نصائح مهمة لإعلانات موقع حراج

31 5

لايمكنك التصويت حتى الحصول على 20 نقطة على الأقل
إضغط هنا للإخفاء

ابو هيثم 7 2260
قبل 8 سنه و شهر

السلام عليكم ورحمه الله

مثل منتم عارفين مشاكل موقع حراج ماتخلص .. واكيد اغلبكم قد صادفت معه ودخل اعلان وحصل المعلن كاتب ((حسبي الله عليكم يالشريطية خربتو اعلاني )) لكن بمجرد انك تاخذ لفه على اسلوبه بالردود تكتشف انه هو اللي خرب على نفسه بنفسه

بحاول اكتب بعض الاشياء اللي من المفترض ان المعلن يكون عارفها ومتقيد فيها قبل ماينزل الاعلان

1/ اكتب التفاصيل المهمة .. مثل اللون والموديل والممشى وحاله البدي والمحركات والافضل تكون معه صورة والتصوير بالنهار عشان تكون واضحه

2/ تجاهل التفاصيل اللي مالها داعي .. مثل انا بييع هالسيارة عشان اشتري سيارة ببالي من زمااان او بسافر او اتزوج او ادخل مشروع .....الخ (( ياعزيزي انت كذا ترسل رساله مفادها انك محتد على البيع وممكن تبيع بأقل من سعر الموتر الحقيقي ))

3/ خليك صادق لكن لا تصير صريح بزيادة (( هذي النقطة بحاول اشرحها بشكل مفصل )) لان هناك فرق بين كثره الكلام والهذر الزايد اللي يخرب البيعة .. وبين التدليس والخداع والكذب وغش خلق الله

مثلا لو جاك واحد وكتب البدي وكاله ماعدا الصدامات مرشوشه ؟ تلقاه طيح بسعر موتره الف ريال على الاقل .. والمسكين مايدري ان الصدامات ماتعتبر من البدي بالاساس (( البدي هو المعدن سواء كان حديد مثل الرفارف او ألمونيوم مثل الكبوت بأغلب المواتر الجدد اما الشمعات والصدامات فهي خارج الحسبه لانها فيبر وبلاستيك حتى لو غيرتها ، نفس الشي مع سقف البانوراما لانه قزاز ))

يجيك الثاني كاتب ( المكينه والبدي على الفحص ) اتوقع 90% من اللي قرأ الجملة السابقه صار عنده انطباع ان الموتر نظييييف وشبه وكاله ؟ بينما لو ترجع لها بتلاحظ كلمه على الفحص ماقال على الشرط ! يعني انت وحظك اذا فحصت وعرفت العيوب انقص لك بالسعر . واذا ماانتبهت بعتها لك بسومتك [ مالي شغل اذا كان شريطي او لا اهم شي انه تلاعب بالمصطلحات واخفى عيوب موتره بطريقه احترافيه وهذا ان دل على شي فإنما يدل على ان عنده فن تسويق نوعا ما ]

وعشان تكون الفكرة واضحة ومافيه تناقض بين الصراحه وبين التدليس والغش .. الغشاش هو اللي يقولك رش تجميلي وضربه بقدر كف اليد واذا فحصت تلقى الصدمه واصله المكينه والشاص ملحم .. او يقولك البدي والمحركات وكاله شد بللد واذا فحصت تحصل الموتر منقلب والمكينة مخبطة

بعبارة اخرى انا الحين لو اقولك بدي السياره ذي فيه رش حزام .. او اقولك الموتر اللي قدامك كله مرشوش ماعدا الكبوت والتنده والشنطه !!! كلها نفس المعنى بالضبططط لكن تحس ان الثاني صريح بزياده وهنا احتمال يخسر الزبون بنسبه اكبر

المفترض يكون الواحد على علم ببعض مصطلحات البيع عشان ماتمشي عليه .. وطبعا اذا انت ماعندك خبرة بالسيارات رح لمحل متخصص او جب لك واحد يفحصها .. اما اللي يشتري على عماه ويجلس يتحسب الله على البايع .. يالغالي ماننكر انك انظلمت لكن لاجيت للصدق انت اللي جنيت على نفسك ؟ والا فيه احد يشتري بدون فحص او بدون خبرة بيع او شراء ؟؟؟

ارجو اني وفقت بتوضيح الفارق بين الاثنين .. لاني عارف ان اغلب التعليقات بتكون على النقطة ذي

4/ افضل شي ماتحط رقمك .. وتكتب التواصل على الخاص واللي تعجبني سومته بدق عليه .. او خل عندك رقم ثاني وقفله وقت انشغالك واذكرها بالاعلان .. اما انك تحط رقمك الرئيسي عاد تحمل الازعاجات يمكن يدق عليك واحد الساعه 2 بالليل ويقعد يسألك اسئله انت ذاكرها بالاعلان وبالاخير تكتشف انه يطقطق

5/ انتبه لاسلوبك بالرد على التعليقات بالاعلان .. اسلوب التزبيد والترعيد ونتف الجبهات والهياط هذا ينفع اذا كنت جالس باستراحه مع ربعك مب على موقع انت عارض فيه سلعه ؟ طيب يجي واحد ويقول تبيهم يبخسون سلعتي وانا ساكت ؟ ياخوي فيه ألفين اسلوب تقدر ترد فيها غير الاسلوب ذا .. وتأكد انك انت محتاج تبيع لكن الناس مب مضطره تشتري منك

6/ اذا احد بخس سلعتك (( وبالعادة يكون اول او ثاني رد )) انت عارف ان موترك يسوى 100 الف لكن جاك واحد وقال ب 20 الف .. هنا انتبه تقوله موتري موديله 2016 وانت رح دور لك موتر 2002 على قد فلوسك او رح اعرف قيمه موتري بعدين تعال وغيرها من الاساليب الغبية اللي تخرب البيعة على صاحبها ؟ الافضل تقوله (( اشكرك على فتح السوم )) واسكت لاترد بعدها عليه ، على قولة الشيبان كلمه ورد غطاها وبتلاحظ ان السومات تزداد تلقائيا.. ولاتحاول تبين له انك زعلان من السومه مثل تقول (( سومتن طيبه بس والله مب حقها )) انا معك ان بدايه الجمله ممتازة لكن النهايه خربت كل شي ؟ خل صدرك وسيع واصبر حقها بيجيها بس لاتوضح انك متنرفز من السومات ابددد .. الافضل لو تقول (سومه طيبه من وجه اطيب لكن نطلب من الله الزود)

صدقني ترى فيه ناس كثيررررر يحاولون يدرسون عقليه المعلن قبل مايشترون منه ؟ لاتستغرب انه تجيك ردود استفزازية لكن خلك ذكي وفطين بالردود .. يجيك واحد منزل اعلان كامل متكاااامل مافيه احسن منه وتعطي اللي كاتبه من 30 الى 35 سنه يعني شخص عاقل غالبا.. واذا نزلت وقريت ردوده تلقى عنده نقص بالخبرة بشكل وااااضح ؟ بعبارة اخرى تحسه نسف كل الفكرة السابقه اللي اخذتها من اسلوبه بالاعلان وبعد ماقريت التعليقات حسيت ان عقليته عقليه مراهق طايش وانت وش تتوقع من مراهق بالله ؟ تتوقع لو مسك خط سريع بيثبت على 120 مثلا هههههههههههههههه

وعلى فكرة دراسه عقليه المعلن عن طريق الردود توفر عليك حاجات كثيرة .. لانك اذا عرفت عقليه المعلن عرفت طريقه سواقته على قولتهم الخيل من خيالها والمواتر من سواقها.. قد تستفيد من ناحية انك ماتضيع وقتك وتقابل الشخص وتفحص وتطلعلك البلاوي خصوصا اذا كنت من مدينه بعيدة لكن على قولتهم مهب كل مرة تسلم الجرة


بالنهاية اتمنى لو اني وفقت بطرح بعض النقاط المهمة .. واللي عنده اضافه يتفضل

إبلاغ

الردود