تجربتي المريرة بكفرات نيكسن وهانكوك مقاس 19

29 9

لايمكنك التصويت حتى الحصول على 20 نقطة على الأقل
إضغط هنا للإخفاء

ابو هيثم 7 2260
قبل 8 سنه و 4 شهر

السلام عليكم ورحمه الله 

بالبداية ياشباب انا طلعت الموتر اصفار وكانت عليه كفرات هانكوك واسم الدعسه فينتوس بريميوم 2 (k1117) وكان المقاس 245/40/19 ورمز التحمل 94 ( بشرحلكم اهميته بعد شوي )

المهم بعد ماطلعت الموتر ومشيت الف كيلو حبل علي الكفر الاول ؟ لعنبو ابليسكم الموتر مافكيت قراطيسه بعد ؟؟؟ رجعت للمعرض وسألته الموتر واقف من زمان عندك ؟ قالي ماله الا شهر عندنا طبعا هو موزع معتمد ياخذ من الوكيل مباشرة .. المهم ركبت الاسبير وامري لله 

يوم السياره وصلت 11 الف ويحبل الكفر الثاني .. هنا جن جنوني ورحت للوكاله طبعا علطووول عطوني تحويل للوكيل ابن شيهون .. المهم فكو الكفر وقالو ذا عيب طريق مايشمله الضمان ومدري ايش ؟ قلت يابن الحلال حرام عليك الموتر ماشي 11 الف فقط ومحبل كفرين .. يعني اذا وصل 22 الف بتحبل الكفرات الاربع يعني !!!

قام يصرف وقال انت عارف خطوطنا والحفر اللي فيها ومدري كيف .. قلت دامكم عارفين انه مايناسب الطرق عندنا اجل ليش تستوردونه ؟؟؟ تغير وجهه ومايدري وش يقول اخر شي قال خلاص سعر الكفر الواحد 650 ريال وحنا بنحسبه لك ب 600 ؟؟؟ قلت اسمع ياتعطني اياه ببلاش بدل هالكفرين المحبلين والا الله لايشكر لك فضل .

المهم طلعت من عنده يوم شفت ان ماوراه سالفه وكنت ناوي اشتكيهم لوزاره التجارة لولا ان البنشر اللي جنبهم قالي ماراح تستفيد شي لانهم فكو الكفر ولقو فيه شق داخلي .. قلت طيب وش عندك كفرات قالي عندي نوع تايواني اسمه نانكينق وقام يمدحه لي  .. المهم تفحصت الكفر بنفسي لقيت انه قاسي مع الجنب ولين مع الدعسه ( قاسي مع الجنب يعني مايحبل .. ولين مع الدعسه يعني مايطلع اصوات بالخط

توكلت على الله وركبته قدام وعاش معي تقريبا 8 شهور وماشفت منه الا كل خير مع اني اكلت حفر اخس من اللي اكلتها بالهانكوك .. لين وصلت 60 الف وغيرت الطقم كااامل لاني كنت ناوي ازود الارتفاع من 40 الى 45 قلت خلني اجرب النيكسن بحكم انه كوري وضمانه مفتوح وهالشي مغري الصراحه 

رحت لمستودع الوكيل ( العمودي ) وطبعا هالمستودع يبيع فقط ماعنده تركيب ..شريت طقم وبالصدفه عطاني العامل فاتورة ورقيه لان الطابعة خربانه وقالي تعال بكرا واستلم الفاتورة المطبوعه قلت ابشر ..  طلعت من عنده وركبتها عند اقرب بنشر وبعد التجربة حسيت فيها صوووت ؟ رجعته من بكرا عشان اخذ الفاتورة المطبوعة وكلمته قالي عادي بيروح مع الوقت .. المهم الصوت زااااد لدرجه اني احس انه تقل ذيب يعوي ، ونزلت موضوع هنا وقالولي الفلنجات الخلفيه ورحت للوكاله بما انها ع الضمان .. كشفو عليها قالو سليمه المشكله عندك بالكفرات ؟ قلت ماعندكم سالفه الكفرات جدد مالي فترة مغيرها واطلع السيارة واروح لاكثر من بنشر قالولي نفس كلام الوكاله .. طبعا سويت حركه X  بالكفرات ومااستفدت شي .. تذكرت اني محتفظ بكفرات النانكينق عندي بالمستودع بحكم انه باقي فيها نص عمر .. ركبتها قدام مع ان المقاس مختلف لكن اكتشفت ان الصوت رااح ؟؟؟

هنا علطول رجعت لمستودع الوكيل وترددت عليه يومين ولقيته مقفل .. لين حصلت راعي التريله اللي تحمل الكفرات وقالي رح للفرع الرئيسي خلاص منعو البيع والاستبدال من المستودع .. رحت للفرع وقابلت مديرهم وخبرته بالتفاصيل 

اكتشفت ان العامل الحرامي حق المستودع كان يقدر يرجعها باليوم الاول بحكم انها مامشت شي .. لكنه كذب علي وغشني الله لايوفقه لادنيا ولا اخره وانا واياهم شيل وحط قالي شف انت جاي متأخر لان الادارة الرئيسه بالرياض تقفل الساعه 4 العصر .. تعالي بكرا الصبح ونشوف 

جيتهم من بكرا ودق على الادارة طلعله الفني حق الشركه باكستاني مايدري وين ربه حاطه وقام يتفلسف والصوت مايشمله الضمان لان سببه 25% من الكفرات و 75% من السيارة .. قلتله انا بدلت الكفرات الاماميه بشركه ثانيه ( وهي نانكينق المقاس القديم )  يعني اثبت لكم ان المشكله بكفراتكم بنسبه 100% 

قامو يصرفون وقالو وش يثبت لنا انك مراجع المستودع بعد يوم واحد قلت شف قدامك فاتورتين وركزززز على التاريخ وشف الفرق بينهم ..شافو ان كل شي ضدهم قالو خلاص بنستبدل لك الكفرات الاماميه فقط بس تدفع 50% (( المفترض انهم يغيرون الكفران الاربع وماادفع غير 25% لأن توها تكمل 3 شهور ))

المهم قلت ف نفسي دامك لقيت تعويض خذه واحمد ربك .. وسألت وش عندكم قالو نفس اللي على موترك واسم الدعسه N8000 قلت لا ماابغاها ابي النوع الثاني اللي اسمها نافيرا su1 .. لاني عارف ان الدعسه اللي على موتري مضروبه وليش اركب كفرين مثلها واكرر نفس الغلط مرتين

المهم حولوني لفرع الرياض ورحت هناك ومعي الفواتير .. وطبعا عندهم خبر يكلمون الفرع الاول ويعطيهم التفاصيل .. لما وصلت هناك لقيت الدعسه اللي انا ابغاها وسألت عن سعرها اول .. بعدين عطيتهم السالفه ومعها الفواتير 

دفعت 50% يعني قيمه كفر واحد والثاني طلع مجاني ، وتوكلت على الله وحسيت اني تخلصت من هالبلاوي اخيرا وطبعا رحت ووزنت الموتر بنفس اليوم 

جلست معي الكفرات الجديده فترة شهر كامل لين حسيت ان الفرامل صار يضعف ؟ رحت للورشات قالولي باكم او علبه فرامل قلت ادخلها الوكاله اجل وتتغير على الضمان 

الوكالة كشفو على الفرامل قالو سليم ؟؟؟ المهم توقعت ان المشكله بزيت الفرامل قلت خلني اغيره , واروح لم قطع غيار مرسيدس الجفالي واشتري منهم علبة ب 60 ريال واسوي تنسيم وشفط للزيت بالكفرات الاربع .. حسيت فيه فارق بسيط اول ماطلعتها من الورشه

وسبحان الله وانا طالع من الورشه ومتعديها ب 200 متر الا ويقابلني راعي النترا قديمه وجه بوجه طبعا الشارع ضيق وهو عاكس السير .. ابعدت عنه يمين وماانتبهت وش كان ينتظرني ؟؟؟

كان فيه اعمده الفولاذ اللي تشيل مضلات الشينكو وتشق الكفر الايمن اللي ماله الا شهر متغير لاحول ولاقوة الا بالله .. انا مشيت وطلعت من الصناعيه شوي مادريت الا الدركسون يميل بقووووة ويحذف جهة اليمين ؟ طبعا انا سمعت صوت طقه واحسبها ضربت بالجنط مادريت انها شقت الكفر الا يوم وقفت بعد ماطلعت من الصناعية

وامشي على مهلي لين اقرب بنشر والكفر طلع كل الهواء اللي فيه وصار على الجنط .. فكيته وركبت الاستبنه اللي كانت مقاس 40  حق الوكاله يعني مختلفه 

الحين وش اسوي .. الكفرات الخلفيه سبق واني جربتها قدام وفيها صوت .. واللي قدام واحد انفجر والثاني سليم قلت مالي الا اغير طقم كامل جديد وارتاح واحط الكفر السليم اسبير 

ركبت طقم جديد نوع نانكينق والمفاجأة وش ؟؟؟ مشيت على الموتر والفرامل يرجع قوي مثل اول ؟؟؟؟

اثر المشكله بالكفرات حسبي الله على النيكسن واللي ورده ؟؟؟ الاولى تطلع صوت والثانيه تضعف الفرامل يعني كل دعسه اخس من الثانيه .. وقبلهم الهانكوك ازعجني بالتحبيل 

زبدة الموضوع اخذت لي كم درس وبحاول اسردها 

1/ العبرة بالمواصفات دائما وليس بلد التصنيع ..  شف النانكينق التايواني تفوق على الهانكوك والنيكسن الكوري (للمعلوميه ترى الموتر ازيرا يعني كوري بعد).. ومااستغرب بعد فترة ألقى كفر صيني يتفوق عليهم كلهم ؟ ف العبرة بالمواصفات اولا واخيرا

2/ ادري بيجيني واحد ويقول ليش ماركبت ميشلان او قوديير ؟؟؟ ياعزيزي تدري كم قيمته ؟ سعر الكفر الواحد 1200 والطقم ب 4800 لاتنسى انها مقاس 19

3/ ليش ادفع 3 اضعاف سعر النانكينق واحطه بميشلان ؟ النانكينق يمشيني من سنه ونص الى سنتين .. طيب الميشلان بيمشيني 5  او 6 سنوات مثلا عشان ادفع فيها 3 اضعاف ؟؟؟ 

4/ سبحان الله انفجار الكفر الجديد كان خيرة .. لولا الله ثم هو كان مادريت ان المشكله بالكفرات اللي بدلتها على الضمان

5/ كفرات هانكوك من افضل الكفرات اذا كان ارتفاعها 50 فما فوق .. اما اذا كان اقل فهي افشلهم لانها تحبل بسرعه بسبب الليونة الزيادة لدرجه انك تحسسك انها علك بدون مبالغة 

6/ كفرات نيكسن خسرني 2600 ريال خلال 4 شهور فقط جدعت 6 كفرات .. الطقم الاول كامل + واحد من الكفرين اللي استبدلتها ع الضمان والثاني حطيته اسبير مع اني عارف انه مضروب .. يارجل اقسم بالله لو ان الكفرات صناعة بنقالية ماسوت فيني كذا ؟؟؟ لكن الحمد لله اولا واخيرا انها جت على كفرات تتغير بسهوله ماجت على حادث يتعدل ويتسمكر البدي ويطيح من قيمه السيارة عند البيع

7/ رمز التحمل كل ماارتفع كل ماارتحت من التحبيل .. حق الهانكوك كان 94 والنانكينق 98 والنيكسن 102 .. لكن نسبه الازعاج عكس التحمل ( كل ماقلت كل ماصار الكفر هادئ ) طبعا الهانكوك 70 والنانكيق 71 والنيكسن 74 يعني مزعج جدا

اللي يبي معلومات اكثر وبالتفصيييل عن نسبه الازعاج والتحمل يحصلها بموضوعي السابق اللي اسمه (كيف تسلم من ازعاج الكفرات والتحبيل) ومعذرة على الاطاله والاخطاء الاملائية ..

اتمنى تستفيدون من الموضوع خصوصا ان مقاسات 245/45/19 تركب على كثيرررر من المواتر مثل البي ام والمرسيدس امامي والجنسيس واللكزس 460 و 430 واظن الماكسيما والكادينزا والتوريس والامبالا بس منيب متأكد .. الزبدة يركب على اكثر من سيارة ويعتبر أشهر مقاس على جنوط ال 19

إبلاغ

الردود