر



بارك الله فيك و في أمانتك 
الناس وصل بهم الحال أنه يأكل نفسه و عياله مال حرام بشكل عادي بس المهم أنه يكسب 
و الله لو منك كان زبدت له قلت له أنك ما تخاف الله و نصاب و موترك ما يسوي 5 آلاف بهذه الأضرار 


up 1 down 0
عبدالله خالد 19 367
قبل 2 سنه و 2 شهر



بارك الله فيك ياصاحب الموضوع

ونصائحك مفيده ومهمه جدا قبل الشراء

ثانيا كيف يحول 85 الف بدون مايشوف السياره

حبيت اضيف نقطتين قبل فحص السياره 

اسال البائع هل السياره بااسمك اذا جاوب بنعم اطلب الاستماره والبطاقه

اذا لا لازم يكون الفحص اكثر دقه لانه باالعربي الفصيح شريطي

النقطه الثانيه

اتفق مع البائع ان جميع تكاليف الفحص يتحملها في وجود خلل لاقدر الله

الانسان الواثق من سيارته بيقول اتحمل 

وانتبه تمشي علي كلام البائع او شكله او عمره 

الشريطيه الا من رحم ربي يحلف بالي تبي اهم شي الفلوس


up 1 down 0
abojpl 371
قبل 2 سنه و 2 شهر



حياكم الله اخواني

اخ عبد الله المفروض ازبد له لكن يكفيني انه دفع قيمة الفحص

اخ ابو جبل فعلا من شروطي ان المالك يتحمل قيمة الفحص في حال اكتشاف مشاكل او صدمات غير موضحة من قبل وانا لست مسؤول ادفع عنه قيمة فحص سيارته 

ومثل ماقلت لايغرك الشكل ياما تعاملنا مع مطاوعة وشيوخ وناس يخجلوك بأسلوبهم لكن مع الاسف تلاقيه من كبار الغشاشين بالمعارض والحراجات ولا تعرف عنهم شي لأنهم بمنطقة غير مدينتك ويوم من الايام جاتني رسالة بالواتس اب من واحد من الي تعاملت معهم والله الذي لا الاه الا هو انه مطوع وامام مسجد وموقفة خدماته وعليه طلب بسبب حقوق الناس الي ماكلها لكن الله يبعدنا ويبعدكم عن الاشكال الي ماتخاف الله


up 0 down 0
يارب توفيقك 2014 1548
قبل 2 سنه و 2 شهر



بالله هذا الي يبي يشتري السيارة ويبي يحول الفلوس وش معه هعقل؟
الجديدة وهي جديدة ماتاخذها الا وانت مشيك عليها.
الله يهدي بعض الناس الي يحسب انه يتعامل مع ملائكة مو بشر وبعضهم في مرتبة شيطان
والنصابين الي ما يخافون الله
الله لايبارك لهم كيف تاكلون حرام؟


up 1 down 0
نبيل110 326
قبل 2 سنه و 2 شهر



يعطيك العافية
انت في اي منطقة تقدم الفحص؟

لايك : 0


up 0 down 0
nowait 15
قبل 2 سنه و 2 شهر



اذا ممكن ابغاك تفحص سيارة الله يجزاك خير ممكن تعطيني رقمك او رقم اعلانك اللي أعلنت فيه


up 1 down 0
badralbarbi 90
قبل 2 سنه و 2 شهر



12075057

هذا رقم الاعلان 


up 0 down 0
يارب توفيقك 2014 1548
قبل 2 سنه و 2 شهر



الله يجزاك كل خير ...


لاااااااااايك


up 1 down 0
zol_sudani 14
قبل 2 سنه و 2 شهر