انواع موية الرديتر الموجودة في الصناعيات
7
4
إضغط هنا للإخفاء
السلام عليكم ورحمة الله وبركاته
حاب إني أتكلم عن موية الرديتر وأنواعها واختلافاتها وهو موضوع للمناقشة لا اكثر ولا اقل.
اذا لفيت المحلات بالصناعية بتلقى أنواع كثيرة منها الأحمر والأخضر والأزرق
وبتلقى الأصلي والمقلد والمحلي والمفبرك وبأسعار متفاوتة
وبالنسبة للأنواع العامة لكل السيارات:
بتحصل قالون الاسي ديلكو (الجالون =3.79لتر) تقريبا بسعر 35 ريال
بتحصل الموتر كرافت تقريبا بسعر 70 ريال
وهذي كلها منتجات أمريكية ومعروفة بالسوق من فترة طويلة وتعتبر من النخبة ولكن المشكلة فيها إنه كثر التقليد منها
يعني الاسي ديلكو مثلا على حسب ما سمعت جا منه تقليد كثييير وبنفس الاسم وبنفس العلبة وحتى نفس اللون
ولكن على حسب ما سمعت يسوونه عندنا هنا مصانع مسكرة على نفسها الباب وتقعد تقلد أو تعيد تكرير القديم وتحطه بعلب مشابهة للأصلي وتضرب فيه السوق وتضرب بالسعر بعد
والخسران هو المستهلك او الزبون.
وبتحصل المحلي زي ماء رديتر الحضارة وغيره
وهذا يكاد يكون موية مقطرة مضاف لها ألوان ويباع بالسوق بسعر رخيص جدا وهذا يصلح للسيارات القديمة او المتهالكة واللي صاحبها مايبي يدفع عليها واجد.
وبعد بتحصل انواع امريكية اخرى وباسعار أقل من الاسي ديلكو والموتر كرافت وتقريبا بنفس الجودة وانا اشوف انها افضل منها لسبب
وهو انه هالمنتجات الامريكية تقريبا جديدة بالسوق وما جا تقليد عليها لحد الان يعني المنتجات هذي اصلية مية المية
عندك مثلا نوع اسمه فريزتون او فرزتون (freezetone) هذا امريكي أصلي ومهو قديم بالسوق ولايزال بأصالته
ويجي منه أخضر وأحمر ونوع مخصص لسيارات الديزل لونه ازرق
واسعاره حول ال30
وبعد الاطلاع على البروشور الخاص بهالمنتج حصلت مكتوب انه مصنوع بولاية فلوريدا وهي ولاية ساحلية وجوها حار مثل عندنا ويتحمل الحرارة
وطبعا بعد القراءة عنه لقيت انه مكتوب لايحتوي على (الايثيلين جليكول) واللي هو مانع التجمد, اعتقد لأنه زي ماقلنا مخصص للاجواء الحارة.
وهذي صورته:
هذا فيما يخص الشركات والانواع.
يمكن البعض يسأل وش احط لسيارتي احمر ولا اخضر ووش الفرق بينهم وليه الاحمر غالبا يكون أغلى؟!
بعد البحث في الموضوع حصلت انه الفرق بين سائل التبريد الاحمر والاخضر هو نسبة المواد الكيماوية المضافة.
بمعنى ان الاحمر فيه مواد كيميائية أكثر من الأخضر وعلشان كذا تحصل غالبًا سعره أغلى من الاخضر
واذا جيت تقول وش الانسب لسيارتي غالبا الاخضر متوافق مع السيارات القديمة والاحمر مع السيارات الجديدة
ايضا يمكن البعض يسأل هل يسوى صيانة دورية لموية الرديتر بمعنى اغيره عند كم؟!
غالبا تزود الموية ولا تغير بالكامل يعني تشوف القربة اذا ناقصة او الرديتر اذا ناقص ويتزود
ولكن فيه بعض الوكالات يغيرونه مع الصيانة الدورية الـ60الف او الـ80 الف بحكم انه صار قديم والمواد الكيماوية اللي فيه نقصت او قلت كفاءتها.
وانا اشوف انه لو يغير كل 60 الف مثلا افضل علشان تنزل الموية وينزل معها أي صدأ أو رايش علشان ما تسكر عليك المسامات سواء في المكينة (قمصان التبريد) أو في طرمبة الموية أو حتى في الخراطيش.
وختامًا أشكركم لمطالعتكم الموضوع وهو موضوع للمناقشة واعتذر عن الاطالة والموضوع هذا اجتهاد شخصي مني ولا مانع من النقل.
إبلاغ
سيارات للبيع
الردود
0
1
والاسي ديلكو سعره غالي ايضا
وابوخلودي بالنسبة للمرسيدس او غيره الوكالات تقول طالما يدور الماء في دورة التبريد لابد يصير فيه بعض الرايش او الصدأ بعد فترة واللي حلها يكون بتغيير الماء. هذا اذا ماطلع لك مسج في الطبلون check coolant
2
0
عن تجربة غيرت ماء الرديتر حق السياره بعد 5 سنوات
وعبيتها موتركرافت الدبه حمراء وتجيك خام يعني لازم
تحط حوالي ٣٥٪ منه والباقي ماء مقطر . حسب كتلوج السياره
0
0
0
0
ولها موقع رسمي ومقاطع في اليوتيوب من نفس الشركه
اللي بريستون ممتازه جداً تتغير كل 240 الف كيلو او 5 سنوات
اللي يسبق الثاني وفيه العلبه السوداء هذا للسيارات الامريكيه
وفيه العلبه الصفراء والغطاء ازرق هذا للسيارات الاسيويه
وانواع كثيره ....
ولكل نوع يايجي مركز وهذا لابد تزيده بماء مقطر وتوزنه
وفيه اللي يجي مخلوط50/50 وهذا بدون اي زيادة ماء مقطر
والله يعطيكم العافيه
1
0
وشركة لها موقع رسمي وفيه لغة عربية بعد وهذا الرابط:
http://www.freezetone-usa.com/#/
1
0
المانيه وتتحمل درجات حراره عاليه جدا وعمرها طويل وصناعتها
الماني وفوق كذا مانزل منها مغشوش وسعرها 50ريال تقريبا
والجمله35ريال
1
0
0
0
الاديتر الحمرا او الخضراء هي مويه عاديه وهي بالاساس ماصنعت لاجواء السعوديه اطلاقا صنعت للاجواء البارده لانها تمنع تجمد الماء عند درجة حراره اقل من 60 درجه تحت الصفر ولا لها اي علاقه بتخفيض الحراره زود عن المويه العاديه واللي يقول تمنع الصدى برضه غير صحيح بمجرد ان المويه تحتوي على الاكسجين فهي تسبب الصدا اكلمكم انا وانا درست تكنولوجيا سيارات موية الاديتر ضحكه كبيره
0
2
علشان كذا موية الرديتر فريزتون لاتحتوي على مانع التجمد.
لكن ماء الرديتر بشكل عام له خصائص تختلف عن الماء العادي بحيث انك لو تشوف مكونات موية الاديتر بتشوفها تحتوي على مواد كيماوية مثل بعض الاحماض او مواد "تقلل" من التآكل والصدأ
وهذا الشي طبعا مهو متوفر في الموية العادية.
وشكرًا لك..
1
0
وبالنسبه لانه يحمي من الصداء فهذا صحيح ايضا لانه الماء الاصلي لو تلمسه تحس فيه نسبه زيت وهذا يساعد طرمبه المويه انها تعيش اكثر ويمنع الصداء
1
0
دعاااية واضحة لهذا المنتج
0
0
الكتلوج يعلمك اذا السيارة صغير اللديتر وتسخن تحط موية نسبة الزيت فيها 60% مثل الزرقاء عند هاوندا والصفراء عند سوزوكي والفوردات .
وفيه سيارات يقولك الكتلوج يكون نسبة الزيت ٥٠ مثل الاحمر الاصلي حق تويوتا .
فأنت أنضر للكتلوج والأفضل الي نسبة الزيت ٦٠ % الاصفر والارزرق للي تسخن بسرعة والمناطق الحارة
0
0
قبل 8 سنه و 5 شهر