كيف اعرف ان السيارة جاها حادث او لا

ألي اعرفه هذا التقرير الخاص بالسيارات الإمريكية او الجايه جمرك

ويمديك تعرف البدي إذا رشته رشة تجميلي او لا عن طريق النظر للبدي من الداخل يبين إذا معدل او لا 


هذا ألي اعرفه واتمنى اني افدتك وما يقصرون معك الإخوان إن شاء الله

وعليكم السلام
عدد المستخدمين بالراحه تعرف وبسيط
لاكن حوادث اذا الموتر سعودي
ماتقدر تعرف ولا لها تقرير الا اذا الموتر له ملف بالوكالة
تقدر تاخذ رقم الهيكل وتروح الوكالة ويقولك وش صار على موتر
من صيانه وحوادث وغيرة
ولا بد من الفحص من الصدام الى الصدام
اما اذا الموتر مستخدم في امريكا ومصدر الى السعودية
بامكانك تاخذ رقم الهيكل وتطلع تقريرين اوتوشيك والكارفكس
التقريرين
توضحلك عدد المستخدمين بامريكا
وتوضح اللون وتاريخ التصدير وتوضح العداد
وايضا الفئة فل او نص فل وتوضح اذا كان الموتر
استخدام شركات تاجير او شخص امريكي
وايضا توضح الحوادث والصيانة
وحتى لو امريكي ومع هالتقارير لابد الفحص مسمار مسمار

اعجبني اخر سطر كتبته يالرفاعي رحم الله والديك.
كلام 100%

اذ لها حوادث روح نجم 

والحين اعتقد الزمو المعارض انك تشوف السياره عليها حوادث او لا 

حياك
طريقة معرفة عدد الملاك السابقين تحصله بقوقل
بخصوص السيارة تعرضت لاحوادث
اول شي تاكد من الاارباقات 
وثاني شي اقرب ورشة عندها جهاز فحص البدي
وبعدها يفحص لك المحركات ويفضل ميكانيكي وماتعتمد
ع الكمبيوتر وهل سبق فك القير او المكينه الخ
واذا خلصت فحص اطلب ورقة منهم وعلا مسوليتهم 
مختومة ان الفحص علا مسوليتهم 
وباالتوفيق

أولاً : الخبرة ولا غير الخبرة تستطيع أن تعرف السيارة المصدومة من السيارة اللي ماجاها شيء

ثانياً : سبحان الله السيارة اللي جايها حادث يبين من وقفتها ومن خشتها ومن ممشاها وهذا له علاقة ( بديناميكية السيارة )

ثالثاً : اللون ,, مهما حاول راعي السيارة أن يصبغ سيارته المصدومة ويرشها رش وكالة وعند أفضل الورش
ماراح يقدرون يصلون لصبغ و رش المصنع الأم وإن غير اللون بقطعة جديدة من الوكالة بدل السمكرة والرش
راح يتباين لون القطعة الجديدة المركبة مع القطع الأخرى اللي ماجاها شيء أو ماجاها رش

رابعاً : صوت القطع المسمكرة واضح إذا قمت وطقطقة عليها بأصابعك

خامساً : فيها أجزاء صعبة جداً أنها ترش حتى رش وكالة مستحيله لأنه مايرشها غير ( الروبوت بالمصنع الأم )

يجيك الروبوت طال عمرك ويرشه مع هيكل السيارة ككل يعني ( أقدر أبسطها لك عظم السيارة ) يعني قبل مايركبون أي شيء عليه

مثل اللي وراء المكينة من تحت جهة القزاز الأمامي أو من عند الشنطة تحت القزاز الخلفي . . . . .

أو اللي تحت الأبواب ببطن السيارة أو اللي وراء المراتب الخلفية يعني مجرد كشف لهذه المناطق راح تشوف هل السيارة مرشوشة أو لا . .

بالنسبه لعدد الملاك المستخدمين. تقدر تعرف. كم شخص 

ملك السياره. عن طريق. حاجتين الاوله. تكون تعرف واحد بالمرور

اذا ماتعرف احد بالمرور  فيه خيار خيار ثاني. بس لازم 

من وجود صاحب السياره. تكون معه انت. 

الي هو انه يدخل على حسابه في ابشر موقع وزارة الداخليه 

ويدخل على خدمات المرور ويطلع له. السياره. برقم اللوحه 

وتطلع كم. شخص. سبق وانا استخدمها. عدد الملاك السابقين 

ماتطلع اسمائهم. يطلع. فقط. مثال عدد الملاك المستخدمين سابقاً 

لهذي المركبه ٣. أشخاص. 

يعني زي كذا تقريباً تطلع. له. 


بالطريقه هذي. تعرف كم شخص. استخدمها 


اما الحوادث.  شفلك احد له خبره بالسيارات 

والفحص. بعد يطلع لك. الرشوش والسمكره. 

المفترض يكون فيه خدمة تبين عدد الملاك السابقين وإذا هم أفراد أو شركات حتى تقل نسبة الغش .
فمثلا إذا تم عرض سيارة للبيع، يقوم صاحبها الحالي بفتح خانة استعلام في أبشر أو غيره من المواقع الحكومية تبين الملاك السابقين بالاستعلام برقم اللوحة أو الشاصي ويتم إغلاقها بعد الشراء (حتى ما يتطفل أحد ماله دخل).
ومافيه مشكلة لو فيه رسوم على الخدمة كونها فقط وقت البيع والشراء ومنها الدولة تستفيد والمشتري يشتري وهو متطمن .

طيب والي اشترى سياره من أمريكا كيف يعرف ؟ سمعت ان فيه ناس متخصصين بالاشياء و يجيب لك تقرير كامل عنها 

اذكر في رقم ترسل عليه رسالة يجيك رد ان كان صار عليها حادث سابقا لكن ناسي الرقم

ياليت تحاول تتذكره ياعماد
لاني شريت سيارة وابتاكد عليها حوادث او لا

حمل برنامج موجز على الايفون وحط رقم اللوحه وتشوف كم حادث
صار عليها

حمل تطبيق سيارة فيه تقرير موجز ب ٥٩ ريال وارخص من تطبيق موجز نفسهم