قرار شراء السياره

12 7

لايمكنك التصويت حتى الحصول على 20 نقطة على الأقل
إضغط هنا للإخفاء

ghareeb1 53
قبل 7 سنه و 7 شهر

السلام عليكم ورحمة الله وبركاته
ارجو التفاعل من الجميع والمشاركه الفاعله بعقلانيه
لاحظت فيه مشكله كبيره وازمه تحدث عند اي واحد فينا عندما يقرر يشتري سياره ويبدأ بالاسئله والاستفسارات 
من اللي يعرفه واللي ما يعرفه وهذا مهو عيب ولكن لانه ربما لا يعرف وش يبي بالضبط وتاتيه اجابات ومشورات 
من كل حدب وصوب وكل شخص يعطي من وجهة نظره او تجربته الشخصيه وفي النهايه صاحبنا اللي يستفسر تاه بين 
رغبته الشخصيه وبين وجهات النظر المختلفه لانه في خاطره سياره معينه ومتردد او غير متاكد من نفسه وتجيه اراء
تزيد الطين بله والمشكله لما يجي رأي من ناس مهم اصحاب تجربه لكن يسمعون من هذا وهذا وبما ان الناس يسمعون من 
بعضهم صارت الاراء تتوارث من الاب والاخ والصديق و و و و و وشكلوا رأي جماعي مع سلعه او ضد سلعه معينه
ولما تطلع في الشارع تلاحظ السيارات كلها متشابهه تحس كانه قص ولزق وعلى فكره ترى مهو في كل الاحوال الارآء تكون خاطئه لكن حسب اللي شفته وقرأته في الموقع بصراحه شي مؤسف.
طبعا الشخص اللي اشترى السياره اشتراها حسب اراء الناس وليس كما يشتهي هو والنتيجه انه دفع مبلغ من المال في سلعه لا يرغبها واعطيكم مثال على ذلك اغلب الشباب يحب يركب سياره رياضيه 
مميزه واغلبها غالي لانها مصممه بشكل مختلف ومهيئه بعوامل السلامه ولكن يضطر يشتري سياره غير رياضيه وحسب ذوق الناس ولانه يحب السيارات الرياضيه يقوم بعمل اضافات وبالتزويد عليها ومن قدرتها
الحصانيه وبرمجتها من اجل تعطيه الاحساس الرياضي او القياده الرياضيه ولكن للاسف السياره غير مصممه لتصبح سياره رياضيه ودخل في مخاطر كبيره جدا ممكن تكلفه حياته لا سمح الله  
غالبا ما تكون الردود عند الاستفسار عن سياره معينه تكون كالاتي:
١. اهرب هروبك من الاسد، طيب هات راي مقنع او مبرر حتى الكل يستفيد.
٢. هذي يطيح سعرها النص بعد سنتين، طيب ليش تفكر تبيع السياره وانت دافع فيها دم قلبك؟
٣. انحش قطع غيارها غالي نار وما احد يعرف يصلحها، طيب قطع الغيار الرخيص معناه جوده اقل ومخاطر اعلى والحياه غاليه ما تسوى عليك توفر فرق السعر وتخاطر بحياتك وحياة اهلك.
٤. خراباتها كثير، مهو شرط وكل واحد واستخدامه وانا شخصيا استخدمت الاودي اي ٦ اكثر من ١١ سنه وكرفتها كرف الويل وخراباتها كانت عاديه.
اليوم اسعار السيارات صارت متقاريه الياباني مقارب للالماني لكن الجوده فرق السما عن الارض. الجوده لا تعني تحط لي جلد وسماعات وفتحة سقف و شاشه متر في متر واضاءات و زينون وكاميرات وكل المواصفات وبويه او صبغ حيا الله ينحك من اقل شغله والبدي 
كرتون والفرامل اي كلام ووسائل السلامه المهمه لا تتناسب مع سعر السياره وهذا هو الاهم<<<.
سياره جودة بديها قليله حتى القزاز نوعيته رخيصه والاطارات نوعيه رديئه والسعر مقارب لسياره المانيه لكن مع فارق الجوده بكل تاكيد، هنا نجد فرق سعر قطع الغيار لان جودة قطع الغيار مثلا في الالماني اغلى بحكم انها جيده والا كيف تفسر قطعتين من نفس المعدن بسعرين مختلفين
اليابانيين نجحوا في شيئين: ١. بيع سياره بسعر غالي، ٢. بيع قطع غيار بجوده اقل وسعر ارخص. لا ويكتبون سبورت على سياره دفع رباعي كيف تجي هذي مدري. من هنا صار اقتناء سياره يابانيه اقل تكلفه من السياره الالمانيه والسبب مثل ماذكرت قطع غيار اي كلام.
والصحيح ان اقتناء سياره المانيه مثلا بورش او مرسيدس يمكن ان تكون اقل تكلفه من الياباني المقارب لها بالسعر لان البورش ما تغير زيت كل ٥ الاف كيلو ويمكن ماتغير الزيت الا بالسنه مره وكذلك الفرامل يخدم سنين وباقي القطع الاخرى واذا بدلت قطعه تخدمك سنين والسياره تبقى بحالتها سنين طويله
ولهذه الاسباب ترى من يشتري لابنه سياره صغيره كرتون عباره عن تابوت لعائلته حتى يوفر في السعر وهذا خطأ كبير جدا. انا اتمنى نغير من ثقافتنا في قرار شراء السيارات ولا تفكر في الرخص مقابل سلامتك الشخصيه وحياتك واشتر السياره اللي تحلم فيها وترغبها واستمتع فيها ترى الحياه قصيره. 
واذا اشتريت سياره لا تفكر تبيعها الا بعد عمر طويل ان شاء الله او تورثها لابنائك ... 
حبيت اشارككم في رايي واتمنى مشاركتكم جزيتم خيرا وكل عام وانتم بخير 

إبلاغ

الردود