استغفال الناس عن ضغط المكينه أو نسبة المكينه

13 2

لايمكنك التصويت حتى الحصول على 20 نقطة على الأقل
إضغط هنا للإخفاء

Abu-Saad-212 387
قبل 8 سنه و 6 شهر

السلام عليكم ورحمة الله وبركاته ،،

في موضوع قاهرني ولاحظت استغفال عقول الناس فيه ،
والعالم على نيتهم ما يدرون وش اللي قاعد يصير بالضبط
وحبيت أطرحه لعموم الناس عشان يعرفوا ويستفيدوا من الشي هذا 

يا اخوان كلنا قد شرينا سيارات ، وفحصناها بمحلات الكمبيوتر أو (مراكز فحص الكمبيوتر)
وياكثر ما نسمع بـ (نسبة المكينه) أو (ضغط المكينه)

واللي يصير طبعا بعد ما يفحص يطلعلك ورقة مكتوب عليها أرقام السلندرات 
وجنب كل سلندر نسبة الضغط من مية (84% ، 91% ، 79% ... الخ)
ويطلعلك ناتج نسب السلندرات كلها ويقولك ان نسبة المكينه كذا ....
وهذا من أهم الأمور اللي يستند عليها المشتري ويضمن ان المكينه كويسه
أو الشنابر والبساتن كويسه ويقرر بنظافة المكينه

وانت تشوفه قدامك وهو يسويها وكل اللي سواه يجيب حاجه زي الملقاط عليها أسلاك موصله بالكمبيوتر اللي وراه
ويشبكها بأسلاك البواجي أو الكويلات !!!!!!

طيب يا اخوان فكروا فيها شوي ، شلون بيقرر بنسبة الضغط داخل السلندر عن طريق البواجي ؟؟
طيب سؤال ثاني ، هل في حساسات داخل السلندر خاصة بقياس الضغط داخل السلندر ؟؟

الموضوع ومافيه انه يشيك على قوة الكهرباء أو نسبة الكهرباء للبوجي ، وبناءا على الشي هذا طلعلك هذي النسب
طيب بالطريقة هذي هل هو فحص المكينة ولا فحص كهربا وكويلات وبواجي ؟؟؟؟؟؟

لقياس الضغط داخل السلندر ماتقدر تعرفه الا بطريقة وحده
انك تجيب ساعة قياس الضغط وتشبكها بمكان البواجي وتشيك على كل سلندر واحد ورا الثاني
وتقعد تشغل السيارة كل شوي ، يعني موضوع طويل
وهذي الطريقة الوحيده اللي تقدر تكتشف فيها ضغط السلندر وتقدر تعرف قوة الشنبر أو البستن
وهذي فيديوهات لطريقة فحص المكينه الصحيحه :
https://www.youtube.com/watch?v=ovvXnd7AhiU
أو
https://www.youtube.com/watch?v=0W0kQeTvURU
وغيرها الكثير ، سوي بحث عن 
engine compression test
وبتطلعلك فيديوهات كثيرة باليوتيوب

أما مراكزنا على الماشي يشبكلك اسلاك وسبحان الله فجأه نسبة المكينه يطلعها لك 
اليابان ما وصلوا للاختراع هذا

وان كشفوا لك المكينه يطلعون مشاكلها عن طريق التدخين من الشكمان أو أصوات غريبة بالمحرك
الشي هذا كلنا نعرفه ، ومافي أحد بيشتري سيارة تدخن مع الشكمان أو صوت محركها غريب
فنضطر نكشف على المكينه بالمراكز لسبب معين ، ونطلع بدون نتيجه ماغير ملعوب علينا

موقف حصلي مرة بمركز كارتك (المركز الفخم والرهيبين والخطيرين) على حسب كلام الناس
كان في سيارة فورد كراون فكتوريا حق صاحبي وكان بيبيعها ، وكان فيها جلد بلوف
المهم تواعدنا مع المشتري وهو اختار نروح لمركز كارتك ، ودخلنا السيارة وقعدوا يفحصوها
وجاك الفني الفنان الخطير حق المركز ويدعس الدعسه وانتم بكرامه والا الموتر يدخن دخان كثيف من ورا
وكتبوا بالتقرير في الأخير ان المكينه فيها بداية تبويش وتخلط زيت
أقسم بالله ياشباب ان هذا اللي حصل ، هذا غير المشاكل اللي طلعوها للسيارة وهي مافيها شي
من ضمن المشاكل ان فيها آثار سحب شاصي ، والغبنه بنفس التقرير كاتبين البودي بلد
سألتهم شلون آثار سحب شاصي والبودي بلد ، قالي ما أعرف هذا اللي حصل
قلتله اشرحلي واستقعدت لهم هناك ، قام قالي ممكن الباب متغير ، الحين بطبيعة الحال لو الباب متغير 
بتلاحظ آثار فك المسامير اللي مثبته الباب
اخذته وفتحت له الباب وقلتله شلون اكشف اذا الباب متغير !!
شفت وجهه وقمط والله ما عرف يرد ، وقلتله عن طريق المسامير صح ولا لا ، قام قالي ايوا
ووريته ووالله ان مساميرها حق بلادها
قعد يلف ويدور ووراني مكان سحب الشاصي طلع المكان مصدي !!!
ومسحوها من التقرير
وبالأخير المشتري اعتذر وسحب نفسه ، ومن حقه وابسط حقوقه بس اللي يقهر حركات المركز
المقصد ان شغلهم وفحصهم زي وجههم ، ماغير يسحبون الناس بالمظاهر ويجيبون لك شاي وقهوه وديكور
المركز بطران ولا الشغل من جنبها والله وأسعارهم اللي مبالغين فيها
ولا الفورد والله ثم والله ان راعيها غير جلد البلوف واختفى التدخين نهائيا وقعدت معه فترة وباعها

زبدة الموضوع المفروض ان المراكز تكون عندها خدمة فحص نسبة الضغط مو فحص كهرب
والا ليش متعب نفسه وفاتح مركز فحص وجايب عماله ، كان أخذت السيارة لأي ورشه وفحصتها هناك !!!

أتمنى من الجميع الانتباه للشغله هذي واتمنى أكثر ان كانت مراكزنا تهتم بفحص المكينه 

واعذروني على الاطاله 

أخوكم
ابو سعد

إبلاغ

الردود