موقف حصل معي اليوم في الصنااعية

اهنيك بصراحة على حسن تصرفك ولو الكل زيك يمدي اكثر السباكين قفلوا ههههههههههه

جزاك الله خير
صار لي موقف مشابه انا موكل اصلح سياره قريب لي فورد المهم كان فيها تنسيم بالقزوز وواضح
وكل ماروح لواحد يقولي ممكن وجه او مسمار
المهم في واحد دايم اتعامل معه يمني
واوثق فيه وكذا
المهم حطيت السياره واتقفنا فك القزوز وتغير الوجه ب450 المهم قالي نخلصها ممكن بكره لان القزوز صعب وكذا دق علي بعد نص ساعه قالي تعال خذ السياره قلت له صلحتها وركبت الا الصوت اخفتى بس اول ماشغل السياره فيه خفيف ويحلف لي انه من المكينه وانا متأكد 100% انه صوت القزوز عطيته الفلوس وسلمت السياره لصاحبها
بعدين تذكرت انه زرفني 450 ريال على بالي انه فك القزوز اخرتها طلع مغير مسمارين ولاتكلف 30 ريال وزرفني حدود 400 ريال
اذا متعمد الله لايبيحها عليه وانا اعرفه واقدر اروح له الحين واجلده بس خلاص
ربك يحاسبه

اخوي ماكسيما شرفني مرورك .. وبصراحة التصرف طبيعي لاني ما احب احد ينصب علي وخااصة اني ما عندي وقت للصناعيات والفرفرة بين الورش ... اخوي do5ode والله لو اني مكانك ان الـ 400 اللي زرفها لاطلعها من عيونه وعيون اهله ويين عايشين حنا ... لكن ربك يعوض عليك ...

ياريت كل الناس تسوي كذا
فيه ناس تروح اقرب ورشة لو يقولهم التصليح 5000 ريال ما يقول ليش او اي شي علطول متى تخلص السيارة؟ وبعدها يخلي السيارة بالورشة ويجي لها بعدين < هذا النوع من الناس محبوب عند الورش

انا مثلك اذا عندي مشكلة بالسيارة ما اصلح عند اول ورشة وبعد ما اخذ بكلام جميع الورش اروح واصلح لكن اشرط عليه يضمن لي ان المشكلة تنحل ولا ما ادفع ولا ريال
اللي تشووفه يلف يمين ويسار بالكلام لما تقوله "تضمن لي ان المشكلة تنحل" اعرف ان هذا نصاب

وبعض النصابين يبي يصير كسبان سواء صلحت عنده او ماصلحت
يقولك فحص السيارة بـ 30 ريال او بـ 50 ريال حتى لو السيارة مافيها شي بقولك فيها وفيها عششان بس تصلح عنده واذا ما اقتنعت بكلامه وصلحت راحت عليك فلوس الفحص وهو الربحان في كلا الحالتين

شرفني مرورك اخوي ابو مطرقة بالنسبة للي يخلي سيارته بالورشة بصراحة اكبر غلط وانا حصل اني خليت السيارة بالورشة لان الميكانيكي اللي اتعامل معاه كنت وااثق فيه جدا لكن اللي يحصل انه ما ركب كل القطع اللي كنت جايبها له ورجع بعضها واخذ فلوسها
وفي موقف تذكرته الان حصل معي في رمضان يعني قبل شهرين تقريبا ...
في اول يوم في رمضان وكان يوم جمعة كنت عند نااس وتسحرنا سوا وجلست معهم الا الساعة تقريبا 8 الصبح وبعدين مشيت المهم اول ما طلعت من عندهم مشيت يمكن مسافة كيلو الا والسيارة عزمها ميييت وبدات تقطع وفجاة اشتغلت جميع لمبات الطبلون وفجاة طفت العدادت انا علطول عرفت انه الدينمو لانه من قبلها ب 10 ايام تطلع لي رسالة على الشاشة تقول افحص نظام الشحن لكن انا طنشتها .. المهم وقفت السيارة ورجعت ليموزين على البيت وبما انه يوم جمعة فالصناعية مسكرة ثاني يوم الظهر رحت على الصناعية القديمة ورحت للتشاليح وسالته الدينمو يجي له فحمات قال لا يتغير كااامل وسالت اكثر من واحد اغلبهم يقول ما يتغير وبعضهم يقول هات الدينمو واشوفه .. فانا اختصارا للوقت اتفقت مع واحد اني اخذ الدينمو كااامل من عنده واتفقت معاه على 750 وقلت له بعد العشاء مباشرة اجيب لك السيارة ,,, المهم رجعت له العشاء وجبت السيارة بسطحة ونزلتها عنده وبدا يفك في الدينمو ولما طلعه قلت له اصبر شوي ابغاك تفك لي الفحمات علشان اشوف في زيها ولا لا لاني واثق بنسبة 99 بالمية ان المشكلة بالفحمات المهم رفض وقال انا افك واركب بس ما اصلح قلت له طيب هات الدينمو انا بصلحه والله واخذ الدينمو واروح عند كهربائي جنبه واقول له فك لي الفحمات ويفكها وطلعت منتهيه مرررة المهم الفحمات نفس فحمات المرسيدس الشبح بالضبط ويجرب واحد من عنده ويشبك الدينمو على جهاز عنده ومدري كيف والا الدينمو يشحن ومزبوووط بعدها اشتريت فحمات جديدة وركبها ورجعت له علشان يركب الدينمو وفعلا ركبه واخذ احرة يده 80 ريال .. فاول ما شغلت السيارة مرررة مو صافية وفيها كتمة وصوتها متغير قلت له وش فيها قال السيارة جاتني طافية ولسا شغالة قدامك وش دراني وش فيها المهم مشيت من عنده وبدات القصة ... السيارة صارت مشكلتها تزيد وصارت تتاخر جدا بالتشغيل واذا اشتغلت لازم ادوس بنزين لاني لو تركت الدواسة تطفي مباشرة غير العزم جداااااا سي ما تعدي 80 الا بطلوع الروح وزيادة على كذا تطلع لي رسائل تقول ان القير يحتاج الى برمجة وبعدها القير يحول على وضع الامان المهم بهدلتني ,, غيرت البواجي وفلتر البنزين ونظفت البخاخات ونظفت الثروتل وكل القطع الخاصة فيه ولا كاني سويت شي .. بعدين في واحد قالي ان المشكلة من جهاز الافلوميتر وهو خاص بدخول الهواء وكمية الهواء وله علاقة بالتسارع وراكب عليه جهاز ثاني خاص بالقير من ناحية التسارع ومدري ايش المهم قالي ان المشكلة من الجهاز ولازم يتغير لانه التنظيف ما يفيد المهم طرحت المشكلة في احد المنتديات الخااصة بالبي ام ,, فاحد الاعضاء قالي يمكن الكهربائي اللي غير الدينمو ممكن يكون غير الجهاز انتقاما مني علشان ما ركبت الدينمو عنده المهم رجعت على الصناعية القديمة وسالت على الجهاز .. قيمة الجهاز مستعمل بين 1000 الى 700 على حسب النظافة وقيمته جديد ب 4100 بعد الخصم رحت الى الكهربائي اللي غير الدينمو وسالته عندك نفس الجهاز هذا قال لا المهم واجهته وقلت له انه انت اللي غيرت الجهاز والمصيبة انه انكر وقام يحلف ومدري ايش المهم ما لقيت حل الا اني اغير الجهاز بواحد مستعمل ب 850 ريال ,, وهذا نتيجة اني خليتها عند الكهربائي ومشيت المشكلة اني ما طولت يعني بالكثير نص ساعة لكن فك الجهاز وتركيبه سهل جدا جدا ما ياخذ ولا خمس دقايق ... فنصيحة لا تخلي سيارتك عند اي كهربائي او ميكانيكي مهما صار لو توصل انك تستاذن من دوامك وتجلس جنبها .. تستاذن يوم ولا تجلس تفرفر بالصناعية من ورشة لورشة ومن نصاب لنصاب ... معليش طولت عليكم لكن حبيت اذكر هذه المواقف للفائدة لا اكثر

أنا حصلتي لي نفس مشكلتك ,معاي فورد كان هيدروليك حولته يايات ,وبعد ما حولته بفترة طلع صوت , رحت الصناعية ناس يقولون شكمان وجلد وكل ما قلت (اذا ما راح الصوت ما بعطيك فلوس) يرفض ,وحصلت يمني فحصها وقال ما في جلد يايات قلتلها متاكد قال متأكد أذا ما راح لا تعطيني ريال , جبت الجلد والحمد لله صلحت

أنا حصلتي لي نفس مشكلتك ,معاي فورد كان هيدروليك حولته يايات ,وبعد ما حولته بفترة طلع صوت , رحت الصناعية ناس يقولون شكمان وجلد وكل ما قلت (اذا ما راح الصوت ما بعطيك فلوس) يرفض ,وحصلت يمني فحصها وقال ما في جلد يايات قلتلها متاكد قال متأكد أذا ما راح لا تعطيني ريال , جبت الجلد والحمد لله صلحت

حياك اخوي جابر علي وتشرفت بمرورك .. المشكلة الايام هذا قليل اللي يكون واثق من شغله كل واحد همه الاول والاخير يشفط اللي في جيبك وما عليه السيارة انحلت مشكلتها ولا لا ...

انا قالوا لي توضيب مكينه وقير

وبالنهاية طلع سلك البوجي رقم اربعه وصلحته ب 20 ريال فقط :)

انا اذكر اول ماطلعت السياره وكاله حصل لي مثل ماحصل لك اصوت قربعه من جهة السائق اذا جيت عند عيون القطط والحفر .. المهم رحت حق واحد يمني قال لي عكوس !! قلت له السياره جديده قال ايه العكوس منتهيه طبعا انا عارف انه نصاب بيركب لي العكوس وبيبيع العكوس القديمه .. رحت لواحد ثاني قال السياره مافيها الا العافيه ويبي لك جلد وبس ..!! نصيحتي شيك ع اكثر من ورشه وغير كذا اشرط عليه لو ماتصلح اللي تبغاه تسترجع فلوسك .. 

اخوي ياسر شرفني مرورك ..
اخوي المحترف بصراحة الذمة والضمير في الزمن هذا انقرضت
لايك للجميع وتقبلوا تحياتي ,,,,

ايش رايك في اللي صلح السياره واخذت القطع القديمه كلها ولا خليت الا صواميل والحاجات البسيطه وباقي معي الا الحين في الغماره ما غير اطالع فيها كل مارحت مشوار تونسني وفي نفس الوقت ما احس ان السياره فاضيه هههههه
لكن اقدر ابيعها في السكراب او شي زي كذا؟؟؟؟

نفس موقفك بلضبط 
عندي صوت مع عيون القطط ورحت لهم برمضان عند واحد كتب لي لسته اغراض وقلت له ذي كلها خربانه قال ايه قلت متاكد قال انشاء الله
المهم قلت له اذا ماراح الصوت تتحمل مبلغ كل القطع ومني محاسبك قام يولول عرفت ماعنده سالفه 
ورحت لواحد ثاني اسمه عمر في صناعيه الطائف وحرامي عيني عينك لان ما يشتغلون في الالماني الى بعضهم المهم قال لي سيارات يبي لها شغل
ويبي لها فكفكه وشغلها مطول
قلت عجيب اجل !
المهم كان عنده زحام وقلت له طيب كم بتكلف قال لي احسب حسابك 1000 ريال قطع و500 شغل يد وقال لي القطع موجودة عندي لو تبي تشتريها مني 
قلت عجيب أجل نصب عيني عينك!
المهم عرفت انه نصاب ورحت لواحد الله يطول بعمره ويجعل مثواه الجنه أسمه أحمد كنداسه بصناعيه الطائف 
المهم كشف منا منا وجرب وقال لي عامود التوازن شريته بي 75 ريال وغيرت مرة وحدة مساعد الدريكسون بي 55 ريال واخذ مني 100 ريال عليها كلها 
يعني بالله شف نصب هلسوري بس ؟؟؟؟ حسبي الله عليه مدري وشلون يطاوئه قلبه ياكل حراااام وياكل اطفاله حرام؟؟؟

شرفني مرورك اخوي استشاري الحب .. تصدق اني اشيل هم الاصلاح والقطع اكثر من العطل نفسه .. لاني عارف اني راح افرفر بين الورش وبين النصابين وكل واحد يفتي من راسه لكن القطع ما اشيل همها لاني عارف مكانها ولا راح اتعب على ما احصلها والفلووس الحمد لله موجودة ,, لكن المشكلة في اللي يحل المشكلة ويشخص مزبوووط ....

أتوقع لو في مهندسين سعوديين متمكنين ما راح يغشك لو أيش
لأنه يعرف مدى هذا العطل ويش يسوي وممكن يقطع في وقت صعب جدآ
وراح يشتغل بأمانه  أقل حاجة أنك تكلمه باللهجة العامية ولا تتعب بتفهيمه

سمعت أن بالطايف وضواحيها مهندسين سعوديين والشغل عليهم بالطابور
هل الكلام ذا صحيح؟؟؟؟؟؟؟

بس يا اخ صاحب السمو لاتحط في ذمتك انا حصلتل نفس مشكلة الدينمو وغيرته وشغلة السياره وظبة جير ولاتنسي كل شي علي الكمبيوتر

الله يستر على الجاهلين واللي على نياتهم