استشارة اكسنت او جيمني

الحين بتشتري الجيب عشان نقطتين مطر تجي بأمر الله في السنة مرتين بس


الحل بسيط لا تروح مع الشوارع اللي معروف انها غرقانه كل سنة فيه طرق بديلة لا محالة وانتهت السالفة


واذا بتروح لمستنقعات بتغرق سواءن معك جيمني ولا جني


يعني من كبره ولا رفعه ذا


لوك قايل انا رجال راعي طعوس ورملة خفيفة وبحتاجه في الشتاء لو نقول ضحي وخذه


بس دامك ماطقيت له خبر ، الاكسنت افضل ذاك مشنقص على الفاضي ولا يشيل ورا مثل الاكسنت بكره ولا بعد بتسافر قريب ولا بتحمل شي الاكسنت معقولة واغراضك معزوله وفي مكان آمن


هذا الكلام

ترى الجيمني اضيق من الاكسنت خصوصا اذا كان قير عادي وانت طويل مابتقدر تعشق زين الا ركبتك صافقه تحت الدركسون

تابعت مواضيع للجيمني
كل الي جربوه عجبهم كاستخدام
خفيف وتكييفه حلو وان احتجته للارصفه ماعندك مشكلة
بس يكون استخدامك له حق مشاوير بس وعندك موتر غيره

من قال ان المكينه تخبط من المطر

ممكن تطفي من المطر لكن تخبط قوية شوب

ياطويل العمر انا بسولف لك عن تجربتي ونفس سؤالك وحيرتك

كان عندي خيارين .. اكسنت او سوزوكي جيمني

والسعر متقارب حيل بينهم والقسط الشهري متقارب أيضا وايضا حجم المكينة

استخرت وبعد خيارات كثيرة قررت اشتري جيمني

للمعلومية السيارتين لا تصلح للسفر وصعبة جدا لأنها خفيفة وغير مستقرة .. يعني سيارة مدينة

انا اخذتها للعمل ومشاوير خفيفة لأن الجمس اللي معي ( حوسة ) بالمواقف وكل من هب ودب صدم بك والابواب من الجنب تتضرب وحالتك حاله

الجمني اخترته لأنه اول شي سيارة مرتفعة تحتاجها بمطبات الرياض وشوارعها الباريسية , وامور الامطار في حالات السيول تخدمك

الاكسنت حلوه ولكن يعيبها انها مره نازلة للارض ويمكن لأن تعودت على الجمس اخذت الجمني لكن وبعد تجربة سيارة في منتهى الروعة والانسيابية

وجميلة كشكل خصوصا الرمادي مع لون الجنوط حلوه جدا

وبالأول والأخير وانا اخوك شوف ايش احتياجاتك للسيارة بكل الاحوال .. مثل ما ذكرت لك المواصفات متقاربة لكن يختلف ( البدي والارتفاع )

مع الأخذ بعين الاعتبار ان سوزوكي ( ياباني ) والاكسنت ( كوري ) ماهو قصور في الكوري وكلهم عينين في رأس لكن وقت الصيانة والقطع ما تعوق معك

بالتوفيق لك وللجميع

بيض الله وجوهكم ع الردود الطيبة..
اخوي الاحترافي انا عندي سؤارة كبيره عائليه وأتعبتني بشرب البنزين وكبرها مع الزحمه..
ومن خلال تجربتك كيف صرفية البنزين والراحه في الجيب

حبيبي طيب شوف الكريتا من هيونداي نفس الاكسنت واحسن ومرتفعة .. بس يمكن سعرها اغلى بشوي بس انها اوسع من الاكسنت والجيمني

الصرفية رائعة جدا والراحة كويسة نوعا ما لأنك تبقى راكب سيارة قليلة الرفاهية ويفرق معك طبعا لو غيرت الكفرات لأن لما تشتري السيارة معطينك كفرات بريجستون وطبعها قاسية وغيرت الكفرات لدنلوب واروع ما يكون مريحة جدا

الله يسخر لك اللي به الخير لك

لاهنتو كتب الله أجركم

وعليكم السلام ورحمة الله وبركاته

خياراتك جميلة صراحه، لكن اذا خوفك من المطر فأقول لك لا تخاف من هذي الناحية

إذا استخدامك داخل البلد وخطوط على الخفيف فالأكسنت سيارة رائعة وراح تبيض الوجه

عملية جداً وإقتصادية من ناحية البنزين وقطعها رخيصة ومتوفرة ومرغوبة عند البيع وثلاث وكلاء

يعني خيار مثالي، أما إن كان استخدامك في نسبة دخول للبر وصحراء بشكل متكرر فالجمني طيب

لكن مافيه لا راحة ولا وسع ولا شيء ومعروف قطع السوزوكي غالية وغير متوفرة بكل مكان

فأنت قلبها براسك وأستخير الله والله يكتب مافيه الخير.

تقبل مروري

تسلم بيض الله وجهك

طبعا انا في مدينة أبها .. والأمطار الفترة الاخيرة والحمد لله صارت تقفل بعض الشوارع..
وأحد الزملاء معه النترا 2015 دخل بها في الماء وماوصل إلا نصف الباب وخلطت المكينة الزيت بالماء وغير مكينة جديدة.. وواحد ثاني معه افالون جديده نفس المشكله بس ماخبطت المكينة ولكن فيها مشاكل ماعرفوة الوكالة يصلحونها..
علشان كذا انا احتاج سيارة اقتصادية وخفيفة وماتتأثر بمثل هذي الامور البسيطة..

ولايمنع المشاغبة في البر أحيانا.. ^_*

السلام عليكم
اذا صامل على الجيمني عندي لك راي
شوف الجيوب الصغيره مثل التوسان من هونداي والاسبورتيج من كيا والرف فور من تويوتا واللي مثلها من الشركات الثانيه
مرتفعه وصغيره واقتصاديه لكنها اوسع من الجيمني 4 ابواب وبعضها فيه دبل وبعضه بدون

الجمني عند واحد والله مية مية ويكفيك الدفع الرباعي تستفيد منه ودام سيارة حقت مشاوير وهجولة السوزوكي الجمني افضل

تسلمون لاعدمتكم

عندي مشكله يا شباب الجير الرابع بالجمني يفصل ما يمسك