مظاهر سلبية للبيع و الشراء في موقع حراج
26
5
إضغط هنا للإخفاء
﷽
السلام عليكم و رحمة الله و بركاته
مساكم الله بالخير
موقع حراج يرتاده الملايين من الزوار يومياً ، فيه البائع و فيه المشتري ، و فيه الوسيط ، و فيه اللي ماخذ الدنيا رقص و طرب ، و فيه الصاحي و المجنون … إلخ من نوعيات البشر .
فيه اللي يبغى يبيع سيارته و اللي يبغى بدل و اللي يبغى يقسطها .… إلخ
و يمكن فيه رياجيل مثلكم و شرواكم يحبون يدخلون حراج وقت الفراغ يطالعون في الاعلانات و ما شابه .
كان عندي حساب سويته قبل هذا الحساب في حراج قبل ٤ سنوات و نسيت رقمه السري ، و اللي ملاحظه فيه عادات سلبية جداً ما تغيرت منذ ٤ سنوات لحد الآن .
بذكر لكم موقف قبل أبدى أعدد المواقف السلبية اللي أنا و غيري شايفينها
قبل ٣ شهور تقريباً كنت أدور سيارة و شفت سيارة ناسبتني
دخلت الإعلان و شفت الردود كثيرة ، و أنا من النوع إذا شفت ردود كثيرة على أي إعلان أحتار أما ان السيارة تستاهل و الصاملين واجد ، أو ان الاعلان فيه خلل و المتابعين لاحظوه و جلسوا يتكلمون عنه ..
السيارة لكزس ٤٦٠ شورت موديل ٢٠١٢ لقيت الآدمي كاتب السوم واصل ١١٣ ألف و اللي يفرق السوم الله يبارك له و حاط رقمه
أول رد في الاعلان سام الموتر ب ١١٣٥٠٠ بعد الفحص و الرد الثاني فرق السومة ١١٤٠٠٠ و الرد الثالث فرق السومة ب ٥٠٠ و سام ب ١١٤٥٠٠ ريال
لكن اللي أثار شكي الرد الخامس تقريباً و نازل
السوم واصل ١١٥ ألف و سبحان الرازق من الرد الخامس و تحت السوم بدا يفرق ب ٣٠٠٠ ريال
يعني صاحب الرد الرابع سام ب ١١٥ ألف و الرد الخامس سام ب ١١٨ ألف و المضحك المبكي يقول ذلحين أحول لك عربوني و اشحنها لي بدون فحص
من الرد الخامس لين الرد ١٢ تقريباً زاد في سعر السيارة تقريباً ٢٠ ألف ريال
و المصيبة صاحب الإعلان كاتب في الردود السوم وصل ١٤٥ ألف من صاحب الرد رقم ١٢ و أطلب من الله الزود
هنا على طول شكيت في الوضع و أخذت رقم صاحب الاعلان بحثت عنه طلع فلان البقمي
و بحثت عن أرقام الرد الخامس لين الرد ١٢ و المصيبة ٣ ردود من اللي ساموا طلعت الأرقام بنفس اسمه و ٤ أرقام طلعت فلان الدوسري السرية الأولى و فلان العتيبي السرية الأولى و فلان الفيفي كاتب السرية الأولى و فلان البقمي السرية الأولى
الدوسري صاحب الاعلان سبحان الله نفس سريتهم و نفس المواصفات و تجاهلت الاعلان و لا كأني شفت شي لأنه قطع الرقاب ولا قطع الأرزاق
النقاط السلبية الملاحظة في حراج :
١. واحد من الناس ينزل اعلان لسيارته و يقفل الردود و يقول التواصل على الخاص أو الجوال ، تراسله في الخاص يقرا ولا يرد ، تراسله في الواتس آب يقرا ولا يرد ، تتصل عليه ما يرد ، و المصيبة تدخل الواتس آب تلقاه متصل بالساعات و كأنك تشحده تاخذ السيارة بلاش .
٢. ينزل اعلان لسيارته و يكتب الحد ٥٠ ألف و يجيك واحد غشيم أو مراهق و يكتب أسوم ب ٥٢ ألف و يجيك راع الاعلان يقول سومة طيبة وكأنه ( جحد ) حده اللي حاد به موتره ، هل هو طمع أو استغفال ؟
٣. انت في الطايف و فلان عارض سيارته في المدينة مثلاً يكتب للاستفسار الرجاء الاتصال ، تتصل عليه تقول وش العيوب اللي في السيارة يقول تعال افحص ! ، تعلمه انك بعيد عنه يصر على رآيه !! ، على كذا اللي مجمعه للسيارة بيروح في الخطوط و السفريات .
٤. واحد ينزل اعلان و يقول الموتر فيه رش في الرفرف و تقابله و تفحص ب ٤٠٠ و تلقى الموتر مصدوم و ايرباقاته طالعة و الشاص ملحمم و عيوب الدنيا فيه ، و إذا قلت ليه ما علمتني قال ما كتت أدري عنها ! .
٥. الغشمان اللي يدرعمون و يجي فلان يحد سيارته ب ١٠٠ و يجي يسوم ب ١٠١ !!! .
٦. فيه عينات تعرض السيارة تبغى تشوف كم تجيب و ساحب على الردود و الاتصالات و إذا السوم وقف على مبلغ معين حذف الإعلان .
٧. واحد ماخذ سيارته ايجار منتهي بالتمليك و كدها ٣ سنوات و مقبوعه في كل جهه و ماشيه ٢٠٠ ألف و يجي يقول المطلوب الدفعة الأولى !! و كأن استخدامه الثلاث سنوات للسيارة بلاش و فوق هذا تلقى عنده ١٠ أقساط متأخرة .
٨. واحد يعرض سيارته للبدل و تقابله و تفحص و يمرمطك و يتعبك و في الأخير يقول للآسف مالي في البدل أو ما ناسبني الموتر ! ، يعني قبل الفحص الموتر كان بنتلي و بعد الفحص طلع دباب !!! .
و الكثير من النقاط السلبية اللي لا تحضرني الآن
أغلبنا يمكن يتوقع انه في حراج السيارات و السلع أرخص من السوق أو المعارض
بينما في الحقيقة ان ٩٩٪ من اللي يعرضون سلعهم في حراج
يطلبون مثل سعرها في السوق و زيادة و إذا ما جابت السعر اللي يبغونه يتجهون للسوق أو المعارض ...
هذا ما لدي و وفقني الله و إياكم لما يحب و يرضى ..
إبلاغ
الردود
2
0
0
0
جرب تبيع سياره عن طريق الموقع تحصل ناس تسوم وتناسبك سوماتهم تتصل عليهم كانك تشحدهم وشوي ووده يقلك انقلع
1
0
قاب بين البائع والمشتري سببه سوء او تقصير من الوسيط الي هو
موقع حراج .. يفترض يضع حل .. مو انه يحط رساله تحذير
من التعامل المباشر .. اجل كيف تبيني اتعامل .. هل وفرت طرق ثانيه غير التعامل المباشر
الشي الثاني النسبه 1% انا مدري ليش حراج ياخذها بصراحه
انا عندي اقتراح واتمنى يكون حراج وسيط موب التراضيآ وبس الا واقعي برضه
يعني يكون خلنا نقول عنده معرض او مستودع يستلم المعروضات ويكون كافل حق جميع الاطراف
بهالطريقه راح يمنع كثير من المشاكل اعلاه
0
1
سواء سياره اوي اي شي لكنني لم افعل. بعدها عرفت ان السومات بعضها من معارف الشخص. ف عقلك دليلك. خلك ذكي
وشاور من تثق بأنهم ابخص منك. فكر واستشر واستخر وقرر
2
0
إما من غش أو تلفيق و و و و و
و من كذا تلقى أغلب الشعب يتجه للجديد الرخيص
ما أقول كل المستعمل مغشوش لكن للأسف الغالبية
2 من أصدقائي واحد أخذ مستعمل من حراج و الثاني من جاره المعرفة
الأول مرتاح مع السيارة و كانت بيعة حلوة و الثاني متمرمط بها كل يوم ورشة و جاره جاحده
1
0
لكن الافضل تطلع بالسيارة الى حراج المعارض ويتسام منك وبعدها :
تحط اعلان بحراج و(تغلق) التعليقات وتكتب اللي جاد يتواصل على الجوال .. وبكذا تضمن جدية المشتري بدل هالتعليقات اللي بعضها غير جاد بالشراء ويقلل من قيمة السيارة او يحط عليها عيوب
اللي جاد يتصل ويجي يفحص ويعربن ويشتري ..
0
0
انا بختصر الموضوع
عند البيع تعال لموقع حراج واذا بتشتري رح للمعارض
0
0
معقول سيارات سيدان صغيرة ومتوسطة 2007 - 2009 أسعارها من 60 - 90 ألف؟؟؟؟؟؟
0
0
او يقلك استخدام شايب.. والشايب نظره رايح فيها ما يبقي مطب الا ياكله ولا يخلي زاوية رصيف الا يقشها
والٲسوٲ منهم كلهم اللي يقول استخدام حكومي والكل يعرف سيارات الحكومة يستخدمها اكثر من شخص واغلبها طمرت كل الارصفة ووضعها مزري ×
عذرا ع الاطالة ...
0
0
فالي يقولك يسمت برا 113
تاكد انها ماسيمت ويبي فيها فوق ال 113
فلو اختصر على نفسه وقال ابي فيها 120 ئهي ماتسوى هالقيمة
يكون افضل له
لانه ابتعد عن بيع النجش الحرام حتى لو بالغ فسعرها
لكن لايعني اني اؤيد المبالغه
وانا اقول مستحيل الادارة تلتفت لهذي الامور لانها هي بنفسها متلاعبه
يعني واحد يجلس يحدث اعلانه سنوات ويوم تتابع تجد في الاخير السيارة مباعه!
طبعا الادارة عارفه ومطنشه وللاسف همهم ارضاء العميل الي يدخل لهم مكاسب حتى بالغلط
الشي الاخر التقييمات
واحد يجيب مواتر نظيفه نشهد لها
وخلنا نقول باع 13 موتر لان مواتره نادره ومايبيع كثير
فكيف وصل تقييم الزبائن شطح لفوق 80 فكيف باع فالموقع هالسيارات وسياراته محدوده
لذلك بحثت في التقييمات
ووجدت اغلبهم اعطى تقييم بناء عالتعامل والاخلاق والشفافيه
لكن هل اشتريت منه ولا؟
الجواب لا وردودهم تدل على ذلك
رغم ان قوانين حراج ماتسمح لك تقيم البائع الا بعد ماتشتري منه وتحط رقم الاعلان الي شريته منه
فكيف الان تم قبول تقييمهم بدون شراء
والاخ الثاني مسوي قناه فاليوتيوب ويقول قيموني في موقع حراج وحاط رابط!!!!!
فلا احد ينغر فالتقييمات والكلام المعسول
قبل 7 سنه و 5 شهر