السعودي الدفيع الي اهم شي سيارته تخلص بسرعه والا ابيعها

بكل شي لازم تحشرون الاجانب ههههه

قول الورش قول عمال الورش

والعمال منهم برايك 

انا احتك بالاجانب كثير وربك انك بنك متنقل عندهم 

وانهم اكلينا اكل الا من رحم ربك 

وعليكم السلام ..

فعلاً كلامك سليم , الواحد يتأكد من العطل ويلف على الورش كلها
وتنبيه مهم بعضهم يكون متعامل مع ميكانيكي او كهربائي معين
ودائما يودي سيارته عنده يصلحها مع الوقت تسمعه يقول لك لما تسأله عن مبلغ التصليح
يقول لك ما عليك الورشة ورشتك وما نختلف ولما تجي يصلخك بسعر فلكي
لهذا الحذر الحذر لازم تعرف ايش العطل واذا فيه قطع انت روح جيبها مو ترسله وما تدري نوعية القطع اللي جابها
ولا تدري هل أسعارها حقيقية ولا متفقين عليها لهذا الواحد ينتبه ولا يستعجل.

تقبل مروري

سبب النصب هو جهل المستهلك
تلقى يدخل الورشة و يصلح بس يبي يخلص و هو ما يدري وش الخراب ولا يفكر
رب العالمين بالعين ما شفناه لكن بالعقل عرفناه
مو شرط تكون خبير سيارات علشان لا ينضحك عليك
لازم تفكر بمنطقيه و تحلل الامور بمخك
اذكر سيارتي طلع فيها صوت طقطقه بالمكينة و زي صوت ذراع و واضح كثير
كل الورش قالو توظيب و ما يحتاج فحص
الصوت كان عالي و واضح
انا ما اقتنعت مع انه لو واحد ثاني كان دخلها توظيب مباشرة
لفيت على كل الورش و ما خليت ورشه اخر شيئ حضلت باكستاني ورشه ما تيجي متترين
فحص السيارة و قالي الصوت من طرمبه الماء ؟؟
خليته يبدلها و بعد التبديل راح الصوت !!
يعني بدل ما ادفع 5 الاف دفعت 300 !!

يابن الحلال السعودي مستهدف بكل مكان وين ما يروح والعيون عليه
تبي الورشة والصناعية حدث ولا حرج السعودي انسان مسكين ويعامل
الناس بطيبة وخاطر زين والعمالة الله وكيلك مستغلين النقطة هذي تلاقيه
يلف ويدور علشان يوصل اهدافه على ظهر السعودي الدرويش

على كل حال خلنا من السيارات والصناعيات والورشات والعمالة الحونشية
شوف سوق الجوالات وشوف النصب عليهم تحت نور الشمس ماهو بالغلس

تحصل جهازه يحتاج برمجة او تنظيف او شغلة تافهة والعامل يحط بالجهاز الف عله وعله
علشان يدفع المسكين 200 او 300 على شغلة بسيطة

والله اني اشوف بعيني اشياء تحز بالنفس والمشكلة مايتوب السعودي يرجع لهم مره واثنين وعشر
وخذ لك نفس النصب ونفس الاحتيال وياقلب لاتحزن

اسمعنى وانا خوك وقبل نرمي بلانا على غيرنا ونقول الاجانب اكلونا 
وسويناها حكاية فكل مكان نسمعها 
اول شي الوكالات ماكلينا ومتمزمزين فينا مزمزه 
ولا عمري سمعت واحد اشتكى من الاسعار الخيالية في قطع الغيار 
ثاني شي مثل ماتفضل الاخ حوسة جهل المستهلك شي رئيسي 
ولا تقول لي احنا طيبين لا والله شيل هالكلام من راسك احنا متكاسلين ومانبي نقعد على راس العامل في الحر 
لا بروح البيت وريح تحت المكيف وانتظره يتصل على يقولي سيارتك جاهزة وحتى والبعض حتى مايكلف نفسه ويسأله وين القطعة القديمة وفاتورتها 
ولا يبي يروح ورشة ولا ثنتين ولا ثلاث على طول اول واحد يطيح عليه خلاص عنده حط الرحال 
صحيح مستعجلين ولكن ماهي طفاقه فينا ظروف العمل والاسرة ومتطلبات الحياة اليومية هي اللي تجبرنا على كذا خصوصاً اذا الواحد ماعنده الا هالسيارة
اخيراً بخصوص الاصلاح ماهو كل شي يتصلح انت تقول مثال فحمات الدينمو 
معاك امرها سهل وممكن تتولف ولكن اذا طلعت كتاوت من وين بتجيبها اذا الوكالة مافيه الا دينمو كامل  
وحتى لو قال لك انا بدبرها اتركه ولا تعطيه مجال يفكها من دينمو قديم ويركبها لك وياخذ منك اجرة نص قيمة دينمو جديد وبعد شهر ولا اثنين يخرب لا ياحبيبي انا من البداية  اغير دينمو وانساه والقديم ارميه بأقرب زبالة وانتم بكرامه عشان حتى لو فيه شي يصلح مايضحك على غيري 
ياعزيزي راعي الورشة اذا شاف اللي قدامه شخص فاهم ومطلع بيحسب لك ألف حساب 
ولكن اذا شافك مستعجل وتبي تروح فإنت اعطيته مبتغاه 
وكلامي ماهو مختص بأصحاب الورش فقط أي شي فيه مهنيه يجب انك تكون مفتح وحريص  
هي شغلة اساسيات لو الواحد حاول يتقنها شوي صدقني ماراح احد يضحك علينا خصوصاً ان اغلب سياراتنا عادية ومافيه ذاك التعقيد 
يعني لو الواحد طلع عنده صوت في المكينة قبل يروح الورشة يمر اقرب بنشر ويخليه يفك السير ويشغل السيارة ويسمع هل الصوت موجود ولا اختفى 
والله اذا راح بيعرف ان المكينة مافيه شي وان الصوت من شي خارجي بكره ولا طرمبة وحتى لو راح بعدها لورشة وقاله توضيب وحجيته انك اذا فكيت السير يروح الصوت بتشوف كيف وجهه يختلف 

السلام عليكم الموضوع غير قابل للنقاش ليش

اولا الاجانب هم من طورو هذا البلد الي كرمه الله سبحانه

وبعدين ياخي لكل مجتهد نصييييب

اذا بتشتغل بتحصل اما سالفت فاتوره ووين القطعه الفلانيه كلام واهم الي بيتعب بيحصل

شكرررررن

اصلا المشكلة في العامل في الورشة و المستهلك نفسه.

اقولك المستهلك يسمع صوت قربعة بالسيارة ما يعرف من وين هل مكينة هل عكس هل مساعد يعني تكثر الأسئلة.  ويروح المسكين

لورشة ويبدا يشرح السالفة ويبدأ المكانيكي المحترم يفتيك  ويقول غير مادري وش والا غير ذاك والا غير ذا.  ويغير المسكين ويدفع

مبلغ و قدره على اشياء بالأساس ماهي خربانه ويكون الخلل مازال موجود.

عشان كذا الواحد لايسمع  ورشة وحدة بل يروح لأكثر من ورشة ويروح الوكالة بعد حتى لو غاليين لعلهم يطلعون لك العلة.

عشان كذا لازم كلنا نشوف سياراتنا ايش فيها و ايش ما فيها و معظم الاشياء بالسيارة تصليحها ما ياخذ ذاك الوقت يعني اقل 

شي نص ساعة ياخي اقعد لك نص ساعة على راس العامل اللي يصلح سيارتك واطلب منه فاتورة و القطعة القديمة و قضينا

واركب سيارتك و الله يسهل و يستر علينا و عليك.

سامحوني على الاطالة.

ياخي أنا عندي دوام و عندي بيت و زوجه و أولاد
من ٦ الصبح لين ١٢ الظهر مداوم و من ٤ العصر لين ٩ الليل أخلص أشغالي و مستلزمات البيت
البلا ان أمور حياتنا حالياً كلها تعتمد على السيارة
تقدر تروح لدوامك على رجولك ؟
تقدر تمشي عيالك في تاكسي ؟
حدِّث العاقل بما لا يُعقل فإن صدق فلا عقل له
مثلاً دينمو البطارية انعدم و سعره جديد ٢٥٠٠ ريال
لفيت محل و محلين و كلهم قالوا دينمو معدوم و ما ينفع بريال
يعني أقعد يومياً ألف الورش لين ألقى واحد يقول لي فحمات معدومة ؟
يعني خلال الفترة هذي تقعد سيارتك طايحه عليك في كل شارع انت و عيالك
مرة تتصل على فلان و مرة تتصل على علان عشان يفزع لك
الشغلة منطق أكثر مما هي عاطفة
خلاص محل أو محلين قالوا الدينمو معدوم يعني الدينمو معدوم
مو معقول الورش كلهم متفقين انهم يلهطونك !
عندك إستطاعة غيره و عيش حياتك
ما عندك إستطاعة اصبر عليه لين ربي يفرجها عليك
لكن مو منطق انك تأجل أشغالك و مستلزمات عيالك عشان انك ما اقتنعت بعلّة الورشة الفلانية أو سعر العامل الفلاني

ايه ياحبيبي يابايلوت من ابسط حقوقي اطالبه بالفاتورة اذا اشترى قطع غيار 
ماهو يقول اشترى لي قطع ولا على ايش احاسبه 
واطلب القطعة القديمة وأتأكد ان اللي في سيارتي جديد حتى لو اضطريت اروح ورشة ثانية  ياحبيبي عشان مايعطيني فاتورة لقطعة في سيارة زبون ثاني مثلك مو هامه الموضوع 
ويحسبها علي 
هذا اصلاً اذا خليته يشتري لي قطع 
وعارفين ان لكل مجتهد نصيب 
وشغلة ان الاجانب هم اللي طورونا فهذا كلام معروف المقصد من وراه ولكن لعلمك مافي شي بلاش كله بحقه لو مافي دراهم محد بيسوي شي 
ولكن مانبي تدخل في مواضيع مالها داعي 

تصدق عاد ياعزيزي قلتها قبل الموضوع غير قابل للنقاش !!

والله لو الجميع طبق كلامي ان ينظبطون صح :

اذا رحت محل وقالك المشكله من كذا قله على مسؤليتك 
اذا ارتبش ولف ودار هذا اسحب عليه لانه مو واثق من شغله !
لكن اذا قال على مسؤليتي قله ترى اذا ما انحلت المشكله ولا ريال !!

وثانيا اذا جيت لاي محل وقالك خلاص خل الموتر وروح قله لا 
انا فاضي وماعندي شيء وبتعلم منك ( اذا طول اتصل على اي واحد
يجيك وارجع له ،، واهم شيء ماتعلمه انك بتروح ويكون عنده علم )

ثالثا اي قطعه يفكها خذها معك يمكن المشكله فقط في جلده وهو
غيرلك القطعه كامله ^_* ( غيرت مبطي كلتش مروحه لماركيز 
واخذتها من التشليح بالمروحه ورحت المحل وغيرها كلها بالمروحه مره
وحده والاوله رماها عنده ،،،، المهم اخذت القديمه قالي هذا خربان !
قلت الريش مافيها شيء ! وسكت !!!!  وبعد فتره طويله انكسرت ريشه
وحده بالمروحه واخذت المروحه القديمه وفكيت الكلتش الخربان وركبتها
الخ ......

المهم خلك ذيب وفاهم قدامهم ولاتصير دلخ معهم 
كل كلمه يقولها تقول ابشر !!

يا شباب بحكم اني اجنبواتي

بصدقكم القول والامر هذا وتحديدا الميكانيك او السباكين

نفس الطبعة باي بلد كان في مصر او سوريا او العراق او الاردن

ترا المشكلة عامة والافتاء شغال والكل يبي يلهط فلوس باي بلد كانت

ونصائح الاخوة هي الصح ومثل الكثير من الشباب جلدوني السباكين لين اتعلمت

واقدر احدد العطل واقل شي اذا دخلت ورشة اضمن ما يسرقني ويورطني باشياء مو عطلانة اساسا

ومقولة الورشة ورشتك ترا تشمل جميع الجنسيات :D
يعني الكل محفظة متنقلة