أضف سؤال أو موضوع جديد          

قصتي مع الصناعيه. وموضوعين لكم للفائده

up 25 down 2
سبحان الرازق سبحانه 2511
قبل 4 سنه و 6 شهر



السلام عليكم ورحمة الله وبركاته 




يااخوان اليوم بنزل لكم موضوعين. 




لان نظام المنتدا مايسمح بئضافة اكثر من موضوع 




الا بعد ثلاثه ايام 




الموضوع عن شداد المكيف وعلية الدركسون 




او علبة الباور على حسب مسميات الاشخاص لها




اولاً نبدا بشداد المكيف 




السياره اكسنت11القديم 




طلع عندي صوت صرير مع المكيف صوته قوي 




وبدون المكيف على خفيف 




رحت لاكثر من ورشه. واحد يقول. سير المكيف 




وواحد يقول. كمبرسر وواحد يقول زيت الكمبرسر 




وكل واحد يفتي من عنده. وواحد قالي رمان الكمبرسر 




جلست يمكن يومين ادور على الورشه. لين جيت 




في ورشه. صغيره. اصلاً من يوم تشوف شكل الورشه والعمال الي فيها تقول هذولا ماعندهم سالفه 




المهم وقفت عنده وقلت له السالفه كامله وسمع الصوت 




وراح جاب سماعه مثل حق الطبيب قلت في نفسي 




ذا دكتور ولا ميكانيكي. وش يبغى بالسماعه. 




المهم. حط السماعه بائذونه وفيه سلك فيه زي الحديد طويل. حطه على الشداد حق المكيف 




قالي ادعس بنزين. وقال هك السماعه وجرب نفسك الصوت من الشداد حق المكيف. 




واجرب والا الصوت منه بالظبط 




واتفقنا على شغل يد50ريال والشداد جبته انا 




ب80ريال اصلي. وركبه وبعد نص ساعه تقريباً 




خلص وطلعت بالسياره. وجربت وراح الصوت. 




وارتحت منه لانه مزعج. 




------------------------------------------
الحين الموضوع الثاني. عن علبة الدركسون 




طبعاً بعد يومين من تركيب الشداد حق المكيف 




طلع عندي صوت حنه او ونه مع المكيف يزيد الصوت كئنه صوت الكرونه حق القير 




بدت الوسوسه. لان الصوت يطلع بعد مايعشق القير 




رحت لصناعيه. وكل واحد يفتي من راسه 




الي يقول القير والي يقول الزيت محروق 




وصوت طنجرة القير المهم اكثرهم قالو وظب قير 




او غيره. مع ان الزيت نضيف ومافيه ريحه ولا شي 




تركتهم ورجعت البيت. وقلت العصر بروح للبنقالي 




الي ركب لي الشداد يمكن يعرف المشكله 




واذا ماعرف لها بغير قير وامري لله ولا ببيع السياره 




المهم رحت له العصر وقلت له السالفه طلع معي 




وجرب السياره. وكل ماعشق القير يطلع الصوت 




وقف وفضى القير. ودعس بنزين بقوه. والصوت 




كل ماله يزيد قالي القير سليم مافيه شي. 




لو فيه شي كان الصوت اختفى اذا فضيت القير 




قالي انا اشك في علبة الدركسون الباور 




ورجعنا الورشه. واخذ السماعه نفس الطريقه الاوله 




بموظوع الشداد. وطلع الصوت العلبه حق الدركسون 




قالي روح جبها لي وشغل اليد قالي باخذ 100




قلت لها اعطيك 150 اذا راح الصوت 




ورحت شريت العلبه كوري. 200ريال 




لان الاصلي ب400ريال والفلوس ماتكفي 




ورجعت له وركبها وعباها زيت وشغلت السياره 




ورحت جربت نص ساعه وانا اسوق والحمدلله والشكر لله اختفى الصوت نهائي. وصوت السياره صار هادي جداً ماشاء الله 




ورجعت له وعطيته 150 ورفض قال ماابغى الي حقي 100ريال. وعطيته ومشيت. 




والحمدلله. انها انحلت.  وهذولا الي يقولون قير 




كلهم كذابين ورجعت لهم واحد واحد. وقلت اسمع الصوت الحين. قالي وش الي غيرت 




قالت ماراح اقولك وش غيرت. بس لاتجلس تكذب 




على الناس وتقول القير والمشكله كلها ماتكلفك 300ريال 




قالي طيب علمني وش الي غيرت وراح الصوت 




وتركتهم ماعلمتهم وش غيرت. 




واسف على الاطاله ياشباب بس 




اتمنى انكم تستفيدون. 




وللاسف ماصورت القطع بوقتها 




بس اخذت صور من قوقل. لنفس القطع 




وبضيفها لكم. عشان توضح للجميع 




وفي امان الكريم 




اخوكم ابو سعود 









إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


اي انا برياض وين الورشة


up 0 down 0
ahmad akk 561
قبل 3 سنه و 6 شهر



فالنسيم  شارع الحمزه. 
هذا رقم العامل اسمه بلال0554403455
كلمه وهو يوصف لك. 



up 0 down 0
سبحان الرازق سبحانه 2511
قبل 3 سنه و 6 شهر