تجربتي مع الشريطيه .

16 8

لايمكنك التصويت حتى الحصول على 20 نقطة على الأقل
إضغط هنا للإخفاء

amer ahmed 566
قبل 7 سنه و 7 شهر

السلام عليكم. 
اطرح عليكم تجربتي مع الشريطيه حصلت لي قبل اقل من شهر في جدة.
قريبي كان بيشتري سيارة و طلب مني ارافقه بحكم قله خبرته في السيارات. 
جلست ابحثله عن سيارات في موقع حراج. و ماتوفقنا في البدايه. 
و نزلنا الحراج و كنت كاره اني اروح للمكرفونات. و قلي 
فيه شخص اعرفه قلي تعال عندي. و اعتقدت في البدايه انه راعي معرض
و طلع من الشريطيه اهل المكرفونات. و قبل مانوصله حصلنا كامري و لسا ماقلبناها مجرد 
نسأل عن سعرها الا و جاء الشخص اللي يعرفه و بدا يعيب في الكامري و مين يشتريها هذي السيارات 
خلاص قديمه و من الكلام دا. عرفت على طول انه من النوع الكذاب لكن مابينتله. اش عندك قال عندي 3 سيارات هيونداي 
و يارس و جلس يمدح فيهم لمن شبع و هذا اللي ماشي سوقهم و من الكلام دا. و جلس يقول الفحص مامنه فايده تخسر فلسوك على الفاضي!!
و المشكله السياره اللي عنده اليارس بالذات شايفها و كاله و مشيها قليل و ماعتقد الفحص بيعيبها لكن تعود لسانهم على الكلمه دي. و قلت لصاحبي 
قله بنرجعلك. ورحنا درنا المعارض و الاسعار مبالغ فيها جدا كنا ندور كامري 2004 و فوق. كرلا 2006 و تحت لكن اسعارها غاليه بحكم انها مرغوبه و كرلا فوق 2009 و فوق 
اسعارها طايحه و ماحصلنا نظيف. و شويه خويه يتصل فيه و يقلنا ارجعوا و رجعنا عند المكرفونات و حصلنا كرلا جنب نفس هذا الشخص وسعرها نازل و البدي و كاله. و بدأت اقلب فيها
و شويه و جاء خويه و يسأل جاره الشريطي و يقله بالله مو سوق الهيونداي احسن من سوق التويوتا؟ و جاره الشريطي مارد عليه و لا انا رديت عليه. و جلست اقلب في الكرلا و حسيت انه 
فيه مشكله في المكينه ماتستجيب لمن ادعس بترول و تركتها و قلت لصاحبي امشي نشوف البقيه. 
و حصلنا كامري اعتقد 2009 و عجبتنا من كل النواحي و جلست اقلب فيها و اسأل الشريطي مرشوشه؟ يقلي واجهه بس. و السيارة وكاله البدي غير الواجهه. و يتكلم باخلاق و شوف السياره
و تبغى تفحص افحص. والسوم وصل كذا كم تزود؟ و انا تاركه ما ارد عليه جالس اقلب في السياره يمين يساره الشنطه المكينه جلست فيها فوق ال ربع ساعه او اكثر و لاامانه تحت نظري كانت السياره 
نظيفه. و كان خوي الشريطي ماسك صاحبي يقله اسمع اذا السياره عجبتك مايحتاج تفحص و لا حاجه السياره نظيفه و من الكلام دا. و من هنا وهنا زودت على السومه 500 . على طول قلي هات العربون. 
حتى اني حسيت اني استعجلت لاني ماتاكدت من وصول السومه للسعر اللي قاله لانه مافي ناس قلبوا عليها في ذاك الوقت غيرنا بحكم انه كان غير يوم جمعه مافي زحام.
لكن السعر مازال كان ممتاز. و هو يقلي ادفع العربون و انا مازلت اقلب فيها. فجأه قفلنا الكبوت حصلته مرشوش. قلت انت تقول السياره كلها بدي بلد. اهو الكبوت مرشوش
و في نفسي مو ذاك العيب لكن ليش الكذب؟ قلبت اخلاقه 180 درجه و قلي اعتبر السياره كلها مرشوشه؟!! قلت خير قال يالله تبغاها هات العربون 
قلت على الفحص قلي اوكي. هات 500 عربون و يالله على الفحص. قلت له  500 حق ايش؟ انا بفحص و ان طلع فيها شيء انا اتحمل مو انت. السياره طلع مافيها شيء كبير فلوسك تاخذها كامله. 
و اذا طلع فيها شيء انا اتحمل قيمة الفحص انت منت خسران. مارضي و اصر على ال 500 عربون. و قلبت اخلاقه هو صاحبه. قلت له بتسرقنا و الله لو اعطيتك العربون اني ما اشوف العربون مرة ثانيه لو السيارة طلع فيها شيء. 
و لا فاضي اجيب شرطه و ادخل في نزاع. قلت له السوق مليان سيارات ما خلص السوق على سيارتك خليها لك. و حركنا. 
 و الحمدلله توفقنا و اشتريناله سياره من موقع حراج نظيفه جدا و بمشي معقول و باقل بكثير من اسعار المعارض. 
هذي كانت تجربتي مع الشريطيه. 
احذر تعطي الشريطي عربون على سياره مافحصتها. 
احذر ترمي سومه على سياره لسا مافحصتها خصوصا مع الزحام ووجود اكثر من زبون للسياره بعضهم اصحابه يرفعوا السعر و اول ماترمي السعر انت حيمسكوا فيك. 
احذر انك تبيع سياره عن طريقهم. لانه بيقلك كم تبغى فيها وبيقلك اوكي. و هو مابيوصلها للسعر اللي انت تبغاه. و بعدها بيسوا الحركه المعروفه حقهم بيلتموا عليك 4 او 5 شريطيه و بيحبوا راسك لمن تكره 
نفسك و السياره و تبيع بسعرهم مو بسعرك. 
اي عربون تعطيه مابيرجع حتى لو السياره معيوبه الا بالشرطه و طلوع الروح. 

إبلاغ

الردود