مهم جدا .. كيف تسلم من ازعاج الكفرات والتحبيل والمسامير

54 7

لايمكنك التصويت حتى الحصول على 20 نقطة على الأقل
إضغط هنا للإخفاء

ابو هيثم 7 2260
قبل 8 سنه و 7 شهر

السلام عليكم ورحمة الله 

بالبدايه بحثت عن بعض المعلومات بخصوص الكفرات .. لقيت موضوع واحد منسوووخ ومكرر اكثر من 1000 مرة سواء بمنتدى حراج او غيره 

اللي هو يتكلم عن رموز السرعة والمقاسات من دون مايشرحها شرح كافي ( واعتقد أغلبكم قرأ ذاك الموضوع )

أنا كنت ابحث عن معلومتين الاولى عن نسبة ازعاج الكفر .. والثانية عن معنى رمز التحمل ووش الفايدة منها

طبعا أغلب الناس صارت تعرف رموز تاريخ الكفرات .. ويعرفون ان افضل درجة للحرارة هي A والتراكشن AA !!! ايضا يعرفون ان رمز S معناته اقصى سرعة يتحملها الكفر هي 180 لين توصل رمز Y اللي هو سرعة مفتوحة 300 كيلو متر بالساعة

ووزاره التجارة بالفترة الاخيرة اجبرت الوكلاء على وضع ملصقات تحدد جودة الكفر بالمنعطفات والتماسك على الاسطح الرطبة بالاضافه الى استهلاك الوقود.. صحيح هالشي غير كافي ولم يوضح باقي الامور ( الاكثر الاهمية ) لكن اعتبرها بدايه جيدة هذا اولا ، وليس المغزى انك تشوف رقم قدامك فقط .. المهم انك تفهم وش معناته

المهم بحثت بكثير من المواقع العربيه وماحصلت اي فايده .. لين طحت على موقع انجليزي اسمه (( mytyers))  وراح اضيف الرابط نهايه الموضوع 

الموقع ذا ميزته انه يوضحلك نسبه الازعاج بالكفر وتقدر تبحث فيه عن اي نوع ومقاس قبل ماتشتريه وتتوهق ( طبعا كنت اتوقع بما انه موقع اوروبي راح يفرق عن الشرق الاوسط ! لكن عن تجربه بأكثر من 5 كفرات طلعت لي نفس المواصفات بالضبط )

نسبه الازعاج تقاس بالديسبل (( db ))  من 67 حتى 69 هذا يعتبر كفر هادئ ، من 70 حتى 72 هذا متوسط الازعاج ، من 73 فما فوق انحششش عنه حتى لو كان ( من شركة كبرى ولها اسمها بالسوق ) ترى هالنسبه عالية ومزززززعجة جدا 

نسبة التحمل اللي 90 % من الشعب مايعرفه مع انه يجي مكتوب بعد مقاس الكفر مباشرة (( هذا هو اللي يحدد اذا كان كفراتك راح تحبل او لا مهما كانت قوة صناعته )) وانصح الشباب اللي مواترهم ارتفاعها 60 فأقل انهم يركبون كفر تحمله اعلى من تحمل الوكاله بنسبه 4 درجات ( على الاقل ) الى 8 درجات على الاكثر عشان يسلمون من التحبيل عن تجربه !!!

انا موتري الازيرا كفراته 245/40/19 ورمز التحمل لكفر الوكاله هو 94 ويعادل 670 كيلو ولو تضربها على الكفرات الاربع تطلع 2680 كيلو يعني اكثر من وزن السياره مع الركاب والاغراض مع ذلك حبلت اول شهرين ، وكثيررر نصحوني اغير مقاس الكفر ، لكن ركبت نفس مقاس الوكالة لكن نوع ثاني تحمله 102 وارتحت من التحبيل ولله الحمد ( لاحظ ان الفرق بين 94 الى 102 هو 8 درجات )

رمز التحمل كل مازاد يقسى الكفر نوعا ما (( ولكن قساوة معقولة )) تسلم فيها من التحبيل والمسامير لاتحسبها ذيك القساوة اللي تفكك الديكوارت .. ونسبه الازعاج تستفيد منها بحيث يكون الكفر شبه صامت وماله حس

باقي ان تعرف ان كفرات الوكاله كانت هانكوك الكوري .. بالمقابل النوع اللي ركبته كان نانكنيق التايواني واموره ماشيه معي ولله الحمد (( وهذا اكبر دليل ان المواصفات هي اللي تحدد جودة الكفر وليس اسم الشركه او بلد التصنيع ))

هذا الرابط والصور مع طريقة البحث ياشباب ، اذا اعجبكم موضوعي ياليت تسوون لايك اذا ماعليكم امر .. وشكرا

http://www.mytyres.co.uk/cgi-bin/rshop.pl?dsco=110&cart_id=70193334.110.17570&m_s=3&tyre_for=PKWSo&s_p=Summer_Tyres

إبلاغ

الردود