وزارة التجارة في الفترة الاخيرة _موضوع للنقاش

8 4

لايمكنك التصويت حتى الحصول على 20 نقطة على الأقل
إضغط هنا للإخفاء

ابو هيثم 7 2260
قبل 8 سنه و 8 شهر

السلام عليكم ورحمة الله 


بالبداية ياشباب أنا اشكر وزارة التجارة على جهودهم ، وسبق وإنه حصل لي موقفين الاول مع وكيل للسيارات قبل سنه ونص وتجاوبو معي . ولولا الله ثم هم كان مااخذت حقي .

الثاني حصل بالشركة اللي كنت اشتغل عندهم .. جانا عميل بايعين عليه بضاعة سعرها 1000 ريال تقريبا وضمانها 5 سنوات ، بعد اربع سنوات و 10 شهور جاء عندنا يشتكي ؟ طلع الفني واكتشف انه فيه خلل بالتركيب وهذا الشئ يلغي الضمان 

راح واشتكى على وزارة التجارة والصدق انهم وقفو معه ضدنا ، انا كنت امثل الشركه ومسؤول عن القضية ، المنطق يقولون الرجال غلطان وغير كذا الضمان باقي له شهرين وينتهي يعني حلل اوم اوووم البضاعة ؟ لكن الوزارة حكمت للعميل ضدنا وبيني وبينكم تراه يستاهل ؟ العميل الضعيف تأثر فيه 1000 ريال لكن الشركه تطلع هالمبلغ بثانية وحده ، يعني تصرف الوزارة كان صحيح 100%  

لكن هالكلام قبل سنه وسنتين ؟ بالفترة الاخيرة بدى الوضع يتغير ؟ الوكيل اللي اشتكيت عليه طلع نظام قبل 6 شهور وطرد بسبته 90%  من العملاء ؟ موترك ماشي 60 ألف وفيه مشكله وتبي تصلحها على الضمان ؟ تتفاجأ ان الموظف يقولك انت سويت صيانه 5 الاف و 10 الاف فقط ؟ ومادام انك ماسويت صيانه 20 الف ومافوق فأنت مطرود من الضمان ويله امسك الباب ؟ بالحرف الواحد قالها لي ؟؟؟؟

ويييين اللي يقولون بموقع حراج ان الوكيل ماله اي حق يجبرك على الصيانه ؟ وموثقينها بصورة من تغريدة وزير التجاره نفسه !!!

طبعا انت تحاول فيهم يمين ويسار يقولون لك جب فواتير الزيت من 20 إلى 60 الف .. تجي انت ومسوي نفسك ذكي وتروح تجيب فاتورة زيت من اقرب بنشر ؟ وهنا اعطيتهم مجال انهم يصيدونك بالماء العكر ويطردونك ( فعليا ) من الضمان ؟ وعذرهم الوحيد انك غيرت الزيت عند بناشر غير معتمده !

الحاجه الثانيه اللي كنت ملاحظها هي البناشر ؟ اول كنت اشتري الزيت بالكرتون والفلتر من الوكاله واخذ عليه فواتير ، ثم بعدها اروح لأقرب بنشر واغيره وياخذ شغل يده 15 ريال 

الان اجي عند البناشر يقولوها بالحرف الواحد مانغير لك ؟ ويشهد الله علي اني مريت اكثر من 10 بناشر وكلهم نفس الكلاااااام ؟ ويييين الشباب اللي كانو يقولون اذا البنشر رفض تغيير الزيت بلغ وزاره التجاره ويقفلون محله ويعطونه غرامه ؟؟؟

اللي فاقع كبدي هالبناشر مستحيل مستحححححيل مايدري عن هالمعلومه ؟ لكن وش اللي خلاه يتجرأ ؟ والادهى والامر ان هالبناشر بأحدى اكبر المدن الرئيسية وهي الدمام ؟ وارقى الاحياء  ( الفيصلية ) ؟ يعني لو انها بديرة صغيرة او بمنطقه عشوائيه كان قلنا ماعليهم رقابة ؟ 

وش السالفه ياشباب ؟ يعني حماس وزارة التجارة اختفى وبدو التجار يلعبون بذيلهم ؟؟؟؟ والا وزارة التجارة نزلت قوانين جديده واحنا المساكين مازلنا على التحديث القديم ؟؟؟

إبلاغ

الردود