ما هي افضل سيارة اقتصادية أقل من 20 ألف

تبي النصيحة اذا تبي قطع رخيصة وموتر كرف واقتصادي بنزين بس حقت بلد ماتصلح للسفر الا للضرورة خذ إكسنت مديل 2014 وممكن تلاقي 2015 بفلوسك ذي تلاقي النظيف

بالنسبة لتيايوتا فيه اليارس موتر كرف بس قطع الغيار اغلى من الاكسنت وشكلها قبيح نوعا ما فلاتروح بعيد عن الاكسنت والله يكتب لك الخير .

وبالنسبة للبيع الاكسنت عند البيع كثير زباينها وما تبلش فيها وتجيب لك سعر كويس وكذلك اليارس بس انا اميل للاكسنت بسبب الشكل ورخص قطع الغيار بالتوفيق عزيزي .

مثل ماقالك الاخ الطيب الاكسنت مناسبة لك
وبتحصل 2013 او 2014
كذالك عندك اختها الكيا ريو بتحصل نضيف 2015

اكسنت
والانترا من 2007 الى 2011 تعبي فل ب26 ريال

السلام عليكم
عندك عدة خيارات
اكسنت من موديل 2013 وتحت
يارس نفس الشي
عندك كيا ريو من 2014 وتحت
عندك كيا بيكانتو تلاقي جديد ونظيف بهذذا المبلغ
وكذالك هونداي اي تن
بالنسبه لطريقة الشراء اعلب هذه السيارات تكون
في الاصل ايجار وغلب معارضنا والشريطيه مغيرين عداد
المسافات لذا وجب عليك قبل كل شي ؟؟؟؟
تسال هل هو اول مالك وكم لها السيارة معه
اما البدي والفحص عند مركز فحص وتفق اذا طلع فيها شي
الفحص عليه
امل اني افدتك

اذا تقدر تشوف فئة اكبر شوي ما تفرق كثير بالصرفيه
يكون التانكي اكبر افضل اذا مسكت خط ممكن تحتاج تسافر عليها
و ارسى و اقوى عزم وقت التجاوز
شف اللي مكاينها 1600 او 2000 cc
كورولا النترا سيراتو و اللي مثل حجمها

الاكسنت. حلوه وقطع رخيصه. اذا كنت بتستخدمها داخل المدينه

فهي حلوه. وخدومه. اذا بتسافر عليها. تراها متعبه. 

انا عندي وحده. معي من اربع سنوات. والله اني 

كرفتها كرف. الويل.  كنت اسافر عليها من الرياض الين 

الجنوب. اكثر من ١٢٠٠كيلو  كنت اسافر كل شهر 

والله لمدة سنتين. على هذا الموال. وماعمري. حطيت فيها 

في هالسنتين. غير زيت وبنزين. وسيور وفحمات الفرامل 

وبعد سنتين قدر الله عليه بحادث. شنيع. الله يكفينا وياكم 

شر الحوادث.  ومن بعدها. ماارتحت لسياره. كل فتره 

يطلع خراب. تصلح حاجه تطلع الثانيه. لاكن السياره خدومه

اذا بتحافظ عليها. 

واليارس. حلوه. بس عيبها قطع غيارها غاليه 

عند البيع. يطيح سعر الاكسنت. واليارس مدري 

عن سعرها. 

بس انا سيارتي اكسنت. وخدومه. وحلوه. واقتصاديه 

لاكن ماتصلح للسفر متعبه والهوا يلعب فيها 

لمدة سنتين. ماحطيت فيها الا زيت وبنزين وقطع استهلاكيه 

وكرفتها كرف. الويل وماقصرت معي. وبعد سنتين. بعد الحادث 

بدت تطلب 

عندك كيا ريو نفس الاكسنت. 

وبتحصل 2014/2015 حدود عشرين الف. 

وممشى قليل. 

اما تايوتا. فعندك اليارس. وخدومه. على كلام الناس 

بالنسبه لي ماجربت الا الاكسنت. وازيرا 

اما اليارس. ماجربتها. 

بس اليارس. مكينتها 1500. و1300

الاكسنت مكينتها 1400 و1600 

والله يرزقك الي تتمناه. 

إضااااااااافه بسيطه نسيت ماكتبتها بردي السابق. 

اول شي. انتبه لاتكون سياره. اجار. لانهم ينزلون العداد

مثلاً ممشى السياره 160الف. ينزل الممشى الى 70الف 

مثال فقط. 

وحتى بعض الشريطيه كذا ينزلون من عداد الممشى 

ويلمع الداخليه. ب١٠٠ ريال. وتجي تشتري تشوفها 

نظيفه. وممشا قليل. وتشتري. حسبي الله على الي يسوي 

كذا. علشان فلوس. وينصب على المساكين. 


هذا اولاً انتبه لها. غالباً تحصلها واقفه بالمعرض. 

او على الرصيف بالشارع. 

وفيه طريقه. تعرف اذا كانت تابعه لمكتب تاجير اولا 

هي انك. تكلم صاحب السياره. وتشوف الاستماره. 

ولو تعرف. احد بالمرور تعطيه. رقم اللوحه. ويطلع لك 

السياره كم شخص. ملكها. لان بعضهم يقول انا المالك 

الاول. وهو كذاب. الله المستعان 


النقطه الثانيه. عند الفحص. 

لاتعتمد على فحص الكمبيوتر ونسبه المكينه. 

لان نسبة المكينة. مثلً فحصت السياره وطلع نسبة المكينه

90% انت كذا بترتاح وتتطمن. وتقول المكينه نظيفه وحلوه

لاكن في الحقيقه. هذي. كلها مالها دخل بالمكينه حتى 

لو كانت. المكينه. على وشك تخبيط. او تكون. فيها 

مشكله. راح تطلع لك النسبه. 90او اكثر. 

لان فحص الكمبيوتر. يعتمد على القطع الكهربائيه 

لو تجيب لهم. سياره. وتفحصها وتطلع نسبتها 80%

روح غير بواجي وبطاريه. وفلتر هوا. ونظف البخاخات 

وارجع لهم وافحصها. راح تطلع. لك. النسبه اعلى من الي 

قبل. راح تطلع مثال فقط. 91% 

وهذي. جربتها انا بنفسي على سيارتي. ماني متذكر 

النسبه بالظبط. لاكن. في المره الاوله. طلعت النسبه حدود

ال84% ورحت غيرت بواجي واسلاك بواجي. وغيرت 

البطاريه. ركبت بطاريه. سيارة خويي. جديده عشان اجرب 

ورجعت لنفس الفحص وفحصتها وطلعت نسبتها 

فوق ال 90 بس ماني متذكر كم بالظبط.  


لو تعرف لك ميكانيكي. تجيب له السياره يفحصها افضل 


اهم شي. بالفحص تركز على المكينه والقير. 

القير يطلع. الفني بالفحص يجربه لك. بالمشي 

المكينه يكتفون بالفحص. فقط. 

واهم شي. ماتكون فيها صدمه قويه. من الامام. 

حتى لو الصدمه ماوصلت الرديتر. اي صدمه اماميه 

ويطلع الارباق. وبعد ماتصلح. تطلع لك الخربات. يوم 

بعد يوم وهذا انا. اكبر مثال. صدمت بسيارتي 

وكل فتره يطلع لي. مشكله.  وقبل الحادث. 

والله سنتين. ماحطيت فيها غير اشياء استهلاكيه. 

وكرفتها سفريات. من الرياض. للجنوب. ومكه. 

والدمام. والحفر. الله على ذيك الايام  كنت مرتاح معها 

اسافر ماشيل همها بالخط والحين لو امشي مية كيلو 

متخوف منها. توقف في اي لحظه. 

انت انتبه للأأشياء الي ذكرتها لك. 

قير مكينه. الحوادث. ماتكون بالوجهيه الارباق سليم 

والله ييسر لك.  لو تحصل هنا بالموقع. يكون افضل. 

علشان تشوف الاستماره  السياره بسمه او بسم مكتب 

تاجير. لان يقدر يثبت لك اذا كانت السياره بئسمه 

عن طريق موقع ابشر وزارة الداخليه. 

ويكون شرط بينك وبين اي شخص تشتري 

منه السياره. ان اي شي. يطلع فيها بالفحص. 

هو يتحمل  قيمه الفحص. واذا ماطلع فيها شي. 

تدفع الفحص وتشتري 

والله يكتب لك الي فيه الخير واسف جداًً على الاطاله. 

بس حبيت اوضح لك اكثر وافيدگ. بالي اعرفه. 

خذلك كروﻻ او يارس غير تويوتا في التحمل مافي وبما ان خبرتك في السيارات قليله خذ واحد من اصحابك له خبره في السيارات ضروري ضروري بعض الاحيان واحد له خبره في السيارات افضل من 10 مراكز فحص وانزل الحراج يوم الجمعه بعد العصر انا قبل شهر نزلت ولقيت يارس 2015 نص فل ب 18 وخش على مواضيعي كاتب الموضوع بالكامل

ليه تأخذ سياره صغيره كالياريس والاكسنت ؟
صحيح انها اقتصادية وقليلة خراب لكن صفر من ناحية الأمان.

ب20 الف اخذلك كامري أو فورد كراون فكتوريا

طبعا تأخذها بعد الفحص ولاتهتم بالموديل .. أهم شي نظافة المحركات كالمكينه والجير والشاصي.

والله أفضل لك من هالسيارات الصغيره.
تحس انك راكب كارتون ماشي في الشارع وبأي حادث لاقدر الله تروح للمقبره

الحديد يتعوض لكن لاتستهين بروحك.
صحيح انت تمشي بأمان وبحفظ الله لكن انت ما تأمن من المستهتريين في الشوارع.
اتخذ الأسباب وتوكل على الله .

والله يوفقك ويحفظك ويحفظ سائر المسلمين من الحوادث ومن المستهتريين بأرواح الناس كالمفحطيين والدرباويه وغيرهم ممن لايحترمون قواعد المرور

خذلك كابرس 90 ربع تندة داخلية احمر....
خذ واحد نظيف وصدقني بيخدمك 50 سنة قدام.

ياحبيبي^^^^^^الكابرس بس وين اللي تلقاه حلو ونظيف وصاحي

الإخوة الكرام الأفاضل :
(اسم المستخدم محجوز)
(الرفاعي33)

(بايع الدنيا 66)

(غريب 111) (

1985-1405)


(سبحان الرازق سبحانه)

(موستنج جي تي ار)

(الثامنة مع داوود)

(ولد الرياض 2010)














(ahamd9477)
جزراكم الله جميعاً خير الجزاء حاشاكم القصور وافين والله ولي شرف أنكم رددتم على أسئلتي ،وشكر خاص للأخ (سبحان الخالق سبحانه) فقد زاد وافاد شكراً جزيلاً لكم جميعاً دعواتي لكم بظهر الغيب بالصلاح والعفو والعافية في الدنيا والآخرة...

كنت أتمنى لو باستطاعتي تقييمكم تستاهلوا التقييم على التفاعل المثمر

العفو ياخوي. الله يوفقك دنيا واخره. 

كتب الله أجرك يا "سبحان الرزاق سبحانه" والله يوفقك لما يحب ويرضى .
كفيت ووفيت بسردك هذا وأنا بدور لي سيارة بنفس خطواتك إن شاء الله.

بما اني مجرب الاكسنت 2012 واليارس 2013 فا اقولك الاكسنت خيار جيد خدومه وعمليه وصيانتها بسطه وقطعها رخيصه
وتحصل 2013 او 14 بفلوسك بس للامانه عن تجربه
ما تنفع للخطوط لكن وسط البلد ممتازه واليارس كذالك لكن يعيبها قطعها غاليه جدا وفيها عيب مصنعي في الكومبريسر خرب علي
وغيرته وكاله بـ2800 اوف الاكسنت خيار كويس والقرار لك