خويي مغزر الان وش الحل

ي اخوان انا الان رايح له بالخط ويبغالي نص ساعه عشين اوصل
والرجال دايخ ماعنده مويا ولا اكل والخط السويع بعيد عنه

امن الطرق . او الدفاع المدني 

إذا كان في موقع التطعيس اللي عند الكبري الميت كلم أمن الطرق
يعرفون الموقع زين وإذا ما أفادوك شوف الدفاع المدني

الموقع تدخله السيارات الصغيرة بس يبيلك تنسم الكفرات ولا توقف في موقع فيه رمل

مايبيلها خله يرسل لك الموقع اللي هو فيه ، ووقف قدام مدخله مباشرة وكلم امن الطرق ولا الدفاع المدني خويي كذا وكذا ، ويجون بجيوبهم واركب معهم ورح شربه ماء


ويطلعون موتره وقله ثاني مررره لا يتعودها يسوي ذيب ومقطع الفيافي

الله يعينك ، وطمنا عليه ، ومثل ماقالوا الاخوان عليك بامن الطرق

كان الله في عون امن الطرق والدفاع المدني من الناس الغبية الي تدخل البر بدون سبب بسيارات صغيرة .  

والله وانا خوك لا هو وقت بر ولا هو جوه في الحر هذا 
ودايم اهل البر وهم عندهم خبره كافيه فيه يصيحون ويحذرون بعدم دخول البر بسيارة وحده حتى لو هي دبل ولابد من سيارة ثانية 
واخذ ماء كافي تحسباً لأي طاري يحصل 
الحمد لله ان خويك طاح في مكان فيه ارسال للجوال 

الاخ ابو فيصل مؤسس قروب رواد بحرة مايقصر معاه خليه ياخد رقمه من اليوتيوب يكتب رواد بحرة ويبشر بالمساعدة منه او من اعضاء القروب اللي في بحرة

اعطيني رقمه ولا موقعه اروحله الحين

الله يعطيكم العافيه جميعا
ي اخوان الي حصل ان الولد اول مرة يدخل بحرة بحياته .. ومتحمس له اسبوعين يبي يروح واتفقنا معاه على الخميس الجاي
لكنه تحمس الله يهديه وروح اليوم الساعه ٩ الصباح مع اخوانه الصغار

وغرز .. والله يهديه دعس بنزين يبي يطلع وزادت التغريزه

وصلتله الساعه ١٢:٣٠ وجانا واحد الله يعطيه الف عافيه مع لاندكروزر وقعد معانا من الساعه ١٢:٣٠ الى الساعه ٢
لين ما قدرنا نطلع السياره والحمدلله

طبعا للاسف انفك الصدام من الرفارف بعد ما طلعنا السياره لانها صدمت بالارض بقوة .. وطاحت اللوحة وانكسرت اللحية

ورحنا صلحنا له عالسريع وتوي ارجع البيت

والله يهديه ويهدي الجميع

الحمدلله على سلامتهم 

البر مايعرف والله تموت وماحد يدري عنك

قبل 7 سنوات اول مرة اشتري جيب باثفاندر قير تماتيك سيارة فيها فسقة بالبر ماشاء الله تبارك الله الين وثقت فيها خلاص

المهم يوم من الايام كنت ادرس بالكلية ومسكت معاي اطلع بين المحاضرات واروح افرفر بالجيب ع الرمال وخويكم غشيم وقتها طلعت طلوع وقبل ماينتهي الطلوع كسرت الا والجيب غاطس غطسة ملعونة ويحلف اذا طلعته والحركة هذي لا لاند ولا باترول يطلع منها لأنها غلطة شنيعة ولها مسمى عند اهل التطعيس ..المهم انسم ماانسم مافيه فايدة الين في الاخير اطالع بقربة الاديتر من العطش كرهت نفسي وسيارتي ارتفعت حرارتها بسبب نزولها داخل الرمل وتغطى بطنها بشكل كامل لافيه تهويه للمحركات ولا لفتحة الشكمان في الاخير رحت اسود وطقم الكلية راح زلط خخخ 

الحمدلله طفيت الجيب 10 دقايق عشان يبرد ويسترد عافيته وخرجته بلطف من الله وزيادة من تنسيم الكفرات الي ربي خارجني وبعدها توبة انزل رملة لحالي حتى لو معي ماطور معدل 

وش جوه اللي يخش البر بذي القايلة اول الاسبوع ودوامات وقرف والواحد ماله نفس لاي شي مدري وس يحس فيه خويك !!!!! هذا انتحار

شكله من متابعين رواد بحرة  ههههههههه

بالنسبه لوضع البر هالايام خاصه بالرياض قريبه مني طعوس الخراره وام دكه ومحليه بالليل هالايام درجة الحراره 34 وجو عليل لابرد ولا حر

اما بالنسبه لوضع الطلعه في البر اذا لحالك تقدر توصل اخر الطعوس بسياره وحده اذا نات منسم الكفرات وموترك حق بر وسواق بشرط ماتتفلسف تدور مكان زين وتجلس فيه اما لو معك خوياك واكثر من سياره لاتمشي الا على جنبك وطامر مثل ماتبي لانك لو غرزت خوياك معك
بس انتبه لموضوع القص والفناجيل والقلبات والباقي امورك في التمام